Jop 39 - JAM DE NHIALIC 2011

¹ Ŋic ee nɛn ye thök bɔɔth ke kuriic dhiëth? Ku de të cïn lɔ̈ɔ̈c kɔn tïŋ ke dhiëth?

² Ŋic ee kaam dïït cït ŋö ee kek liac, ku ee nɛn ye kek dhiëth?

³ Duɛ̈ɛ̈rë ŋic ee nɛn ye kek guŋ të dhiëëth kek mïth?

⁴ Në läi rooriic mïthken ayek dït ke ke ril, ku na cïk jäl acïkï kenïïm ee bɛ lɔ dɔ̈k märken.

⁵ Eeŋa ee mul roor gäm nɔm lääu, ku eeŋa ee ke pɔ̈l bïk tai roor?

⁶ Acä ke gäm jɔ̈ɔ̈ric ke ye paanden ku jɔkï rëër ë riaaŋic të cïn wal.

⁷ Ayek röt mɛc wei në wuöt de yiic awuɔɔu, ku cïn raan lëu keek në luɔi tɔ yen ke ë läi wut bï luui.

⁸ Kur nïïm kek ee ɣäänkɛn ke nyuäth, ye kek köör në ka tɔ̈c yek nyuööth

⁹ Duɛ̈ɛ̈rë thɔn anyaar tɔ luui yïn? Ku duɛ̈ɛ̈rë mac në gendu thok në wɛ̈ɛ̈ric ëbɛ̈n?

¹⁰ Duɛ̈ɛ̈rë mac yeth ë wiën, ku tɔ thel ka ye ke duum puuriic?

¹¹ Ku duɛ̈ɛ̈rë rɔt kan në riɛldïït de, ku jɔ ŋɔ̈ɔ̈th ke ee yen bï luɔi thieekdu looi?

¹² Ye ŋɔ̈ɔ̈th nɔn duëër en kakuön cï tem bɛ̈ɛ̈i, ku kut ke nïïm në yiɛɛudu yic.

¹³ Pialë wuök ke wut aduëër en ke kat, ku acie päär cït man ë jak.

¹⁴ Wut ee dhiëth ku nyiëëŋ toŋke ë tiɔpic, bï atuöc de piny ke lɔ̈ɔ̈k tɔ cil, ku kuemkï röt kapäc.

¹⁵ Akën bɛ takic nɔn duëër ë cök ke dum, ku nɔn ee läi roor kek näk keek.

¹⁶ Ee luui abï ciët ka cie toŋke, ku cïï diɛɛr në keek abïï ciët kë cie yen ë dhiëth keek.

¹⁷ Ee Yɛn aa loi yen ke piɔlpiɔ̈u ku akɛ̈n gäm pɛlënɔm.

¹⁸ Ku na jɔ kɛɛc nhial në kat, ee jöŋgör dɔl guöp kekë raan riŋ në yekɔ̈u.

¹⁹ Jop, ee yïn ë gëm jöŋgöör riɛl ku göldɛn lɔ thiäpthiäp në keyiëth?

²⁰ Cï keek tɔ kac cït man ë gɔt, ku tɔ ke riëëc kɔc në kiɛɛuden?

²¹ Ayek wak kɔ̈ɔ̈thic, të kɔt kek në riɛl ke ke bɛ̈k tɔŋ.

²² Akuckï kë cɔl riɔ̈ɔ̈c, ku acïn abätäu duëër ke puk nïïm.

²³ Wëu ke tɔŋ muk ë kɔc cath në ke kɔ̈ɔ̈th, ayek awuööu pɔ̈l ku lek riauriau.

²⁴ Alɛthë në miɛtëpiɔ̈u, acie kɔ̈ɔ̈c të cïï yen kaaŋ piŋ röl, ee jɔ kat arëët ke lɔ tueŋ.

²⁵ Ee tɔŋ ŋöör ke mec, ku bäny tueŋ ayek rem de tɔŋ kiiu, ku të cïï kaaŋ kooth ke jöŋgöör ë ke jɔ kiɛɛu moc.

²⁶ Ee pɛlënɔmdu yen ë piööc cuɔɔr në päär, të wën yen e wuk peer ke wel enɔm wöuwic?

²⁷ Ye cuɔɔr yï tiit, agut të bï yïn e yɔ̈ɔ̈k, të kɔɔr en bïï ɣönde yïk në kur nïïm?

²⁸ Yen ee ɣönde looi në awiɛn ë kur bär nïïm, ku ëtɛ̈ɛ̈n ee të bï ye kony.

²⁹ Ku ëtɛ̈ɛ̈n abï jɔ daai të mec ku të thiɔ̈k, në kë bïï nɔ̈k ku cuet.

³⁰ Në guup cï thouwiic aye cuɔɔr kenïïm mat thïn, ku jɔ mïth ke cuɔɔr rim dek.