Jop 22 - JAM DE NHIALIC 2011

Bëër ë Diäk de Eliapath

¹ Na wën ke bëër Eliapath raan wun ë Teman an:

² “Duëër Nhialic dɛk kë yök tëde raan, acakaa raan pelnɔm?

³ De kë ee Nhialic Awärjäŋ yök në piathëpiɔ̈ndu yic, ayï të ciɛk yïn rëër ke yï ye raan cïn guöp awäc, de kë bïï yök thïn?

⁴ Ee luɔi yïn adöt yen ee Ye tɔ jäny yïn, ku leer yïn ë gööny nɔm?

⁵ Cie biäk cï karɛcku juëc ku cïkï ye guut?

⁶ Ago wänmuuth yɔ̈ɔ̈t kɔ̈u bei në lupɔɔ, ku döŋ në yekɔ̈u, në luɔi bï yen känydu cool, në kë cie yic,

⁷ yïn kën pïïu gäm raan cï dak, ku kɛ̈në raan nɛ̈k cɔk miɔɔc në këciɛm,

⁸ yïn tɔ̈u ë riɛl në yïciin, piny ee këdu, yïn adhuɛ̈ŋ cieŋ en,

⁹ yïn cï diäär abɛɛr tɔ jël në kecin, ku yuöpë mïth abɛɛr kök piny.

¹⁰ Në biäk de ee kënë wïïn ke dɛ̈p acïk yïn tuɔɔk, ka yïn ee riɔ̈ɔ̈c dɔm ëthiäu.

¹¹ Mɔ̈ɔ̈th acï dït ka yïn cïï be daai, ku amool dïït agök amou yïn.

¹² Cïï Nhialic tɔ̈u nhial ya? Tïŋ kuɛl nhial mɛcdɛn mec kek,

¹³ kënë, yen aye yïn e lueel an, “Eeŋö ŋic ë Nhialic? Duëër wo kuum adï, në luän dïït cool lɔ cɔ̈t?”

¹⁴ Aye tak an, cïï luändït pɛ̈n daai tëdɛn ee Yen cath thïn në kaam de tënhial ke luäät.

¹⁵ Bä ŋoot ke yï kuany kueer thɛɛr ë kɔc ee karɛc looi yic?

¹⁶ Cakaa wään kën aköölken thök ë piny nɔm, acï ke bɛ̈n lak wei cït man ë ɣööt cïï amool riɔ̈ɔ̈k.

¹⁷ Ayek lɛ̈k Nhialic an, nyääŋë wo piny wapäc! Ku eeŋö ee luöi keek Yen Nhialic Awärjäŋ?

¹⁸ Acï ɣöötken thiɔ̈ɔ̈ŋ në kajuëc. Ku yɛn ee rɔt mɛc wei në täŋ de kɔc rac cït ë kake.

¹⁹ Kɔc piɛth ayek piɔ̈ɔ̈th miɛt ku ye kɔc cïn gup awɛ̈ɛ̈c dɔl të tïŋ kek kɔc ee karɛc looi ke ke luiyë katuc,

²⁰ ayek lueel an, kɔc ke aterda acïk ke riɔ̈ɔ̈r nyïïn ku kakɛn cï döŋ acïk ke nyuɔp piny.

²¹ Ka yïn Jop jɔ mat wekë Nhialic, ke bï yï thieei në kajuëc,

²² piŋ wëëtdan ee bɛ̈n bei në Yethok ku tääuwë ke në yïpiɔ̈u,

²³ ku na dhuönyë rɔt Nhialic Awärjäŋ ke bï yï yïk, ku tɔ luɔi de karɛc kääc baaidu,

²⁴ ku na cuatë adhääp në abuui yic, ku adhäm lɔ kïr në kɔi ke kiir thar piny,

²⁵ ku dɔm Nhialic Awärjäŋ ke Yen adhämdu ku Yen ateŋduön kuöt nɔm,

²⁶ ke yï bï miɛtëpiɔ̈u yök tëde Nhialic Awärjäŋ, ku Yen abä ya ŋɔ̈ɔ̈th anandu

²⁷ Abä lɔ̈ŋ ku abï këdu piŋ, ke yïn bï këduön cïï yïn kuëŋ looi.

²⁸ Këduön cï kiëët ëbɛ̈n abï rɔt lëu ku ɣɛɛr abï kueerdu aa meeric.

²⁹ Të ye kɔc kuɔɔr piny aye lueel an, ë ke jɔtë nhial, ku abï Nhialic ke kony.

³⁰ Pɔ̈kë rɔt Nhialic ku loi yic, cakaa raan de guöp awäc ka bï luök në biäk du.