Jop 38 - JAM DE NHIALIC 2011

Bɛ̈nydït Abëër Jam de Jop

¹ Go Nhialic bëër ku lɛ̈k Jop në yomdïït de amaŋic.

² Ye ŋa, kë yïn pɛlënɔmdï luɔp, në kuöc jam?

³ Kääcë na ye moc, ku puk wël bä thiëc yïnë nïïm?

⁴ Ëyï tɔ̈u ënou ɣɔn cak Ɛn pinynɔm? Na de ka ŋic, ke lɛ̈kë ke Yɛn.

⁵ Eeŋa them dït de yen yic? Ku bɛ̈ɛ̈rde yen kɔ̈u? Ŋic? Ë piŋke?

⁶ Eeŋa tɛ̈ɛ̈u cök ke piny, muk piny nhial? Eeŋa muk mën nhial? Mën kɛ̈ɛ̈c aguuk ke piny?

⁷ Në adurduur ɣɔn kiitë kuɛl diɛt ë tök, ku ye wɛ̈ɛ̈t ke Nhialic kiɛɛu de miɛt ë piɔ̈u moc.

⁸ Ku eeŋa thiök athïïn ke wɛ̈ɛ̈r të ye pïïu riŋ piny?

⁹ Ee Yɛn ë kum wɛ̈ɛ̈r nɔm në luäät ku duɔl ë mɔ̈ɔ̈thic.

¹⁰ Yɛn cï pëk de pïïu giit wïïr abïk aa kɔ̈ɔ̈c.

¹¹ Acä kɔn lɛ̈k kiir an, acïn të bï yïn ɣet thïn! Apiöŋ rildu abï kɔ̈ɔ̈c eenë.

¹² Jop de të cï yïn aköl kɔn yɔ̈ɔ̈k në pïïrdu yic bïï rɔt puk ke ye adurduur?

¹³ Cï run ë piny kɔn yɔ̈ɔ̈k bïï piny meer, ke kɔc ee karɛc looi bï ke lath tëdɛn ë thiaan?

¹⁴ Aye waar cï tiɔɔm cï nuaai, ku tïckï ë dhek cït guɛɛt de lupɔɔ de kïït.

¹⁵ Aköl ee ɣɛɛr aläl, ka ee kɔc ee karɛc looi pɛ̈n luɔi ye kek kɔc luöi tɔɔŋ.

¹⁶ Cï kɔn tɔ̈u në awaŋ de kïr thar piny, abä ka cï thiaan wïïr yök?

¹⁷ De raan cï yï kɔn nyuöth athïn ë ɣön colic ë paan ë thuɔɔu?

¹⁸ Dɛ nɔm täŋ duëër yïn wo lɛ̈k dït de pinynɔm? Dɔ̈kë nɔm ɛn të ŋic yïn en.

¹⁹ Ŋic ye ɣɛɛr bɛ̈n ënou ku ye mɔ̈ɔ̈th bɛ̈n ënou?

²⁰ Duɛ̈ɛ̈rë nyuöth keek ee tënou, duëër kek ɣet ku lekï kenïïm puk.

²¹ Aŋäth nɔn duëër yïn e lëu, në biäk ee yïn raan cï nyin ŋuɛ̈ɛ̈n ku yïn aa tɔ̈u të wään ciɛkë piny

²² De të cï yïn kɔn keny ɣön wën yan pïïu cï rɔ̈k, ku pïïu ke kɔi tɔ̈ɔ̈u thïn?

²³ Aya keek tɔ̈ɔ̈u tiɛɛt ɛn ke nuan, ku akööl ke thɔ̈ɔ̈r, ku tɔɔŋ.

²⁴ Cï kɔn lɔ të wën ye aköl bɛ̈n thïn, ku nɔn yen të wën ee yom de aköl amiäk puɔ̈t thïn?

²⁵ Eeŋa ë wec nyin ee pïïu ke deŋ wuöl, ku kuɛɛr dït ke määr ë deŋ de amaŋ?

²⁶ Eeŋa ye deŋ tɔ tueny të cïn raan ceŋ en, tɔ tueny ë jɔ̈ɔ̈ric të cïn raan rɛ̈ɛ̈r thïn.

²⁷ Eeŋa ee piny cï riɛl piɔɔk ë pïïu, ayï piny cï yal ago wal cil?

²⁸ De deŋ wun kekë thɛ̈c?

²⁹ Ku eeŋa ee man pïïu cï rɔ̈k ayï deŋ ë kɔi?

³⁰ Eeŋa, Raan ee pïïu tɔ puk röt ke ke ye kɔi abïk riɛl në liɛɛr ë piny wïïr?

³¹ Duɛ̈ɛ̈rë amatnɔm de kuɛl lɔyok duöt, ku nɔn duɛ̈ɛ̈rë amatnɔm de ciëër ë run ë piny dɔ̈k.

³² Duɛ̈ɛ̈rë kuɛl amäi ku nɔn ye kek kuɛl aruɛ̈l tiit, ku nyuööthë kuɛl dït ku jɔ ya kuɛl thii cɔlke yï Dipper?

³³ Ŋic lööŋ mɛcë ke tënhial, ku duɛ̈ɛ̈rë lööŋkë tɔ lui në piny nɔm ëtënë?

³⁴ Duɛ̈ɛ̈rë yï röl jɔ̈t luäät, ke pïïu ke amool ë ke lɔ yï kuöm piny?

³⁵ Na duɛ̈ɛ̈rë wilëdeŋ yɔ̈ɔ̈k bï lɔ biliny, ku be yï bɛ̈n luɔp an bɛ ŋö looi?

³⁶ Eeŋa tɔ luäät ŋic luɔi bï kek deŋ aa tɔ tueny, ku tɔ ruu ŋic luɔi yen rɔt jɔt.

³⁷ Eeŋa pelnɔm duëër luät kueen, ku welke thook piny ke deŋ bï tuɛny?

³⁸ Deŋ wën ee abuui tɔ ril ku jɔ tiɔp rɔt dɔm.

³⁹ Duɛ̈ɛ̈rë kɔ̈ɔ̈r miɔɔc në kacaam abïk cam abï aduur ke kɔ̈ɔ̈r kuɛth?

⁴⁰ Të cïï kek thiaan në pɔ̈lken yiic, ku nɔn cïk tɔ̈c ke ke tït në duökeniic.

⁴¹ Eeŋa ee gɛk tiëŋ këcamkï, të jɔ kek piny kuany ke ke nɛ̈k cɔk, ku dhiëëu mïthken këcam tëde Yɛn?