Jona 3 - JAM DE NHIALIC 2011

Jona Agam Jam ë Bɛ̈nydït

¹ Na wën ke jam de Bɛ̈nydït ë be bɛ̈n tëde Jona në këde rou, lueel an,

² “Lɔ Ninebe gök de pänydïïtë, ku guiëërë kɔc nu thïn löŋ wään cä kɔn lɛ̈k yïn.”

³ Go Jona jam de Bɛ̈nydït gam ku dhil lɔ Ninebe, ku yen ee gök de pänydït ye caathic në nïn kadiäk.

⁴ Ku yen gɔl ë Jona yen në ciɛɛthë yic në kööl tök. Na wën aa cï caathic ke yöök kɔc nu thïn an, “Ninebe abï riɔ̈ɔ̈k të le nïn thiërŋuan thook thök!

⁵ Na wën alɔ bɛ̈ny tueŋ de Ninebe jam cït ee kënë piŋ, ke të ë lui ë käŋ röt kï: Ago rɔt jɔt në thönydɛn ë bääny nɔm, ku yööt lupɔdɛn ë bääny bei, ku tɛ̈ɛ̈u lupɔɔ ke cuɔl ë yekɔ̈u, ku nyuuc piny në abuui yic.

⁶ Ku tɛ̈ɛ̈u meliŋ de Ninebe löŋ piny, lëk kɔc ke Ninebe kedhie an, “Kënë ee löŋ cä tääu piny, yɛn bɛ̈ny tueŋ wökë bäny nu në yacök, ë ciën raan de kë ciɛm, kɔc kedhie, ayï ɣɔ̈k, ayï thök, ëke cïï lony lek nyuäth, ayï dëk.

⁷ Kɔc kedhie ëke tɛ̈ɛ̈u lupɔɔ ke cuɔl ë kekɔ̈ɔ̈th, ku ɣɔ̈k ayï thök ëke rɛ̈ɛ̈r ë wäriic ku lacken yiic ëke cïï kut cök.

⁸ Raan ëbɛ̈n abï Nhialic dhil lɔ̈ŋ në yepiɔ̈u ëbɛ̈n, abï yepiɔ̈u dhil puk ëgɔk, ago täu rɛɛcde pɔ̈l, ku pɛ̈l kɛcëpiɔ̈u yen kërac dap looi yë.

⁹ Na de të bïï Nhialic E piɔ̈u puk, ago löŋ waaric, nɔn de të bïï Yen agönhde pɔ̈l, ke wo cïï bï thou! Go kɔc ke Ninebe jam de Nhialic gam, ku yöökkï röt bïk thek, keek kedhie ayï mïth ayï röördït, ku tɛ̈ɛ̈u kɔc lupɔɔ ke cuɔl ë kekɔ̈ɔ̈th, yen abï ye nyuɔɔth nɔn cïï kek karɛcken pɔ̈l.

¹⁰ Go Nhialic ka cïï kɔc ke Ninebe looi ëbɛ̈n tïŋ, ku tïŋ luɔi cï kek kepiɔ̈ɔ̈th puk në päl pɛ̈l kek täu rɛɛcden, ago Yenɔm waar në riäŋ wään cï than piny an, bï luöi keek, ku akën ke bɛ̈n luöi këtuc.