Jocua 9 - JAM DE NHIALIC 2011

Kɔc ke Gibiɔn Amɛthkï Jocua

¹ Na ɣɔn, aa lɔ meliik ee kënë piŋ kedhie, meliik nu në wɛ̈ɛ̈r de Jordan kɔ̈u në wuöt ke piny ë kuur, ku meliik nu në kur ke wakic yiic, në Wɛ̈ɛ̈rdïït ɣer yɔu alɔ guut Lebanɔn. Meliik ke kɔc ke Ɣit kekë kɔc ke Amor, ku Kanaan, ku Peridh, ku Ɣib, ku Jebuth.

² Ke ke mat ke cin lek thɔ̈ɔ̈r në Jocua kekë Yithriɛl.

³ Na wën aa piŋ kɔc ke Gibiɔn yen kë cïï Jocua luöi kɔc ke Jeriko ku kɔc ke Ai,

⁴ ke matkï nɔn bïï kek Jocua math. Agokï lɔ tëde Jocua cït kɔc ë toc tëmec ka mulken ë aɣɛ̈ɛ̈ckï në cual cï nuat kɔ̈ɔ̈th, ku mukkï mɔ̈u në atheep cï dhiapiic, atheep cï piël ku cï ke niɔp kɔ̈ɔ̈th.

⁵ Ku tɛ̈ɛ̈ukï lupɔɔ cï rɛt ë kekɔ̈ɔ̈th, ayï war cï niɔp. Ku nömkï kuïïn cï pam ril ku cïk buk.

⁶ Ku lekkï Gilgal të cïï wut piɔ̈ɔ̈t thïn lekkï ku lëkkï Jocua kekë kɔc ke Yithriɛl, “Wok bɔ̈ piny mec arëët. Akɔɔrku luɔi bä wek mät looi në wook.

⁷ Ago kɔc ke Yithriɛl lɛ̈k kɔc ke Ɣib an, “Eeŋö tɔ wo loi mät në week? Buk ŋic adï na jakï guɔ aa kɔc rëër në wolɔ̈m tëthiɔ̈k?

⁸ Gokï lɛ̈k Jocua an, “Wok ee lïïmku? Go Jocua ke luɔp an, “Ee wek yï ŋa? Ku bäkï nou?”

⁹ Agokï pɔ̈k nɔm Jocua an, “Wok aa bɔ̈ piny mec arëët bɛ̈ny, në luɔi cïï wok Bɛ̈nydït Nhialicdun piŋ. Këriëëc cï looi Rip ëbɛ̈n acuk piŋ,

¹⁰ ku piŋku kë cï luöi meliik ke Amor në wɛ̈ɛ̈r de Jordan kɔ̈u baŋ të lɔ aköl athɛ̈i, ku kë cï luöi Thiɣon melik de Ɣecbon, ku Og melik de Bacan kɔc rɛ̈ɛ̈r Acetaroth.

¹¹ Ka wook, ee röördïtkuɔ, ku raan ëbɛ̈n raan rɛ̈ɛ̈r pinyda kek ë lëk ë wook an, “Nɔ̈mkï kacaam ke kueeric ku jälkï lak lɛ̈kkï kɔc ke Yithriɛl an, ‘Wok ee lïïmkun, luɔikï amat në wook.’

¹² Tiëŋkï kuïïnkuɔn cï pam, aake mor ɣɔn jël wok wunda, ke wo bɔ̈ të nu wek. Ku ënɔɔnë tiëŋkï luɔi cï kek riɛl, ku acïk buk.

¹³ Ku atheep ke mɔ̈u aya, piɛth ɣɔn gëm wok keyiic, ku ënɔɔnë tiëŋkï luɔi cïï kek riääk. Ku lupɔɔkuɔ, ayï wɛɛrkuɔ acïk riääk në cäthdïït ë jël wok të mec.”

¹⁴ Ago kɔc ke Yithriɛl nöm në kacaamkeniic ku cïkkï Bɛ̈nydït be luɔp në biäkden.

¹⁵ Go Jocua mat kekë kɔc ke Gibiɔn, ku teem löŋ ke keek në luɔi bï yen ke tɔ rɛ̈ɛ̈r. Ku jɔ bäny ke akutnɔm kuëëŋ nɔn bïï kek mät döt.

¹⁶ Na ɣɔn aa cï mät nïn aa diäk, ke piŋ ë kɔc ke Yithriɛl nɔn rëër ë kɔc ke Gibiɔn në kelɔ̈m ë gök.

¹⁷ Ago kɔc ke Yithriɛl jäl lekkï ë pɛ̈ɛ̈nydït nu kek thïn. Na wën aa cïk nïn kadiäk thöl ke ke cath, ke ke jɔ ɣet në pɛ̈ɛ̈nydïtkɛn rëër kek thïn: Gibiɔn, kekë Kepira, ku Beeroth ku Kiriath Jiriim.

¹⁸ Ku akën ë kɔc ke Yithriɛl ke bɛ̈n nɔ̈k, në luɔi ë cïï bäny ke akutnɔm kuëëŋ në rin ke Bɛ̈nydït Nhialic de Yithriɛl. Ago akutnɔm ëbɛ̈n dok në bäny gup në këde ee kënë.

¹⁹ Ago bäny pɔ̈k nɔm akutnɔm ëbɛ̈n an, “Wok ë kuëëŋ në rin ke Bɛ̈nydït Nhialic. Ka acuku ke duëër bɛ luöi kërac.

²⁰ Abuk keek puɔ̈l a rɛ̈ɛ̈r në wook ke agönh ë Nhialic ë cï bï bɛ̈n ë woyiëth në biäk de gutguut cïï wok kuëëŋ. Tɔku ke rɛ̈ɛ̈r ku abïk wook aa dhɛ̈th pïïu, ku yiëpkï wo tiim.

²¹ Ka acïï bäny bɛ̈n lueel an, “Pälkï keek arɛ̈ɛ̈r. Agokï kɔc ke Yithriɛl jɔ aa yiëp tiim, ku dhëthkï keek pïïu cït man cï bäny ë lueel. Abïk akutnɔm aa dhɛ̈th pïïu, ku yiëpkï ke tiim. Yen kë ë lueel ë bäny ka.

²² Go Jocua kɔc ke Gibiɔn tɔ yïnë yen, ku lop keek an, “Eeŋö math wek wook, ku luɛlkï an ë we bɔ̈ tëmec, ku wek rɛ̈ɛ̈r në wo lɔ̈m tëthiɔ̈k?

²³ Në luɔi cä wek ë kënë looi, Nhialic ë we cieen. Wek bï jɔ ya kɔc ee tiim yep, ku dhëthkï ɣön ë Nhialicdï yic pïïu anandun.”

²⁴ Gokï puk nɔm an, Aloiku aya bɛ̈ny, në luɔi cïï wok ë piŋ nɔn cïï Bɛ̈nydït Nhialicdun Mothe, awunde yɔ̈ɔ̈k ë yic nɔn bï yen en gäm piny ëbɛ̈n, ku tɔ näk kɔc tɔ̈u thïn kedhie në wenïïm tueŋ. Agoku riɔ̈ɔ̈c në wëikuɔ në biäkdun.

²⁵ Ku ënɔɔnë, wok nu në wecin, luöikï wo kë yak tïŋ ke rɔ̈ŋ ke wook.

²⁶ Go Jocua ke gël, ku cïï ke tɔ nɛ̈k ë kɔc ke Yithriɛl.

²⁷ Ku tɔ keek ee lïïm ee tiim yep, ku dhëthkï akutnɔm ë Yithriɛl pïïu, ku lɔ yïïŋ de Bɛ̈nydït. Yen luɔi ŋoot ke yek looi ka agut cï ye köölë.