Jop 41 - JAM DE NHIALIC 2011

¹ Duɛ̈ɛ̈rë ŋuäl dït dɔm në alabithɔ? Ku duɛ̈ɛ̈rë dɔm liep në wiën?

² Duɛ̈ɛ̈rë mac wum në wiën, ku nɔn duɛ̈ɛ̈rë gɔn thok në alɔbithɔ?

³ Duëër jäl lim të de yïn, ku ee kok de piɔ̈u yen bï lim?

⁴ Bïï mät looi ke yïn, ku gɛm nɔn bï yen yïn luööi aɣet athɛɛr?

⁵ Bä mac cök cït amɔ̈ɔ̈r ku jɔ mɛnhdu aa thuëëc në yen?

⁶ Bïï kɔc ke rec guaal ku bïk tɛm lek ɣaac në thuken yiic?

⁷ Duɛ̈ɛ̈rë juaany guöp në tɔɔŋ ku yenɔm kekë liëëny?

⁸ Jak nɔm raan tök, ku acïï bï bɛ nyɔk, tɔŋde acï yï duëër mɔ̈ɔ̈r nɔm.

⁹ Raan ee ŋuäl dït tïŋ, ee wïïk në luɔi cïn en aŋäth be tɔ̈u ke yen.

¹⁰ Të cïn en jön bï yen pɔ̈ɔ̈c ka eeŋa bï kɔ̈ɔ̈c në yenɔm.

¹¹ Eeŋa duëër en mak ku bï ŋoot ke poth? Acïn raan ë pinynɔm duëër e lëu.

¹² Në we lɛ̈k täu ë cök cath ë ŋuäl dït, ku nyuöth we riɛl cath ke yen kekë dïtde.

¹³ Acïn raan duëër dɛ̈ldɛn tɔ̈u në yekɔ̈u rɛtic, ku nɔn pïl lupɔdɛn de tɔŋ cï matic.

¹⁴ Eeŋa duëër en tɔ liep e thok ku leckɛn cï röt kueer ë thokic ayek kɔc riääc?

¹⁵ Könde acï kueer në aber ke kööt, cï ke duööt piny ëtök abïk ciët kuur.

¹⁶ Keek acï ke duööt piny ëtök aril, acakaa yom acïï duëër tëëk në kɛm ken.

¹⁷ Keek kedhie acïk röt duut ëtök aril, acïn kë duëër ke pääk.

¹⁸ Tïïmde ee wil ë mac, ku acït nyin aköl bɔ̈ thok.

¹⁹ Të rëër en lɔ̈k ë mac ee bɛ̈n bei në yethok, ku atec ke mac ayek lɔ ke ke kɛɛc nhial.

²⁰ Ku tol ee dhuŋ bei në yewum, cït tol ë wal dɛ̈p ë töny thar.

²¹ Wëide ee cool tɔ döm, ku liemde mac ee bɛ̈n bei në yethok,

²² riɛl de yenhde, aye kɔc cï yök në yen riɔ̈ɔ̈c kedhie.

²³ Rïïŋ de yen guöp ëbɛ̈n, ë rɔt nuat në ye guöp aril ke cïï rɔt wuk.

²⁴ Piɔ̈ndɛn cït kuur acïnic riɔ̈ɔ̈c, ku cïï rɔt e wuuk, ku ril cït kuur ë guär.

²⁵ Të jɔt en rɔt, a cakaa yiëth, ayek riɔ̈ɔ̈c ku kɔtkï.

²⁶ Acïn abätäu duëër en yiëk guöp tëtök, ayï tɔŋ ayï dhaŋ ayï lem.

²⁷ Të de yen, wëëth akɔ̈c cït wäl, ku cït maläŋ tim cï rop.

²⁸ Acïn winh de dhaŋ duëër en kat, kɔi cïï ke ye biök ayek ciët thomthoom thii ke wal.

²⁹ Tëde yen, thieec acïtkï thomthoom thii ke wal, ee kɔc thɛ̈ɛ̈r en dɔl gup.

³⁰ Kuaac ee tɔ̈u në ye yɔu tueŋ amothkï cït abɔ̈c ke töny cï kuɛm, ayek piny tuök nhial të ɣöc en ë tiɔpic.

³¹ Ee wɛ̈ɛ̈r tuökic nhial ku tɔ pïïu piäär, cït miök piäär tööny.

³² Ee të cï yen tëëk thïn nyääŋic piny ke lɔ carcar ku puk wɛ̈ɛ̈r nyin ke amonh ɣer ë wic.

³³ Acïn kë cï cak cït en ë piny nɔm, ee län cie riɔ̈ɔ̈c

³⁴ Ee läi biɔɔn gup kedhie ayï läi ee röt leec, ee bɛ̈ny de läi roor ëbɛ̈n.