Jop 29 - JAM DE NHIALIC 2011

Bëër Ciëën de Jop

¹ Go Jop ŋoot ke jam, lueel an:

² “Adï ja ciët akööl ɣɔn ee Nhialic a tiit.

³ Ɣɔn ye ɣɛɛrde ya meer, ku riɛɛu ɛn të cath ɛn ë mɔ̈ɔ̈thic,

⁴ cït man wään ruël de yɛn ciin käŋ, ku piɛth kaamdï wo Nhialic,

⁵ ɣɔn ŋoot Nhialic Awärjäŋ ke tɔ̈u ke yɛn, ku nu mïthkï në yalɔ̈ɔ̈m,

⁶ të ɣɔn ye awuulkiën ke dëk wat ë ca, ku ye tiɔɔmdï kuëër në miök,

⁷ të le yɛn të ye röördït mat, ku nääm këdiën ë rëër,

⁸ ke dhuök ayek a tïŋ ku pɛ̈tkï yɛn, ku jɔt röördït röt, nyoothkï riëëudɛn riëëu kek ɛn,

^9-10 ku bäny ku röördït ayek jamden pɔ̈l ku lek thook lik.

¹¹ Raan ëbɛ̈n cï a tïŋ ku nɔn cï piŋ në këdï ee ya thieei ku nyoothkï miɛt ë piɔ̈nden,

¹² në biäk ë yan kɔc kuanynyïïn dhiau kony, ku mïth abɛɛr cïn të ye kek kenïïm wɛl thïn,

¹³ ku thiei raan ë lɔ poth ë thuɔɔu thok ɛn, ku ta diäär abɛɛr kët në miɛt ë piɔ̈u.

¹⁴ Yɛn ceŋ piathëpiɔ̈u ku acï yɔ kuöm piny, ku yicdï acït lupɔ kekë göl ë yanɔm,

¹⁵ yɛn aaye nyin de cɔɔr, ku ya cöök de aduany,

¹⁶ yɛn aaye wun kɔc kuanynyïïn, ayï kɔc kuöc yɛn aaye göönyden tïŋ.

¹⁷ Yɛn cï kɔc ke akuöörkuöör dhuööŋ cin, ku gäm kɔc yɔŋkï nɔm lääu.

¹⁸ Aa ya ŋɔ̈ɔ̈th nɔn bän pïïrdï thöl thok abä dhiɔp, ku ja thou në thon ë biöökic,

¹⁹ yɛn aa cït tim cïï meike ɣet piny të de pïïu, ku cï apämde thiäŋ në thɛ̈c.

²⁰ Yɛn aaye riëëu në raan ëbɛ̈n, ku kën riɛldï a päl wei.

²¹ Të jääm ɛn kɔc, ayek röt päl piny ku piŋkï kë luɛɛl,

²² acïn däŋ yek mat thïn, wëlkï acïk bɛ̈n lööny në kepiɔ̈ɔ̈th.

²³ Aake tit ɛn cït kɔc tit deŋ, ku liepkï kethook cï kɔc tit deŋ yaak.

²⁴ Yɛn cï ŋeek ku akënkï bɛ̈n gam ku miɛt ë piɔ̈u cïk tiëŋ në ya nyin ë keek bɛ̈n riit piɔ̈ɔ̈th.

²⁵ Të bïk cök aa ya nyooth, ku nyuööc ke ya ye bɛ̈nyden, ku rɛ̈ɛ̈r në keyiic cït bɛ̈ny ë rem de tɔŋ ku ya kɔc dhiau riit piɔ̈ɔ̈th.