Jop 34 - JAM DE NHIALIC 2011

¹ Go Eliɣu lueel an:

² piɛŋkï wëlkï, wek röör pelnïïm, ku piɛŋkï kë luɛɛl, wek kɔc ŋic käŋ.

³ Wek ee kuïn mit ŋic të cä wek e thiëëp, ku wek cïï wël piɛŋkï ee them na yek kake pɛlënɔm.

⁴ Ee nɔmda buk tök lɔc në kaam de këpiɛth ke kërac.

⁵ Jop aye lueel an cïn guöp awäc ka Nhialic ajai bï gäm yic.

⁶ Yɛn cïn guöp awäc, ku ayek a cɔɔl an raan ë wël töör. Tɔ̈ɔ̈kdï acï dem të cak ɛn guöp ciën awäc.

⁷ De raan töŋ cä yök cït ë raan cɔl Jopë. Yen acïn riëëu ee nyuöth Nhialic.

⁸ Yen anhiaar amatnɔm de kɔc ee karɛc looi, ku ye cath ke keek.

⁹ Arëk aye lueel an, ee këpiɛɛth ŋö, duëër ë raan yök të ciɛkë raan kë de piɔ̈n ë Nhialic looi?

¹⁰ Piɛŋkï kë luɛɛl wek kɔc ee ye tak an yak käŋ yökiic! Bï Nhialic Awärjäŋ kë cie yic looi?

¹¹ Yen, ee kɔc gäm ariöpde kë yek looi, ku lui keek kë röŋ ke keek.

¹² Nhialic Awärjäŋ acie luui në kërac, yen acïn raan ye luöi kërac.

¹³ Ë Nhialic yök riɛlde tëde raandäŋ? De raan ë tɛ̈ɛ̈u En ke ye Bɛ̈ny ë pinynɔm?

¹⁴ Na cï Nhialic wëike pïïr dɔk nïïm,

¹⁵ ke raan pïïr ë bɛ̈n abï thou, ku abï rɔt bɛ dak abuui yic.

¹⁶ Ënɔɔnë jɔ ke luɛɛl piŋ, na pelënɔm,

¹⁷ ye Nhialic adöt yiëk yeth gääk? Ye tak mɛɛn yicde raan däŋ?

¹⁸ Nhialic ee bäny ku meliik yiëk yiëth gääk të cï kek ciën thaarden, ku nɔn yek karɛc looi.

¹⁹ Yen acïï rɔt ee mät bäny ku nɔn nhiɛɛr kɔc kueth, ku mäl kɔc kuanynyïïn, Yen aa cak raan ëbɛ̈n.

²⁰ Raan aduëër thou wakɔ̈u ëthiäu. Nhialic ee raan yuöp piny ku riëër nyin, Yen ee raan ril nɔ̈k ke cïn raan kony en.

²¹ Yen ee të le raan thïn ëbɛ̈n woi.

²² Acïn mɔ̈ɔ̈th cool dït duëër raan ee karɛc looi thiaan në Nhialic.

²³ Nhialic acïn kööldɛn ee tääu piny, bï kɔc lɔ ku bï ke lɔ kuum në Yen.

²⁴ Yen acie köör ë raan bïï luɔp, ku bï bäny jɔ nyaai ku tɛ̈ɛ̈u kɔ̈k në nyïïnkeniic.

²⁵ Në biäk ŋic En kë yek looi, aye ke wit ku dhoŋ ke piny wakɔ̈u.

²⁶ Yen ee kɔc ee karɛc looi kuum, ke ke woi raan ëbɛ̈n.

²⁷ Në biäk cï kek mɔ̈l ke cïkï be kuany cök, ku yekï jamde dhɔɔtic.

²⁸ Ayek kɔc kuanynyïïn tɔ yïn dhiëëu Nhialic, ku Yen ee cɔ̈tdɛn kɔɔr kek kuɔny piŋ.

²⁹ Na cïï Nhialic lueel bïï ciën kë looi taitai, acïn raan duëër En yiëk yeth gääk. Të wel En enyin wei në raan nɔn ee jur aduëër ciën riɛl.

³⁰ Abï ciën kë bï wuöt looi, bï kɔc kuc Nhialic ee kɔc miɛn pën kuöm kuum kek keek.

³¹ Jop cï awɛ̈ɛ̈cku pɔ̈l në Nhialic nɔm, ku cä lueel nɔn cï yïn ke bï bɛ nyɔk në luɔi?

³² Cï Nhialic thiëëc bï yï nyuöth awɛ̈ɛ̈cku, ku cï gam nɔn bï yïn mɔ̈l në luɔi de karɛc?

³³ Cït man cï yïn kë cïï Nhialic looi rɛɛc, cïï duëër ŋɔ̈ɔ̈th luɔi bï Yen yïn luöi kë kɔɔr? Ee yïn abï kë ye tak lueel acie yɛn, ka yen lɛ̈kë wook kë ŋic.

³⁴ Raan tiëër nɔm ëbɛ̈n abï gam ë yic, ku raan pelnɔm ëbɛ̈n cï ya piŋ abïï lueel an,

³⁵ Jop ajam në wël cïn yiic ŋïnydekäŋ, acïnkï yiic pɛlënɔm.

³⁶ Tak këriëëc cï Jop lueel ëbɛ̈n, abä yök ke jam cï raan ee kërac looi

³⁷ Aa awɛ̈ɛ̈cke ŋuak nyïïn në reec reec en Nhialic në wonïïm wodhie ee Nhialic bui guöp.