Jop 10 - JAM DE NHIALIC 2011

¹ Pïïrdï acä maan, yɛn bï jam në kɛc de piɔ̈ndï, në nɔm lääu yɛn bï rɔt gɔ̈ɔ̈ny bei.

² Abä lɛ̈k Nhialic an, du ya yïk yeth gääk. lɛ̈kë yɛn kë cä looi tɔ Yïn gɔɔny ɛn.

³ Duëër piath tëde Yïn yen yaaŋ, ku biɔ̈n biɔɔn Yïn luɔi de Yïciin, ku thieei kïït ë kɔc ee karɛc looi?

⁴ Ye daai cït man ë wok, ku Ye käŋ yökiic cït man ë wok?

⁵ Lik nïnku cït nïn ke mɛnh ë raan, ku kït runku në run ke mɛnh ë raan?

⁶ Ee yen kë ë lɔ Yïn dap tɔ kɔɔr kë cä wööc?

⁷ Na cakaa nɔn ŋic Yïn en luɔi cïn en kë cä wööc, ke acïn raan bï ya luäk bei në Yïcin.

⁸ Cinku kek aa cak ɛn ku loi guöpdï në Yïn, yen duëër Yïn raan ë loi ë ciindu bɛ riɔ̈ɔ̈k?

⁹ Tak Yïnɔm nɔn ee Yïn ë cuëc ɛn në tiɔp, ku duɛ̈ɛ̈rë ya bɛ riɔ̈ɔ̈k dakë yanɔm abuui yic?

¹⁰ Ë Yï kën a piaak ë maa yäc cït man ë ca, ku tɔ ciɛkë dut röt aye thith?

¹¹ Yɛn aa cuëëc ë guöpdï ëbɛ̈n në yom kekë räl, ku kum a kɔ̈u në rïŋ kekë dɛ̈l.

¹² Yïn cï ya gäm pïïr ku nhiëërduön agɔk, ke tiëtduön Yïn a tiit, yen apïïr ɛn.

¹³ Ku ënɔɔnë acä jɔ ŋic yen këcïmoony në Yïpiɔ̈u.

¹⁴ Yïn aaye a woi të ya cï cak wäc, ke Yïn duëër awänydï guɔ nyooth, ku cïï ya be päl kë cä wööc.

¹⁵ Amawoou në yɛn, na ya raan rac, na cä yic cak looi, ke yɛn cïï rɔt ee ŋɔ̈ɔ̈th. Tïŋ, yɛn nu ë riääkic ku cä guöp thiäŋ wo ayäär,

¹⁶ ku të cän rɔt ŋɔ̈ɔ̈th, ke Yïn ee ya yɔ̈ɔ̈p, cït nɔn ee köör lɛ̈i yɔ̈ɔ̈p, ku loi kagɛ̈iyë, tɔ Yïn ke yɛn tɔ gum nuan.

¹⁷ Yïn de nɔm kɔc ee ya gaany anandu an dɛ guöp awäc, ëlë ke agönhdu ë jɔ rɔt ŋuak we yɛn, yïn ee ya mak në rɛm ke tɔŋ ee keyiic loor.

¹⁸ Eeŋö tɔ Yïn ɛn bɔ̈ bei yiëëc? Adï cä guɔ thou ke cïn nyin ë cï ya tïŋ

¹⁹ Bɛ̈ndï bei në ama yäc ku bɛɛrë ya yic rɛɛŋ adï piɛth, ku ja ciët kë kën kɔn nu ë piny nɔm.

²⁰ Jɔ ya nyääŋ piny ya tök, pïïrdï ë guɔ thök! Na de të bï yɛn bɛ ŋeek tëthiin akäŋ.

²¹ Ke ya kën kɔn lɔ të cïï raan e nɔm ee bɛ lɔ dɔ̈kë, ee të col ë cut ku ee gök de mɔ̈ɔ̈th,

²² ee gök de paan de atïïp, ku mɔ̈ɔ̈th, ku anuɔɔn, ku ɣɛɛr ee yen ee mɔ̈ɔ̈th ëtɛ̈ɛ̈n.