Jop 26 - JAM DE NHIALIC 2011

Bëër ë Jop

¹ Go Jop bɛ̈ɛ̈r, lueel an:

² Ë jɔ kuɔny adï yen raan cïn nɔm riɛl, ayï cinkɛn cïn kë lëukï!

³ Eeŋö cï yïn e jɔ ŋiëc jääm aya, në wël juëc piɛthkë, yen raan dɛk ë pɛlënɔm!

⁴ Eeŋa ë kony yïn? Ku thiëëŋ yïn në wëi abä ee wëlkë aa lueel?

⁵ Wëi ke kɔc cï thou alɛthë ke paan ë thuɔɔu në pïïu nu piny thar ya.

⁶ Paan ë thuɔɔu aɣɔ̈ɔ̈r nɔm tëde Nhialic, Abadon acïn nɔm akum,

⁷ acï tënhial ku nöök të ɣɔ̈ɔ̈r ku cïn kë thïïr en të piny,

⁸ ee piääu thiääŋ në luäätiic, abïk thiɛk ke cïï yic dhiäi,

⁹ ee thönyde kuöm piny, thieth luäät në yenɔm,

¹⁰ acï aken ë ɣɛɛr kekë mɔ̈ɔ̈th tɔ̈u në piny nɔm biäk tui giit,

¹¹ Të cï Yen mën ke tënhial jɔ̈ɔ̈ny aye ke lath në riɔ̈ɔ̈c.

¹² Ee riɛlde yen aa tiɛɛm En baardït de pïïu ku riëëk ŋuäldïït cɔl Raɣap wïïr në pɛlënɔmde.

¹³ Wëide ee paannhial weeric abï lɔ wic, ku cinke aye Yen ke ŋuäldït kɔɔr bän thɔ̈ɔ̈ric.

¹⁴ Ku kakë ayek ka thii ke riɛlde, luɔɔu thiinakäŋ yen ayok piŋ, ku na jɔ rel në riɛlde ëbɛ̈n. Ku eeŋa duëër e bɛ yökic?