Jona 2 - JAM DE NHIALIC 2011

Lɔ̈ŋ de Jona ë Rɛ̈c Yäc

¹ Ku ëtɛ̈ɛ̈n Jona ë Bɛ̈nydït Nhialicde lɔ̈ŋ në rɛ̈c yäc, Lueel an,

² “Bɛ̈nydït në guömdï yic, Yïn cä cɔɔl ku Yïn ë këdï bɛ̈ɛ̈r. Tëthuth paan ë thuɔɔu yen aa päl ɛn arɔ̈ɔ̈l ke ya kɔɔr kuɔɔny, ku Yïn cï röldï bɛ̈n piŋ.

³ Yïn ë yɛn cuat ya tëthuth ë wɛ̈ɛ̈r thar piny, të cïï ya tuɔɔk ë piääu ëbɛ̈n, ku jɔ apiɔ̈ŋduön dït rɔt aa lɔɔr ë yanɔm.

⁴ Aa cä thɔ̈ɔ̈ŋ an cï ya cuɔp wei ë Yïlɔ̈ɔ̈m, ku cä luaŋduön ɣeric bï bɛ nyɔk në tïŋ.

⁵ Pïïu aake cï ya thiaan nɔm ku kumkï ya piny taitai, abïï ciën luɔi wɛ̈ɛ̈i yɛn, ku jɔ nyaal de wɛ̈ɛ̈r rɔt aa dɛɛr ë yanɔm.

⁶ Yɛn aa ɣet piny ya në mei ke kur thäär, të ye athïïnke thiöök aɣet athɛɛr. Ku Yïn Bɛ̈nydït Nhialicdï, Yïn ë ya dɔ̈k nɔm ciëën tëthuth ke ya pïïr.

⁷ Wën yɔ̈k ɛn rɔt ke ya ye raan thou, Bɛ̈nydït, Yïn cä bɛ̈n lɔ̈ŋ, ku Yïn ë lɔ̈ŋdï bɛ̈n piŋ luaŋduön ɣeric yic.

⁸ Kɔc ee yiëth cïn naamden lam, acïk jäl në riëëuwic, riëëudɛn ye kek Yïn riëëu.

⁹ Ku yɛn bï kit lëk Yïn thieithieei, Yïn bä gäm miɔ̈c ye nɔ̈k ku luɔi kë cän gutguut lueel. Kony de wëi ee këde Bɛ̈nydït.

¹⁰ Go Bɛ̈nydït rɛ̈cdït yɔ̈ɔ̈k, go rɛ̈cdït Jona lɔ ŋak biic në agör nɔm.