Jop 24 - JAM DE NHIALIC 2011

¹ Ee käŋö cïï Nhialic Awärjäŋ akööl tɛ̈ɛ̈u piny bïï ke löŋ guiir thïn, ku jɔ kɔc ee Yen riëëu daai të kuum En kɔc?

² Kɔc ayek akɛɛth miɛɛt ciëën ŋuɛk kek duumken, ku rumkï ɣɔ̈k lei ku lek kaken nyuääth.

³ Ku ayek mul ke mïth abɛɛr jɔt, ku nömkï thɔn de tiiŋ abaar në baŋ de känydɛn kën cool.

⁴ Ku ayek kuɛɛr kedhie thiöök në kɔc kuanynyïïn nïïm, agokï thiaan ŋuöön.

⁵ Ka keek acïtkï mul roor ke ke köör mïthken ka camkï roor, acïn të däŋ cïï kek mïthken yɔ̈k kacamkï,

⁶ ku ayek keek tɔ lɔ nöm ka camkï në duum ke kɔc kɔ̈kiic, ku ayek ka cï luɔk në duum ke kɔc ee karɛc looi kuany,

⁷ ku ayek liɛɛr wakɔ̈u thöl ëbɛ̈n në kekɔ̈ɔ̈th, në biäk cïn kek nïïm lupɔɔ,

⁸ ku deŋ liir ë kur nïïm ee ke tuɛ̈ny, agokï röt lɔ kuaak në aguuk ke kuriic agokï gup tuöc.

⁹ Kɔc ayek mïth abɛɛr gɔ̈p bei në märken yöth, ayï mïth ke kɔc kuanynyïïn aye ke dɔ̈m nïïm, känykɛn kënë cool.

¹⁰ Ayek tai ke ke cïn kɔ̈ɔ̈th lupɔɔ gël keek në liɛɛr ë piny, ku aye ke tɔ dhëth rap ke ke nɛ̈k cɔk.

¹¹ Ku loikï miök në mïth ke tiim ke olip ayï mɔ̈u, ku ŋootkï ke ke nɛ̈k rou.

¹² Në wut thok biic yïn ee kiɛɛu piŋ, kë rem guöp kɔɔr thuɔɔu ateer, ku kɔc cï yiëk bɔ̈ɔ̈t adhiaukï ke ke kɔɔr kuɔɔny ku ŋoot Nhialic ke cïn kë lui kɔc yɔŋ keek.

¹³ Kɔc ee karɛc looi amankï aköl, acïn kë duëërkï looi thïn ku acïkï ee cath.

¹⁴ Kɔc ee kɔc luc ayek lɔ cuëër wakɔ̈u, na lɔ piny bɛ̈n ke ruu, ke ke näk kɔc kuanynyïïn.

¹⁵ Nyïïn ke röör ee köör ayek riaar tïŋ alɔ piny, kumkï kenïïm ku luelkï an, acïn nyïïn bï wo bɛ tïŋ.

¹⁶ Të cïï piny cuɔl ayek ɣööt thuur kɔ̈ɔ̈th ciëën, ku aköl ayek röt thiɔ̈ɔ̈k në ɣöötkeniic, akuckï aköl.

¹⁷ Ayek riɔ̈ɔ̈c në ruɛl de akɔ̈l ku acïï mɔ̈ɔ̈th keek ee riääc.

¹⁸ Na yak lueel an, kɔc ee karɛc looi acïtkï wal gɔpë wei në kuëër në pïïu nïïm, ku pinydɛn cieŋkï acï cieen, ka cïn kë bïk bɛ lɔ kɔɔr në duumkeniic.

¹⁹ Cït man ye tuöc de piny thäc jɔt, yen acït luɔi bïï paan ë thuɔɔu kɔc ee karɛc looi liek,

²⁰ ayï märken acïkï be jam në këden, acï ruöi ke cam ka kɔc acïk nïïm määr në keek, ka luɔi de karɛc ee kɔ̈u tɛɛm cït tim cï dhuɔŋ.

²¹ Aake ye pïïr në kake diäär kën dhiëth, ku cïn këpiɛth yek luɔi diäär abɛɛr cïn nïïm röör.

²² Ku Nhialic në riɛlde, ee kɔc nu riɛl ë kecin riɔ̈ɔ̈k, të cï En rɔt jɔt, acïn raan ee wëike ŋɔ̈ɔ̈th.

²³ Aye ke tɔ rɛ̈ɛ̈r ke ke cïï piɔ̈ɔ̈th riɔ̈c, ku döt ke në daai.

²⁴ Aye ke jat nhial tëthiinakäŋ ku riëërkï cït man ë kɔc kɔ̈k, ku mɛ̈ɛ̈të ke nïïm cït man ë rap në kööl ë tëm.

²⁵ Ku na kɛ̈n yic lueel, ke we nyuth a luenhdï?