Jop 36 - JAM DE NHIALIC 2011

¹ Go Eliɣu ŋoot ke jam an:

² “Pälë rɔt piny në kaam bäär ë määth, ke yï bä lɛ̈k kë kɔɔr bä piŋ tëde Nhialic.

³ Yïn bä nyuöth dït ë pɛlënɔmdï ku gäm piathëpiɔ̈u Aciëŋdï raan ŋic guïïr.

⁴ Acïn kë lɛ̈k yïn ke ee lueth. raan cï dikëdik në pɛlënɔm atɔ̈u ke yïn.

⁵ Acïn këril cït Nhialic, acïn raan ee dhɔɔt guöp, acïn kë cï ee yökic.

⁶ Nhialic acïï kɔc ee karɛc looi ee pɔ̈l apïïr, ku Yen anande ee löŋ de kɔc kuanynyïïn ŋiëc guiir.

⁷ Yen ee kɔc piɛth piɔ̈ɔ̈th gël, ku tɔ ke nyuc në thööny nɔm ë meliik ku tɔ ke riëëuwë ananden.

⁸ Ku na cï kɔc rek në kuat, gumkï në biäk de kë cïk looi.

⁹ Aye Nhialic ke nyuöth awɛ̈ɛ̈cken ku lɛc ë rɔtden.

¹⁰ Ka bïï ke tɔ piŋ jänyde bïk, mɔ̈l në luɔi de karɛc.

¹¹ Na yek Nhialic riëëu ku luuikï, ka bïk pïïrden thöl ëbɛ̈n në mätic ku kuɛth.

¹² Ku na cie yeka, ka bïk thou ke ke ye aɣäŋ tɛ̈më ke nyin ke ke lɔ paan ë thuɔɔu.

¹³ Kɔc kuc Nhialic ayek gäk ke ke göth, ku na cak ke kuum ka cïkï Nhialic ee lɔ̈ŋ në kuɔɔny.

¹⁴ Ayek thou ke ke ŋoot ke ke kor, thöl pïïrden thok në kak ayäär.

¹⁵ Ku Nhialic ee kɔc piɔ̈ɔ̈c në kueer ë guöm, ku looi ë yaaŋ ke ke bï ke nyïïn liep.

¹⁶ Nhialic ë yï bɛ̈ɛ̈i bei në nuɛɛniic, ku tɔ yïn mit piɔ̈u në mätic, ku cï dhiëndu thar thɔc në kacaam.

¹⁷ Ku ënɔɔnë yïn gɛ̈më kuöm rɔ̈ŋ ke awänydu,

¹⁸ kiɛmë yï nɔm piny, du kumthok tɔ met yïn, ku nɔn ee juëc de käŋ yen mär yïn.

¹⁹ Acïn këpiɛth bïï dhiëëu luöi yïn, të dhiëëu yïn kuɔɔny ë riɛldu ëbɛ̈n aacï yï bï kony ënɔɔnë.

²⁰ Du cuɔlëpiny ee nhiaar, thaar ye mɛnh ë raan nyaai nyin.

²¹ Jɔ yï nɔm kiɛm piny du kërac loi, tɔ̈ɔ̈kdu aa tuucë ke bï yï gël në Yen.

²² Tak yï nɔm në riɛldïït ë Nhialic, Yen ee Bɛ̈nydïït ee kɔc wɛ̈ɛ̈t kedhie.

²³ Acïn raan duëër Nhialic lɛ̈k ke bïï looi, ku nɔn gɛɛny në kërɛɛc cï looi.

²⁴ Yen aye piɔɔny anande në kë ye looi, ka yïn ayadäŋ abä dhil piɔɔny.

²⁵ Acïï raan ëbɛ̈n tïŋ yen kë cï looi, ku ayok woi tei tëmec arëët.

²⁶ Wok cïï dït de duëër ŋic ëgɔk, ku nɔn kuenku runke.

²⁷ Ee Yen Nhialic raan ee pïïu jɔt piny, ku lee ke puk ke ke ye pïïu thuat ke ye deŋ.

²⁸ Yen ee deŋ tɔ wɛ̈l pïïu piny në luäätiic, ku piɔɔk mɛnhë raan ëbɛ̈n.

²⁹ Acïn raan ŋic cäth ë luäät, ku nɔn ee rel ë deŋ të cieŋ Nhialic.

³⁰ Ee wilde tɔ pɛ̈ɛ̈k tënhial ëbɛ̈n, ku dɔ̈ŋ të thuuth tɔ̈u wɛ̈ɛ̈r thar piny ke col.

³¹ Yen luɔi yen kɔc kuum, ku gëm ke këcam dït.

³² Yen ee mac kuök në Ye cin, ku cuɛt të tooc en e thïn

³³ Rel ë deŋ aciɛɛl ɣëët de amaŋ, ku aŋic ë ɣɔ̈k nɔn bï yen.