Jocua 8 - JAM DE NHIALIC 2011

Pɛ̈c ku Riääk de Ai

¹ Na wën, ke jɔ Bɛ̈nydït lɛ̈k Jocua an, “Jɔt rem de tɔŋdu ëbɛ̈n, ku lɔ Ai. Du riɔ̈c ku du rɔt pɛ̈l wei. Yïn bä tɔ tiam melik de Ai kekë kɔcke, ku ta yï nöm wunde kekë pinyde.

² Ku Ai kekë melikde abäk keek luöi kë ɣɔn cäk kɔn luöi Jeriko kekë melikde. Ka kë jɔ nu yetök, ee luɔi bä wek këriëëc cäk peec ë Ai nööm ëbɛ̈n ke ye kakun ayï ɣɔ̈k. Guiɛɛrkï röt, ku lak thiaankï në pänydït kɔ̈u ciëën.”

³ Go Jocua rɔt guiir ke lɔ Ai kekë remdɛn ë tɔŋ ëbɛ̈n. Ago aguum kathiërdiäk nööm në kɔckɛn ril, ku tooc keek tueŋ wäkɔ̈u.

⁴ Lëk keek an, “Lak thiaankï në wut kɔ̈u baŋtui, ku duökï röt tɔ mec në wut. Ku guiɛɛrkï röt bäk pänydït mak.

⁵ Yɛn bï lɔ ë kal ë pänydït thok wokë kɔc cath në yɛn. Na lë alɔ kɔc ke Ai bɛ̈n bei wut, bïk bɛ̈n piɔ̈t në wook, wok bï kat në keek cït man wään tueŋ.

⁶ Ku ëtɛ̈ɛ̈n, abïk bɛ̈n bei pänydït ku copkï wook cök. Abïk lueel an dhilku bɛ kat në keek cït man wään tueŋ.

⁷ Ku ëtɛ̈ɛ̈n, wek bï lɔ̈ɔ̈k bɛ̈n bei të cä wek thiaan, ku ruömkï pänydït. Ku Bɛ̈nydït Nhialicdun abï we gäm pänydït.

⁸ Ku të cä wek wut rum, ke ɣɔ̈kkï mac cït man cïï Bɛ̈nydït ë thɔ̈n week. Yen kë bäk looi ka.”

⁹ Na wën, ke tooc ë Jocua keek tueŋ. Gokï lɔ ku thiɛɛnkï në Ai kɔ̈u baŋ të lɔ aköl athɛ̈i, në kaam de Ai kekë Bethel. Ku löök Jocua niin pänydït.

¹⁰ Na ɣɔn amiäk aduduur, ke Jocua jɔt rɔt ku cɔɔl rem de tɔŋ. Ku wɛt keek Ai kekë röördït ke Yithriɛl.

¹¹ Na wën, ke rem de tɔŋ cath ke yen ë tëk në kueer ee lɔ në kal dïït ë wut thok, ku lek kɔ̈p ëtɛ̈ɛ̈n në baŋ të lɔ rut, ku nu ë wakic në kaamden në Ai.

¹² Ago Jocua aguum kadhïc ke kɔc tɔ lɔ thiaan në wut thok piny, baŋ të lɔ aköl athɛ̈i në kaam de Ai kekë Bethel.

¹³ Agokï rem de tɔŋ tɛk piny, biäk dït acï tɔ dɔ̈ŋ të cïï kek piɔ̈ɔ̈t thïn në pänydït këc baŋ të lɔ rut, ku kɔ̈k lek thiaan në pänydït kɔ̈u ciëën baŋ të lɔ aköl athɛ̈i. Ku Jocua ë bɛ̈n niin në wakic në ee wɛ̈ɛ̈rë yic.

¹⁴ Na wën, atïŋ ë melik de Ai kɔc ke Jocua, ke jɔ rɔt dap guɔ gap nhial kekë kɔcke. Ku jɔkï guɔ jäl lek thɔ̈ɔ̈r në kɔc ke Yithriɛl në wakic të wään tueŋ kɔn kek thɔ̈ɔ̈r thïn ë Araba. Ku akuckï nɔn bï keek lɔ̈ɔ̈k teem.

¹⁵ Na wën, ke mɛth ë Jocua keek kekë kɔcke cït ka kɔt. Gokï kat ke ke wel kenïïm ë jɔ̈ɔ̈ric.

¹⁶ Go kɔc ke pänydït cɔ̈ɔ̈l bei kedhie lek keek cop. Na wën, ariŋkï në kecök, ke thel ë kɔc ke Jocua keek wei abïk mɛc në wut.

¹⁷ Acïn raan töŋ ë cï döŋ Ai, ayï Bethel. Kɔc kedhie cï Yithriɛl lɔ cop cök, ku nyiëëŋkï kal ë wut piny atuɛɛr.

¹⁸ Ku tëthiin ë yɔɔk ë Jocua yeciin, ke ŋuɛɛŋ tɔŋ Ai.

¹⁹ Go kɔckɛn wën cï thiaan röt dap gap nhial, ku kɔtkï lek wut rum. Ku gokï wut ɣɔ̈k mac.

²⁰ Na wën, aliec kɔc ke Ai kekɔ̈ɔ̈th, ke ke tïŋ tol acï rɔt cɔ̈k nhial wutic. Ku cïn kueer däŋ ë be kek ban. Kɔc ke Yithriɛl wën copkï ë jɔ̈ɔ̈ric, acïk röt bɛ̈n lɔ pɔ̈k keek.

²¹ Na wën, aa tïŋ Jocua en kekë kɔcke nɔn cïï wut rum, ku tïŋkï wut acï ɣɔ̈k mac, ke ke puk röt kɔc ke Ai, ku näkkï keek.

²² Ku kɔc ke Yithriɛl wën cï wut rum, acïk bɛ̈n mɛt tɔŋ ayadäŋ. Ago kɔc ke Ai röt yök acï gɛɛu cil në kɔc ke Yithriɛl. Acïï kɔc ke Yithriɛl keek bɛ̈n nɔ̈k kedhie. Acïn raan töŋ cï bɛ̈n ban, ku cïn raan töŋ cï bɛ̈n döŋ apïïr.

²³ Ee melik de Ai yetök yen acï bɛ̈n dɔm apïïr ku yïnë Jocua.

²⁴ Kɔc ke Yithriɛl acïk kɔckɛn ke ater bɛ̈n nɔ̈k kedhie në jɔ̈ɔ̈ric, të wën cop kek ke thïn. Ku jɔkï kenïïm pɔ̈k Ai, lek kɔc cï döŋ thïn nɔ̈k kedhie.

²⁵ Aguum kathiëër ku rou ke röör ku diäär, acïk bɛ̈n thou ee köölë në kɔc ke Ai yiic

²⁶ Në luɔi cïï Jocua tɔŋde mɔ̈k nhial, ke wel thok Ai ku kën tääu piny, agut të bïï raan nu wut kɔn nɔ̈k ëbɛ̈n.

²⁷ Ku kɔc ke Yithriɛl acïk këriëëc pïïr nööm ëbɛ̈n ke ye kaken, ayï ka kɔ̈k cïk peec cït man cïï Bɛ̈nydït ye lɛ̈k Jocua.

²⁸ Jocua ë Ai bɛ̈n ɣɔ̈k mac ku riëëk taitai. Ku Ai aŋoot ke cï riääk cït ee mandɛn agut cï ye köölë.

²⁹ Ku Jocua ë melik de Ai bɛ̈n mac nhial ë tim nɔm, ku tɔ col nhial ëtɛ̈ɛ̈n agut cï thëën. Na ɣɔn thëën në lɔ piny de akɔ̈l, ke Jocua yöök kɔc bïïkï bei. Ago bɛ̈ɛ̈i bei, ku cuɛtë piny në kal ë wut thok. Na wën, ke kum kɔ̈u në kurdït. Kek ee kurkë aŋootkï ëtɛ̈ɛ̈n agut cï ye köölë.

Löŋ Akuen në Kuur de Eebal nɔm

³⁰ Ago Jocua yïk yiëk Bɛ̈nydït Nhialic de Yithriɛl, në kuur de Eebal nɔm.

³¹ Cït man wään cïï Mothe awun ë Bɛ̈nydït e lɛ̈k kɔc ke Yithriɛl. Go yïk yïk cït man ë kë cï gɔ̈ɔ̈r në awerek de lööŋ ke Mothe yic, an, “Yïk ë loi në kur kënë ë tueŋ në kakë loi në wëëth. Ku acïk Bɛ̈nydït bɛ̈n gäm miɔ̈c ye nyop ëbɛ̈n në yenɔm, ayï miɔ̈c de mät.

³² Ku ëtɛ̈ɛ̈n, Jocua ë löŋ wään cïï Mothe gɔ̈ɔ̈r bɛ̈n gäär ë kur kɔ̈ɔ̈th në kɔc ke Yithriɛl nïïm.

³³ Ago kɔc ke Yithriɛl kedhie në röördïtken, ku kɔc nu në kenïïm, ayï bäny ee lööŋ guiir, ayï alɛi rɛ̈ɛ̈r në keek, acïk bɛ̈n kɔ̈ɔ̈c në athänduk lɔ̈ɔ̈m në biäk kaarou, ke ke wël kenïïm bäny ke kake Nhialic, kɔc dhiën ë Lebi ɣɛ̈ɛ̈c Athänduŋ de män ë Bɛ̈nydït. Biäk de kɔc acïk kääc ke ke wel kekɔ̈ɔ̈th kuur de Geridhim, ku kääc biäk däŋë ke ke wel kekɔ̈ɔ̈th kuur de Eebal. Acïï Mothe awun ë Bɛ̈nydït thɔ̈n keek ɣɔn, an bïk ee kënë aa looi në kööl nööm kek athiɛɛi.

³⁴ Go Jocua löŋ kueen ëbɛ̈n aläl ke piŋ kɔc, kueen athiɛɛi ayï acien, cït man cïï ke gɔ̈ɔ̈r në Awerek de Löŋic.

³⁵ Jocua ë lööŋ ke Mothe bɛ̈n kuɛ̈n kɔc ke amatnɔm cï kenïïm mat kedhie, diäär, ayï mïth ayï kɔc lei rɛ̈ɛ̈r në keek.