Jop 16 - JAM DE NHIALIC 2011

Bëër de Jop

¹ Go Jop bɛ̈ɛ̈r, lueel an:

² “Kajuëc cït ee kakë acä ke kɔn piŋ, week wedhie, ee yaaŋ yen aa yiɛ̈nkï yɛn acie riëtëpiɔ̈u.

³ Bï wëlkuön cïn naamden put cït yom bïk kɔ̈ɔ̈th tɛɛm nɛn? Eeŋö tɔ yï bëër athok aya?

⁴ Yɛn ayadäŋ, adï cä dhiɛl jam në ee jamduönë, na ye wek ë cïï ee riäŋdiënë yök, adï cä bëërdït agök kiëët, lɛɛr ɛn wecök,

⁵ ku ka duɛ̈ɛ̈r lɛ̈k week në yathok tei, aduëërkï we riit piɔ̈ɔ̈th ku tɔkï arɛɛmdun lir.

⁶ Ku ënɔɔnë, të jaam ɛn acie yen bï arɛɛmdï tɔ kääc, ku të miɛɛm ɛn eeŋö bïï mim nyaai tëde yɛn?

⁷ Ee yic Nhialic acï riɛldï thöl, ka yɛn cï bäp, Yen ë baaidï riɔ̈ɔ̈r nyin ëbɛ̈n.

⁸ Yen e ya dɔm, ka yɛn cï döŋ ke ya ye biöök ku yuɔɔm, ku yen ee kënë yen ee cäätɔ lueel en an, dɛ guöp awäc.

⁹ Yen aman ɛn arëët ë yic, ee ŋeeny cït län roor ret län ciɛmic, ee yelec kääc në raan aterde, ku döt guöp në nyïïn ke ŋeeny.

¹⁰ Kɔc ayek a riääc në ŋäm ye kek kethook ŋaam, ku mɛ̈tkï ke ke dɔl a guöp, agokï ya bɛ̈n aa biäk thok.

¹¹ Nhialic ë ya tääu në kɔc ee karɛc looi cin, ë ya cuat ë kɔc rac cin.

¹² Këriëëc ëbɛ̈n aa piath ke yɛn, ëtɛ̈ɛ̈n ke ya go ë Nhialic dɔm yeth ku deeny a piny abä pɔ̈k, ee yɛn ee këdɛn ee wɛ̈l tɔɔŋ thook.

¹³ Kɔckɛn thɛ̈ɛ̈r ɛn acïk a tuɔɔk, ku retkï yayic ke cïn kokdepiɔ̈u, abï kethdï wäl wei.

¹⁴ Ee ya bäk cït jön miööc tɔŋ räm, ku thɛ̈ɛ̈r ɛn ku nyɔkic.

¹⁵ Yɛn cieŋ lupɔɔ ke cuɔl, ku rɛ̈ɛ̈r abuui yic ke ya cï tiaam,

¹⁶ yɛn cï nyin thiɛth në dhiëëu, ë ya bɔ̈ɔ̈t nyin, ka nyïïn thäärkï acïn kë bekï woi,

¹⁷ ku acïn raan töŋ cä kɔn luöi tɔŋ, ku yɛn ee Nhialic lam në piɔ̈n awai.

¹⁸ Yïn piny, të cän ɣëët në yïyic, ke yï du ka cï wäc ɛn thian, ku du cɔ̈tdiën caal ɛn luɔi bï löŋdï ŋiëc guiir pën!

¹⁹ Aɣet cï ënɔɔnë ade raandiën mät ke yɛn paannhial, bï ya kony ku gël ɛn,

²⁰ kɔc man get a guöpë ayek määthkï, ka yɛn ë pïïu lɔ̈ny Nhialic,

²¹ ku raandï ka, abï yinydï lɔ lueel në Nhialic nɔm, cït man ë raan kekë mɛ̈thë.

²² Në run likë yiic yɛn bï lɔ të cïn raan ee yenɔm lɔ puk.