Jona 1 - JAM DE NHIALIC 2011

Jona Akɔt ë Bɛ̈nydït

¹ Na wën ke jam de Bɛ̈nydït bɔ̈ tëde Jona, wën Amitai.

² Lueel an, “Lɔ Ninebe, gök de pänydïïtë, ku guiëërë kɔc nu thïn jäny bän ke luöi këtuc. Kërɛɛcden ë dït ka cï Ya riɔ̈ɔ̈k piɔ̈u.

³ Go Jona yenɔm cɔ̈k Tarcic, an kɔt në Bɛ̈nydït. Ago lɔ Jopa ku yök abël wïïr ëtɛ̈ɛ̈n, ke kɔɔr lɔ wun mec cɔl Tarcic. Ago wëu ke ariöpde yen kɔ̈u cuat piny, ku jɔkï ger ke ke lɔ Tarcic, të cïï yen Bɛ̈nydït bï bɛ tïŋ nyin.

⁴ Na wën ke Bɛ̈nydït ë tɔ yom dït agök tuk rɔt në wɛ̈ɛ̈ric, man abï amaŋ abël wïïr duɛ̈ɛ̈r tɔ cït kë bï dhuɔɔŋ.

⁵ Ago kɔc lui abël wïïric ëbɛ̈n riɔ̈ɔ̈c ku jɔ ŋɛk yanhde cɔɔl ku cɔl ŋɛk yanhde, acïk käŋ dɛɛny wïïr Ku dhëëthkï kajuëc kɔ̈k wïïr në biäk bïï abël wïïr pial. Ku Jona aa cï lɔ ë pulic në abëlic piny, ku aacï thiai ke nïn.

⁶ Na wën, ke yök ë bɛ̈ny de abël wïïr en ëtɛ̈ɛ̈n, ku lëk en an, “Eeŋö loi ke yï nin? Jɔt rɔt ku cɔl yanhdu. Na de të bïï yen piɔ̈u kok ke wook ku luɛ̈k wo wëi.

⁷ Go kɔc lui abël wïïric luel an, “Week wäthii bäk deenyku gɛk, ke wo bï raan de göc cï wo lɔ̈nyë yök. Na wën aa cïk gɛk dɛɛny, ke gaak ë nyoth Jona.

⁸ Agokï yɔ̈ɔ̈k an, “Tɛ̈të wook eeŋö loi rɔt? Eeŋö ee luɔidu? Ee yï jël ënou? Ye raan ë paan nou? Cɔl jurdun ŋö?

⁹ Go Jona bɛ̈ɛ̈r an, “Yɛn ee raan ë Ɣeberuu, ku Nhialic de paannhial Aciëŋ ë cak wɛ̈ɛ̈r ku tëril Yen aya lam. Gokï riɔ̈ɔ̈c aläl.

¹⁰ Ago ŋoot ke lëk keek an, “Yɛn aa kɔt në Bɛ̈nydït.” Go kɔc lui abël wïïric jɔ riɔ̈ɔ̈c në riɔ̈ɔ̈c rac, ku lëkkï yen an, “Eeŋö jɔ luöi kë cït ee kënë?

¹¹ Amaŋ alɔ ke ŋuak rɔt ë caŋawën, go kɔc lui abël wïïric Jona thiëëc an, “Eeŋö buk luöi yïn ke amaŋ ë bï kɔ̈ɔ̈c?

¹² Go puɔ̈k nɔm keek an, “Cuatkï ya wïïr ke amaŋ ë bï kɔ̈ɔ̈c. Ee këdï yen aa tɔ week yök ee amaŋ rɛɛcë.

¹³ Na wën ke kɔc lui abël wïïric ëke jɔ abël gɛɛr këëc aläldïïtë, ku amaŋ adït aläldïïtë, go apiöök ke pɛ̈n lɔ biic.

¹⁴ Agokï Bɛ̈nydït lɔ̈ŋ në röldït an, “Bɛ̈nydït, Bɛ̈nydït, du wo lui këtuc de thuɔɔu, të le wok ee raanë nɔ̈k, Bɛ̈nydït, kënë ee täŋdu ku ye luɔidu.

¹⁵ Ku jɔkï Jona jat nhial ku cuɛtkï wïïr, go pïïu jɔ guɔ lɔ lik raantök wïïr.

¹⁶ Ku kënë, acï kɔc lui abël wïïric tɔ rïïu Bɛ̈nydït aläldïïtë ku nɛ̈kkï käŋ lueelkï gutguut an, bïk Bɛ̈nydït aa lam ku luuikï.

¹⁷ Ku yen acï Bɛ̈nydït rɛ̈cdït yɔ̈ɔ̈k bï Jona liek, ago liek ku rëër ë rɛ̈c yäc në cooliic kadiäk ku wɛ̈ɛ̈riic kadiäk.