Jop 35 - JAM DE NHIALIC 2011

¹ Go Eliɣu lueel an:

² “Acie yic Jop, bä lueel nɔn cïn yïn guöp awäc në Nhialic nɔm,

³ ku ŋuɔɔtë ke yï lop an, “Eeŋö ye piath de pïïr adöt, eeŋö bï yiɛ̈n ɛn?”

⁴ Yɛn bï këdu bɛ̈ɛ̈r ku lɔ määthku aya.

⁵ Woi tënhial! Tïŋ luäät mɛcden!

⁶ Na loi awäc acïn kë bïï luöi Nhialic. Të looi yïn kërac, ku be looi de kë duëër riɔ̈ɔ̈k tëde Yen?

⁷ Ye Nhialic kony, në luɔi cïï yïn aa raan adöt? Acïn kë kɔɔr ë Nhialic tëde yïn.

⁸ Ee kɔc cït man ë yïn kek abï gum në biäk de karɛc, ku piathëpiɔ̈ndu ee mɛnh ë raan kony.

⁹ Na cï kɔc miɛn ayek teer, ke ke dhiëëu raan bï ke luök

¹⁰ Ku cïkï röt puk Nhialic Aciëŋden, Raan ee ke tɔ ŋäth në akööl ke nuandït.

¹¹ Acïk röt ee pɔ̈k Nhialic, Raan ee wo tɔ pelnïïm, pɛlënɔm wäär wek läi ëbɛ̈n ayï diɛt.

¹² Ayek kuɔɔny dhiëëu, ku cï Nhialic këden bëër, në biäk ye kek kɔc ee röt leec ku yek karɛc looi.

¹³ Acïn naamde yen dhiëëu tëde keek, acïï Nhialic Awärjäŋ ke bï tïŋ ku nɔn piŋ keek.

¹⁴ Na Jop, ye lueel an cï Nhialic duëër tïŋ, pälë rɔt piny ke yï tit göönydu në Yenɔm.

¹⁵ Aye tak an Nhialic cïï kɔc ee kuum, nɔn Yen e yïth päl piny ë määth në biäk de karɛc.

¹⁶ Acïn naamde të ŋoot yïn ke yï kuc kë luel.