Jop 18 - JAM DE NHIALIC 2011

Bëër de Rou de Bildad

¹ Go Bildad raan wun Cuwa bɛ̈ɛ̈r, lueel an:

² “Agut cï nɛn yen bï yïn ŋoot ke yï jam aya? Pälë rɔt piny ku wo bï jam.

³ Eeŋö yïn wo tɔ cït thök ku tɔ wo cït dhän në yïnyin?

⁴ Yïn, yïn raan cï rɔt yiëk bɔ̈ɔ̈t në agɔ̈th, bï piny päl wei në këdu, ku nɔn ee kur kek bïï Nhialic ke wuuk tëden ke yï bï piɔ̈u miɛt?

⁵ Ee yic, kajuëc ke kɔc ee karɛc looi cït ɣɛɛr ë many alath, abïk dap lɔ riär piny.

⁶ Ɣɛɛr abï ya mɔ̈ɔ̈th ɣönde, ku manydɛn alath dɛ̈p ë yenɔm abï liɛɛu nyin.

⁷ Cäthdïït wään yen enɔm mɔ̈k nhial ënɔɔnë acï tɔ ciek, ku kïïtde ajëp ë piny.

⁸ Ku cökke aleerkï yen ë wïn ë dɛ̈pic, alɔ ke cath të nu pul cïï ye deepic ku alɔ lööny thïn,

⁹ wïn ë dɛ̈p adɔm e ŋuur ku duut e piny.

¹⁰ Aa thiaan piny ke deepë yen, atit en në kueer thar.

¹¹ Kak ee kɔc riääc ëbɛ̈n acïk en tuɔɔk, acopkï yen cök ka cïk thiɔ̈k në yen.

¹² Kakɛn wään yen ke riɛl acïk dak, ku atiit ë riääk bï kaaŋic të le yen lööny piny.

¹³ Atöök jɔŋdïït cïï ye dɔm ka cam dɛ̈lde, go kɛ̈i de thuɔɔu cökke tɔ thou ayï cinke.

¹⁴ Nyiɛɛyë ɣöndɛn rëër en ë mätic, ku leerë yïnë meliŋ de paan ë thuɔɔu.

¹⁵ Ɣönde alöökë löökic në kɔc kɔ̈k, ke cï kɔn toolic në mac.

¹⁶ Acït tim cïï meike ril wei piny ku riɔu kërkɛn nu nhial.

¹⁷ Kɔc ke piny nɔm ayek nïïm määr në yen, acïn raan töŋ tak en anande.

¹⁸ Nyiɛɛyë piny nɔm, jɔt tëɣer ku jiëpë tëcol.

¹⁹ Ku acïn nɔm mïth, acïn raan töŋ ë kɔc rɛ̈ɛ̈r ë yen bï ke pɔ̈l ke ke pïïr.

²⁰ Ka kɔc nu të lɔ aköl amiäk leer aköl athɛ̈i aye riɔ̈ɔ̈c ke dɔm në riäŋ cï rɔt luöi yen.

²¹ Ë yic, yen kë ee rɔt looi ka tëde raan ee karɛc looi, raan cïï Nhialic ee riëëu.