Jop 4 - JAM DE NHIALIC 2011

Bëër Tueŋ de Eliapath Eliapath

^1-2 Na wën ke bëër ë Eliapath raan wun Teman an, “Jop, duɛ̈ɛ̈rë piɔ̈u diu të lɛ̈kë raan yïn këde? Mim acïï raan duëër bɛ lëu.

³ Yïn, yïn cï kɔc juëc dhil kɔn jääm piɔ̈ɔ̈th, ku tɔ kɔc kɔ̈c ril.

⁴ Wëlku ayek raan wiëëk muɔ̈k nhial, ku ee miɔɔl kɔ̈c tɔ ril.

⁵ Ku ënɔɔnë, ë bɛ aa yïn, ku yïn cïï yïpiɔ̈u be lëu në muk, acï yï yök ku yïn ë riɔ̈ɔ̈c arëët.

⁶ Ku yïn ee raan ee Nhialic lam ku yïn ee raan adöt, eeŋö cïn kääc në aŋäthdu yic aril.

⁷ Tak yïnɔm da, eeŋa cï kɔn thou ke cïn awäc, ku ee tën ou cïï kɔc piɛthpiɔ̈ɔ̈th kɔn riɔ̈ɔ̈r nyïïn?

⁸ Cït man cän en kɔn tïŋ, kɔc ee karɛc com ku nuɛɛn, yen kë yek jɔ tem ka.

⁹ Wëi ë Nhialic ee ke nɔ̈k, ku yom de agönhde ee ke riɔ̈ɔ̈r nyïïn.

¹⁰ Kɔc ee karɛc looi ayek ŋäär cït kɔ̈ɔ̈r, ku ye Nhialic ke dhuööŋ lec ku miim kethook,

¹¹ abïk thou në ciën lec ye kek bɛ näk ku ciëm kek, ku aduurken abïk lɔ thiɛ̈i piny.

¹² Ade jam cï yiɛ̈n ɛn, jam cï kuɛ̈l ë yayïc.

¹³ Yɛn aa cïï nïn tiaam, ku jɔ nyuöth ɛn cuil guöp abï ya lath,

¹⁴ ku dut riɔ̈ɔ̈c ɛn abïï yomkï thieeriic.

¹⁵ Wëi tëk në yanyin cït yom abï nhiëm tiëër ë yaguöp ëbɛ̈n.

¹⁶ Na wën akɛ̈ɛ̈c në yanyin tueŋ, ku cïn kë thɔ̈ŋ en, yɛn cï röl thiinakäŋ bɛ̈n piŋ ke lueel an,

¹⁷ “Duëër raan piɔ̈u piath awär Nhialic, ku nɔn duëër raan awai awär Aciëŋde?

¹⁸ Na kën kɔckɛn ee ye luöi paannhial ŋɔ̈ɔ̈th, ku ye tuuckɛn nhial kuöm ka cïk wööc.

¹⁹ Ku bï jɔ tɔ̈u adï kekë kɔc nu ë ɣöötkɛn ke tiɔp yiic cï ke keeriic në abuui yic, cïï keek bï nhiac yiic cït man apärpär?

²⁰ Në kaam de adurduur kekë thëën ayek thou ananden ke kuckï röt.

²¹ Ku të cïï mëën cil de pɛɛnyken wɛ̈ɛ̈th bei, ayek thou, ke ke ŋoot ke ke dɛk ë pɛlënɔm.”