Jop 23 - JAM DE NHIALIC 2011

Bëër de Jop

¹ Go Jop bɛ̈ɛ̈r, lueel an:

² “Aɣet cï ëköölë yɛn ŋoot ke ya jai ku ŋoot göönydï wo Nhialic, yɛn ee teer arɛɛm guööm ku acïï rɔt ee lëu.

³ Adï ŋiɛc yen të rëër En thïn, ku bä lɔ kɔ̈ɔ̈c në Yenɔm.

⁴ Ku ëtɛ̈ɛ̈n, yɛn bï göönydï tääu në Yenɔm, ku thiäŋ athok ke ya lueel yinydï,

⁵ akaar bä kë lueel ŋic, ku kë bïï pɔ̈k nɔm ɛn.

⁶ Bïï gɔ̈th ke yɛn në dït ë riɛlde? Ei, abï këdï piŋ.

⁷ Raan adöt aduëër jam ke Yen ku yɛn bï bɛ̈i bei në Yecin ke cïn kë cä wööc raantök.

⁸ Tiëŋkï, acä kɔɔr në të ye akɔ̈l thok bɛ̈n, ku të lɔ aköl athɛ̈i akɛ̈n yök.

⁹ Nhialic aa luui në piny biäk cam ku biäk cuëëc ku akɛ̈n tïŋ.

¹⁰ Ku Yen aŋic të nu yɛn, na le ya them, abï ya yök ke ya lɔ gɔk cït adhääp.

¹¹ Yɛn cï a cök mɔ̈k në akeemke yiic, yɛn cï kueerde kuanyic, ku yɛn kën rɔt kɔn yal wei

¹² Yɛn kën jäl në lööŋke yiic, ee këde piɔ̈nde yen aya kuanyic, ke cie kë kɔɔr ë piɔ̈ndï.

¹³ Ku Yen acïï rɔt ee waar, ku eeŋa duëër ë lëu në puk? Kë kɔɔr piɔ̈nde, yen aye looi.

¹⁴ Abïï thöl thok yen kë cï kiëët në biäkdï, ku ka cï kiëëtë ajuëckï.

¹⁵ Në biäk de ee kënë, yɛn ë riɔ̈ɔ̈c në lɔ në Yenɔm, të cän anɔm cät në këde yɛn ee lath.

¹⁶ Nhialic Awärjäŋ ë riɛl ë piɔ̈ndï riɔ̈ɔ̈k, ku riëëc ɛn,

¹⁷ ku ŋuɔɔt ke ya cïï kääc në këde ee mɔ̈ɔ̈th dït täu ɛn thïnë.