Jop 11 - JAM DE NHIALIC 2011

Bëër ë Dhopar

¹ Go Dhopar, raan piny ë Naama bɛ̈ɛ̈r, lueel an:

² “Duëër wël juëc luelë thök ke ke cïï bëërë, ayï jam ëthok de raan, duëër en gäm yic?

³ Duëër wël ɣääriickuönë kɔc tɔ mim ke ke cïï lëu në bëër, ku cïn raan duëër yïn tɔ yäär në wëlkuön ke agɛɛtë?

⁴ Në biäk cï yïn e lueel an, ‘Wëëtdï alɔ wai, ku yɛn ɣer piɔ̈u në Nhialic nɔm.’

⁵ Adï jɔ Nhialic jam ku tuum Yethok ke yïn,

⁶ ku abï yï nyuöth pɛlënɔm cï moony, Yen, awär täŋ de raan, ku jɔ ŋic nɔn cïï Nhialic yï gäm kuöm koor në awänyduön cï looi.

⁷ Duɛ̈ɛ̈rë dït de pɛlënɔm ë Nhialic cuööp? Ku eeŋa ŋic të le riɛl de Nhialic Awärjäŋ guut?

⁸ Yeka mecë awär tënhial, eeŋö bä jɔ looi? Ku yen awär paan ë thuɔɔu në thuth, ka eeŋö bä jɔ ŋic?

⁹ Alääuwic awär piny, ku adït awär wɛ̈ɛ̈r.

¹⁰ Të cïï Yen raan lɛɛr në gööny nɔm, ku mɛc, acïn raan bï ye pɛ̈n En.

¹¹ Në biäk ŋic En kɔc cïn thaarden, të cïï Yen karɛcken tïŋ, cïke bï gäär piny?

¹² Kɔc piɔlpiɔ̈ɔ̈th abïk nïïm jɔ pɛl të cïï mul roor mul wut dhiëth.

¹³ Ku yïn Jop, të cï yïn yïpiɔ̈u pɔ̈k Nhialic, ku täär yïciin En,

¹⁴ të nu ë kërac në yïciin, ke tɔ mec, ku du tɔ rɛ̈ɛ̈r ɣöndu.

¹⁵ Ee yic, ëtɛ̈ɛ̈n yïn bï yïnɔm mɔ̈k nhial, ke yï ril nyin ku cïn riɔ̈ɔ̈c ku cïn të dak në yïguöp.

¹⁶ Nuandu ëbɛ̈n abï yïn nɔm määr në yen, cït man cïn en raan ee pïïu riŋ wïïr bɛ tak.

¹⁷ Ku pïïrdu abï riau de aköl kääc cil wöör, ku ka ye tak ke ke cït mɔ̈ɔ̈th abïk ciët aköl amiäk.

¹⁸ Ku yïn bï nyin riɛl në luɔi de yen aŋäth, yïn bï yïkɔ̈u aa lieec ku jɔ lɔ̈ŋ në mätic.

¹⁹ Yïn bï aa tɔ̈c piny në mätic ke cïn raan riɔ̈ɔ̈c yïn, kɔc juëc abïk nyuc piny në yïnɔm.

²⁰ Ku nyïïn ke piɔ̈ɔ̈th ke kɔc ee karɛc looi acïkï ee bɛ daai, acïkï kuɛɛr ke bän ee bɛ yök, ku jäl ë wëiken yen aŋäth töŋdɛn cï döŋ.