Jop 28 - JAM DE NHIALIC 2011

Piɔ̈ny de Pɛlënɔm

¹ Ee yic ade ɣään nu ë tiɔpic ya ye atek wec, ku të ye adhɛ̈p lëëŋ.

² Wëëth aye yök në tiɔpic, ku maläŋ aye lëëŋ në kuuric.

³ Raan ee mɔ̈ɔ̈thdït lɔ cɔ̈t nyaai. Ku ɣeet piny thar tëmec, ke wec kuuric tëcol.

⁴ Ayek piny wec tëmec kën ë mɛnh ë raan kɔn cuööp, ayek luui kapäc, ayek röt luai piny në wïïn.

⁵ Tiɔp aye këcam bɛ̈n bei thïn, ku piny thar ya ee ciët kë de many thööcë.

⁶ Kɔike ayek yic dɛk jonh läk, ku abuuide aye wiiu kɔ̈u adhääp.

⁷ Acïn nyin ë lith kekë cuɔɔr cï ee kueerë kɔn tïŋ.

⁸ Acïn köör ayï läi rac nïïm cï kɔn cath thïn.

⁹ Kɔc ayek kuur ril ë tör wec thar piny, abïk bɛ̈ɛ̈i thar bei.

¹⁰ Ayek kuur wec abïk thuuric, ku yökkï kapiɛth tuc ë ɣööcden.

¹¹ Ayek awɛɛŋ nu piny thiöök nyïïn ke ke cïï bï kuëër, ku wëckï lek kë cï thiaan bɛ̈ɛ̈i tëɣer.

¹² Ku ee të nou duëërë pɛlënɔm yök, ee të nou duëër wok wëët në yöŋ de käŋiic?

¹³ Acïn raan ŋic piathde, ku acïï duëërë yök tëde kɔc cieŋ piny nɔm.

¹⁴ Aye abäpdit ku wɛ̈ɛ̈r thuth lueel an, aliu ke wook.

¹⁵ Atek ayï adhɛ̈p acïkï kuënde lëu.

¹⁶ Adhäm lɔ kïr kekë waŋguur ke onik acïï duëër aa ɣööcde.

¹⁷ Yen apiɛth awär gul loi adhääp ku nɔn yen acidhanh lɛ̈k tuc ë ɣööcde.

¹⁸ Kuën de pɛlënɔm awär ɣööc de waŋguur cï guel ë kuruthalo.

¹⁹ Kur ë topadh lɛ̈k ke Kuc ku jɔ ya adhäm awai, acïï ke duëërë thööŋ në yen.

²⁰ Ka jɔ aa të nou ye pɛlënɔm bɛ̈n, ku wëët ë yöŋ de käŋiic?

²¹ Acïn töŋ de ka cï cak duëër e tïŋ, cakaa din ee päär nhial.

²² Riääk kekë paan ë thuɔɔu ayek lueel an, ayok piŋ rin.

²³ Nhialic yetök Yen aŋic kueerde, ku të duëërë ye yök,

²⁴ në biäk Yen të le piny thar guut tïŋ, ku woi kë nu ë piny thar ëbɛ̈n.

²⁵ Ɣɔn cï Yen yom gäm riɛl ku giit pëk de pïïu,

²⁶ ɣɔn cï Yen löŋ tääu piny në të bï deŋ aa tuɛny, ku kueer bï määr ë deŋ acath kekë wilde,

²⁷ ku ëtɛ̈ɛ̈n ke tïŋ ku jɔ kɔɔric ke jɔ gam ku ciɛɛl.

²⁸ Go lɛ̈k mɛnh ë raan an: “Riëëu de Bɛ̈nydït ee yen ee pɛlënɔm, ku pɔ̈kdu wekë luɔi de kërac ee yen ee yöŋ de käŋiic.”