Jop 33 - JAM DE NHIALIC 2011

¹ Ku ënɔɔnë Jop piŋ jam bä lueel ëbɛ̈n apiɛth.

² Yɛn cï rɔt guiir bä kë tɔ̈u në yapiɔ̈u ëbɛ̈n lueel.

³ Wëlkï kedhie ayek kake piathëpiɔ̈u ku yɛn ee jam në yic.

⁴ Wëidït ke Nhialic Awärjäŋ acïk ya looi ku gëmkï ya pïïr.

⁵ Yïn duëër këdï bɛ̈ɛ̈r të bï yïn e lëu ku kiëëtë teerdu.

⁶ Yïn we yɛn wok kït në Nhialic nyin wodhie, wok aa cak në tiɔp.

⁷ Ka yïn cïn kë riɔ̈ɔ̈c yïn në yɛn, yïn cä bï miɛn në riɛl.

⁸ Ënɔɔnë yen kë cä piŋ ke lueel kï:

⁹ Yɛn kën wäc, acïn kërɛɛc cä looi, yɛn lɔ wai, ku ciën guöp gääk, yɛn cïn këdï yic thïn wok awɛ̈ɛ̈c.

¹⁰ Ku Nhialic acï gööny gɔɔnyë ke yɛn yök bï Yen a mak, ku looi ya cï raan ater.

¹¹ Ee ya rek cök në kuat, ku jɔ yɛn aa woi të wuöök ɛn rɔt.

¹² Ku alɛ̈k yïn, Jop an, acï wööc, Nhialic adït në raan ëbɛ̈n.

¹³ Eeŋö yïn Nhialic gaany an, cïï ka gɔɔnyë mɛnh ë raan En ee bɛ̈ɛ̈r?

¹⁴ Na cak Nhialic jam ku be jam ka cïn raan ee kë lueel piŋ.

¹⁵ Wakɔ̈u të niin raan ëbɛ̈n Nhialic ee jam ke kɔc në nyuöth ku nyuuthic.

¹⁶ Yen aye ke tɔ piŋ kë lueel, ku ayek riɔ̈ɔ̈c në jamdɛn kithic.

¹⁷ Nhialic ee jam ago ke tɔ päl luɔidɛn awɛ̈ɛ̈c, ku gël keek ke ke cï bï aa kɔc ee röt leec.

¹⁸ Acï keek bï tɔ riääk, akony ke në thuɔɔu guöpde.

¹⁹ Nhialic ee raan kiɛm piny në luɔi tuc en e jɔk ku thiëëŋ guöpde në arɛɛm.

²⁰ Raan tök ee piɔ̈u cïn cäm, na cakaa këcam mit ke cïn këde yic thïn ke ye.

²¹ Guöpde ee thök abï liu ee yom kek ee tïc yeguöp ëbɛ̈n.

²² Yen duëër yen aa lɔ paan ë thuɔɔu,

²³ ku nɔn duëër tunynhial guɔ bɛ̈n ke kony en, töŋ de aguum ke tuuc ke Nhialic, ee kɔc täk nïïm në luɔiden.

²⁴ Në kok de piɔ̈u abï tunynhial lueel an, “Lony! Yen acï bï lɔ paan ë thuɔɔu, kënë yen ee kë cï ye wɛ̈ɛ̈r bei gëmë nɔm lääu.

²⁵ Guöpde abï dhuöök ku nyɔk riɛl.

²⁶ Ku na lɛ̈ŋ ke lɔ̈ŋde aye Nhialic piŋ, yen ee Bɛ̈nydït lɔ̈ŋ në miɛt ë piɔ̈u, abï käŋ bɛ kiɛm piny në biäkde.

²⁷ Yen abï lueel në kɔc nïïm an, yɛn cï wäc acïn yic cä looi, ku akënë ë Nhialic kuɛ̈n ɛn.

²⁸ Apën ɛn lɔ paan ë thuɔɔu, ku yɛn ŋoot ke ya pïïr.

²⁹ Nhialic ee kënë looi ku looi kënë,

³⁰ ee wëi ke raan gël, ku gëm pïïr mit en piɔ̈u.

³¹ Ënɔɔnë Jop piŋ kë luɛɛl, ke yï pɛ̈l rɔt piny ku tɔ ya jam.

³² Ku na de këduön bä lueel, ke tɔ piɛŋ ku yïn bä gam yic.

³³ Ku na cie yen ke yï mim ku piŋ kë luɛɛl, yïn bä wɛ̈ɛ̈t në kueer bï yïn nɔm pɛl.