Jop 32 - JAM DE NHIALIC 2011

Bëër de Eliɣu

¹ Go kɔckë kadiäk mɔ̈l ke ke cïï wël ke Jop be bɛ̈ɛ̈r, në kë yen rɔt tïŋ ke cïn guöp awäc.

² Ku jɔ Eliɣu wën ë Barakel, raan de Buth në baai de Ram gɔ̈th aläl ke Jop në këdɛn lueel an, cïn guöp awäc ku gɛ̈k Nhialic,

³ ku göth ayadäŋ ke math ke Jop kadiäk, në luɔi kën kek bëër lɔ gɔk yök, bëër kek wël ke Jop ku ŋoot ke yek lueel an, de guöp awäc.

⁴ Ku Eliɣu aaye wën koor në keyiic, yen aa tïït en bïï röördït kɔn thök ë jam.

⁵ Na wën acï ŋic nɔn kënë wäthii kadiäk wël ke Jop ŋiëc bɛ̈ɛ̈r, ke jɔ gɔ̈th,

⁶ Go ë Eliɣu wën de Barakel raan de Budh bɛ̈ɛ̈r lueel an, “Yɛn koor në week, ku kënë yen aa riääc ɛn guöp bä we lɛ̈k kë ŋiɛc.

Bëër de Eliɣu

⁷ Aa ya tak nɔn ye röördït jam në pɛlënɔm.

⁸ Ku ee wëi ke Nhialic Awärjäŋ kek ee bɛ̈n ë mɛnh ë raanic, ku yek yen gäm pɛlënɔm.

⁹ Acie kɔc cï dït kek ee nïïm pɛl, ku cie dhiɔɔp yen ee kɔc tɔ yök käŋiic ka ye yith.

¹⁰ Në biäk de ye kënë aa luɛɛl an, piɛŋkï yɛn, bä kë ŋiɛc lueel aya.

¹¹ Yɛn cï rɔt päl piny ke ya pïŋ, të wën la wek ke we jam, ku tiɛɛt wël ke pɛlënɔm kaarkï bäk ke lueel.

¹² Ku rɛ̈ɛ̈r ke ya cï yayïc këët ku acïn raan në weyiic cï Jop lëu abï tɔ gäk rɔt në kë cï lueel.

¹³ Duökï be lueel an, wok cï pɛlënɔm yök. Ee Nhialic Yen abï këde lëu, acie raan.

¹⁴ Wëlkë, aa cïï Jop ke lëk ɛn, ku yɛn cïï duëër bëër në ee bëërduönë.

¹⁵ Acï jam ke dhal ku acïn kë cï döŋ bïk bɛ lɛ̈k yïn.

¹⁶ Ku bä jɔ tïït agut cï nɛn, ku akɛ̈ɛ̈ckï ëtɛ̈ɛ̈n ke ke mim ku cïn däŋ bekï lueel?

¹⁷ Ei, yɛn guöpdï, yɛn bï bëër ënɔn thiinë ku lɛ̈k we kë ŋiɛc.

¹⁸ Yɛn ë piɔ̈u thiäŋ arëët wokë kë duɛ̈ɛ̈r lueel, ku wëi rɛ̈ɛ̈r ë yɛn kek amuk a piny.

¹⁹ Ku tiëŋkï na kɛ̈n jam, yɛn duëër piɔ̈u rɛt cï atheep ke mɔ̈u thiäŋ ë mɔ̈n ë piacë tup.

²⁰ Acä duëër guum yɛn bï dhil jam.

²¹ Yɛn cïn tuuŋ bän rɔt mät en në ee teerë yic, ku cïn raan bä math nyin.

²² Në biäk kuöc ɛn mɛth ë kɔc nyïïn, ku Nhialic abï ya dap kuum të lan e looi.