Jop 31 - JAM DE NHIALIC 2011

¹ Yɛn cï gutguut lueel cïn nyan dhueny bä woi në yapiɔ̈u,

² ku eeŋö ye Nhialic Awärjäŋ luöi kɔc, ke ye ariöpden?

³ Ee kɔc ee karɛc looi tuöc riääk.

⁴ Ku Yen ee të le yɛn thïn woi, ku ŋic kaam yan ke tëëk thïn ëbɛ̈n.

^5-6 Adï jɔ Nhialic a them në thëm piɛth, ke bïï ŋic nɔn yan raan cïn guöp awäc. Acïn luenh cä kɔn töör, ku kɛ̈n kɔc kɔn math.

⁷ Na cï cökkï röt yal wei kueer, ku cï piɔ̈ndï kë cïï nyindï tïŋ biɔɔth, ku ye ciindï kërac looi,

⁸ ke kakiën cä com arɔ̈ŋ bï ke cam në kɔc kɔ̈k ku nɔn riëëkkï.

⁹ Të ë piɔ̈ndï cï lɔ në tiiŋ lei guöp, abä tiit ke ya cï thiaan në ɣönde kut,

¹⁰ ke arɔ̈ŋ duëërë tiiŋdï jɔt le mony däŋ thät, ku le tääc në biök ke röör kɔ̈k nïïm,

¹¹ ku ee kënë, aduëër aa gök de awäny rac rɔ̈ŋ ke kuöm,

¹² acït manydït ee käŋ thöl, aduëër a riɔ̈ɔ̈k wo këriëëcdiën tɔ̈u ke yɛn ëbɛ̈n.

¹³ Na ë ya cï nyan lui ku nɔn yen mony lui ke yɛn pɛ̈n yinyde, të gööny en ke yɛn,

¹⁴ ke ya duëër lɔ në Nhialic nɔm adï? Duɛ̈ɛ̈r bɛ̈ɛ̈r adï të le Yen a bɛ̈n tïŋ?

¹⁵ Ee Yen aa cak ɛn ku ciɛk keek.

¹⁶ Na ë ya cï kɔc kuanynyïïn pɛ̈n ka kɔɔrkï, ku ta diäär abɛɛr jël në kecin ke ke cï nïïm mum,

¹⁷ ku nɔn cä thaac në kuïn nɔm atök ku nyäŋ mïth abɛɛr,

¹⁸ gɔl në kaam ɣɔn yan dhuk, yɛn ee diäär abɛɛr kony.

¹⁹ Na de raan kuany nyin ë cä tïŋ ke nuɛɛn ë këde ciën lupɔɔ ku kë kum en,

²⁰ na kën piɔ̈nde ya thieei, ku kën guöp tuöc në lupɔɔ ë cuëc në nhïm ke thökkï. Ka duëër a leec në piɔ̈nde ëbɛ̈n.

²¹ Ku na ë ya cï a cin jɔ̈t mïth abɛɛr, ku ŋääth nɔn bän ke lɔ tiaam wutic cil tëde gööny,

²² ke arɔ̈ŋ duëër köŋdï thok puut bei në thuŋde yic ë ya aŋok, lööny piny,

²³ në biäk ë riëëc riäŋ de Nhialic ɛn, yɛn cïï dïtde duëër këu.

²⁴ Na ë ya cï aŋäthdï tääu në adhääp kɔ̈u,

²⁵ ku na ë ya cï piɔ̈u miɛt në luɔi de yɛn kajuëc ku dɛ këriëëc ëbɛ̈n,

²⁶ ku na ë ya cï a cin täär akɔ̈l, ku nɔn ee pɛɛi në läkdïïtde,

²⁷ ku na ë ke cï piɔ̈ndï meet në cuëër nyuöth ke riëëuden,

²⁸ ke kënë, aya aduëër agök de awäny rɔ̈ŋ ke kuöm, në luɔi ë duɛ̈ɛ̈r ɛn Awärjäŋ tɔ̈ɔ̈r lueth.

²⁹ Na ë ya cï piɔ̈u miɛt në riäŋ de raan man ɛn, ku nɔn mɔ̈k a nɔm nhial të cïï kërac e yök,

³⁰ ke yen, liemdï akën kɔn wäc bä läm aciɛɛn,

³¹ ku na kën kɔc ke baaidï e lueel an, eeŋa kën kɔn kuɛth në kuïn eenë?

³² Ɣöndï aɣɔ̈ɔ̈r thok në biäk de kamaan, ku kɛ̈n ke kɔn tɔ nin biic.

³³ Na ë ya cï awänydiën rɛ̈ɛ̈r ke yɛn moony cït kɔc kɔ̈k,

³⁴ në biäk cän riɔ̈ɔ̈c në kë bïï kɔc lueel, ku nɔn bï kɔc ke wunda ya geet guöp, aguɔ mim ku rɛ̈ɛ̈r baai ke ya cïï lɔ biic.

³⁵ Ee raannou bï këdiën luɛɛl piŋ? Yɛn ë kuëëŋ, adï jɔ Nhialic Awärjäŋ këdï bɛ̈ɛ̈r. Ku adï jɔ dɛk awerek gɔɔnyë yɛn në raan aterdï.

³⁶ Aduɛ̈ɛ̈r kaar ë yakɔ̈u ku cieŋ ë yanɔm ke cït göl.

³⁷ Yɛn duëër ɣëët ë Yelɔ̈ɔ̈m ke ya laath cï bɛ̈ny ku lɛ̈k këriëëc ëbɛ̈n cä looi.

³⁸ Na ë ya cï pinydiën ya puur tɔ dhiëëu yinyde,

³⁹ ku cam ka ye luɔk thïn ke cïn kë tääu piny, ku ta kɔc de ye thou,

⁴⁰ ke arɔ̈ŋ duëër thil cil domic ke cie agamɔ ku tɔ wal cil në nyin de barli yic. Na wën acï Jop thök ë jam, ke jɔ mim.