Jop 19 - JAM DE NHIALIC 2011

Bëër de Jop

¹ Go Jop bɛ̈ɛ̈r, lueel an:

² “Agut cï nɛn ke we leŋ a wëi ku jiɛthkï ya piɔ̈u në ee wëlkuönkë?

³ Wek ee ya läät në thaar nyin ëbɛ̈n, cäkï gup ee bɛ riɔ̈ɔ̈c në jäny cïnic yic?

⁴ Na ya cak dɛk kë cä wööc, ka awänydï abï nu në yayeth.

⁵ Ee yic, wek ee röt tɔ piɛth në yɛn, ku luɛlkï an, riäŋdiënë yen anyooth awänydï,

⁶ ku ee Nhialic, Yen aa tɛ̈ɛ̈u ɛn në ee nuanë yic, ku rek ɛn në wïndɛn ë dɛ̈pic.

⁷ Tiëŋkï, yɛn aa cöt an, ‘Ë ya luäk’ ku acïn raan cï ya bɛ̈ɛ̈r röl, ayï të cak ɛn kiɛɛu moc arëët, acïn raan piŋ kiɛɛudiën kaar ɛn yinydï,

⁸ Yen ë kueerdï thiöök, ka cïn të tɛ̈ɛ̈k ɛn, acï kueerdï mɔ̈ɔ̈r në mɔ̈ɔ̈th,

⁹ ë dhuëëŋdï nyaai, ku bïï göl bei ë yanɔm.

¹⁰ Acïn biäk kën yup tëde yɛn arëk abä jɔ thöök. Acï aŋäthdï nyaai ka yɛn cït tim cï nyuän thar bei ke meike.

¹¹ Agöth në agönh tuc arëët, ka cï ya tɔ ye raan aterde.

¹² Remdɛn ë tɔŋ acï ye yic määt ëbɛ̈n ke ke bɔ̈, ku tookkï yɛn, ku piëëtkï në baaidï lɔ̈ɔ̈m.

¹³ Acï mïthëkɔckuɔ mɛ̈ɛ̈c në yɛn, ku ciët jur tëde kɔc ŋic ɛn,

¹⁴ kɔc raan në yɛn acïk a nyääŋ piny, ku määthkï acïk nïïm määr në yɛn,

¹⁵ kamaan rɛ̈ɛ̈r baaidï ayï duet lui ayek a woi cït jur,

¹⁶ yɛn ee raan ee ya luööi cɔɔl, ayï të cak ɛn e lɔ̈ŋ bï ya kony, acïï këdï ee bɛ̈ɛ̈r.

¹⁷ Tiiŋdï aman ŋör de wëi ee bɛ̈n bei ë yaröl, ku mïth ke ama acïkï ee ɣëët ë yalɔ̈ɔ̈m,

¹⁸ ayï mïth kor, ayek a biɔɔn guöp ku dɔlkï yɛn të cän rɔt jɔt.

¹⁹ Määthkiën thiääk thook në yɛn kedhie acïk a maan guöp, ayï kɔckiën nhiaar acïk kekɔ̈ɔ̈th wɛ̈l ɛn.

²⁰ Dɛ̈ldï kekë rïŋ acïk nuɛt ë yom kɔ̈ɔ̈th, ee dɛ̈l ë nyäär yen aa dɔ̈ŋ.

²¹ Yak piɔ̈ɔ̈th kok në yɛn määthkï, yak piɔ̈ɔ̈th kok në yɛn, në biäk cï Nhialic Yecin tääu në yaguöp.

²² Eeŋö luöi wek ɛn akuöörkuöör ayadäŋ, cït man lui ë Nhialic ë yɛn, duɛ̈ɛ̈rkï ŋoot ke we leŋ a wëi?

²³ Adï jɔ dɛk raan bï ka luɛɛlë ëbɛ̈n gäär piny awerekic, ke ke bï röt muk,

²⁴ adï jɔ tuɛŋ ë kur kɔ̈ɔ̈th në agalam ë wëëth ke bï tɔ̈u ë dëi anande.

²⁵ Aŋiɛc ade Raan bï yɛn wɛ̈ɛ̈r bei, aŋiɛc nɔn pïïr En! Ku miäk le käŋ thäär adhöc, abï kɔ̈ɔ̈c në piny nɔm ëtënë ku kony ɛn,

²⁶ na cak thou, ku cï guöpdï liu, ke aŋiɛc nɔn bän ŋööt ke ya bï Nhialic tïŋ.

²⁷ Abä tïŋ yɛn guöpdï në nyïïnkï, ku acïï bï aa Raan lei tëde yɛn, ku yɛn ë dak në tiët tiɛɛt ɛn ë kaamë.

²⁸ Na yak lueel an, arɔ̈ŋ buk Jop kuur, jam thar acath ke yen,

²⁹ ke week yiëthkun jakï riɔ̈ɔ̈c në abätäu, në biäk ye agɔ̈th kuöm bɛ̈ɛ̈i, yen ee kënë, yen abä wek ë jɔ ŋic nɔn de yen kë cɔl guïïr ë löŋ.