Jocua 5 - JAM DE NHIALIC 2011

¹ Na wën, ke piŋ ë meliik ke Amor në wɛ̈ɛ̈r de Jordan kɔ̈u baŋ të lɔ aköl athɛ̈i, ku piŋ ë meliik ke Kanaan kedhie, në Wɛ̈ɛ̈rdïït ɣer kɔ̈u ëbɛ̈n nɔn cïï Bɛ̈nydït wɛ̈ɛ̈r de Jordan tɔ dëu, abï kɔc ke Yithriɛl tem të ril. Agokï riɔ̈ɔ̈c aläl, ku pɛ̈lkï röt wei në biäk de kɔc ke Yithriɛl.

Cuɛ̈l në Gilgal

² Na ɣɔn, ke jɔ Bɛ̈nydït bɛ lɛ̈k Jocua an, “Loi leem në kuur ë plint, ku cueel kɔc ke Yithriɛl.”

³ Go Jocua leem ke plint looi, ku cueel kɔc ke Yithriɛl të cɔl Kuur ë Cuɛ̈l.

^4-6 Të ɣɔn jël ë kɔc ke Yithriɛl Rip, röör cï cueel kedhie. Ku acïn mɛwä ë cï bɛ cueel në runiic kathiërŋuan wään ciɛth kek në jɔ̈ɔ̈ric. Ku në aköölkë yiic, röör wään lëu tɔŋ në akööl wään jël kek Rip, kɔc ëbɛ̈n, acï thök ë thuɔɔu. Në luɔi kën kek Bɛ̈nydït gam thok. Ku në baŋ cïï Bɛ̈nydït kuëëŋ nɔn cï en keek bï tɔ ɣet piny ɣɔn cï thɔ̈n kuarken, piny ee wat ë ca ku miök ë kiëc.

⁷ Ku akënkï mïthken bɛ̈n cueel të ɣɔn ciɛth kek kueer. Ka ee kek ë cueel ë Jocua keek.

⁸ Na wën, aacï jur thök në cuɛ̈l, kɔc kedhie acïk bɛ̈n rëër ëtɛ̈ɛ̈n, abï tëtöök kɔn dem.

⁹ Na wën, ke lëk ë Bɛ̈nydït Jocua an, “Ayärduön ɣɔn Rip acä nyaai ee köölë. Yen kë ë jɔ ëtɛ̈ɛ̈n cäk ka an Gilgal agut cï ënɔɔnë.

¹⁰ Na ɣɔn, aŋoot kɔc ke Yithriɛl ke ke rɛ̈ɛ̈r ë Gilgal, në riaaŋic ë Jeriko lɔ̈ɔ̈m, ke kɔc ke Yithriɛl ë ke loi dhuëëŋ de Winythok ɣɔn thëën në kööl ye pɛɛi thok thiëër ku ŋuan.

¹¹ Ku në kööl lɔ në köölde Winythok cök, yen aye kööl tueŋ ë jɔ kek kacaam ë com keek piny ë Kanaan jɔ thiëëp, rap cï geet, ku kuïïn cï pam nyuäŋ.

¹² Na ɣɔn amiäk, ke mana ë jɔ kɔ̈ɔ̈c në löny. Ku gɔl ëtɛ̈ɛ̈n ku le tueŋ, kɔc ke Yithriɛl akënkï bɛ̈n bɛ cam në mana, ee kacaam ë com keek piny ë Kanaan kek ë yek cam.

Jocua kekë Raan Muk Abätäu

¹³ Na ɣɔn ë kööl tök, në akööl ɣɔn rëër ë Jocua në Jeriko lɔ̈ɔ̈m, ke Jocua ë tïŋ raan muk abätäu ëthiäu akääc ë yenɔm tueŋ. Go Jocua rɔt cuöt en ku lop an, “Ye raanda, ku ye raan de kɔckuɔn ke ater?

¹⁴ Go puk nɔm an, “Yɛn cie raandun, ku yɛn cie raan de kɔckuön ke ater. Yɛn ee bɛ̈ny ë rem de tɔŋ ë Bɛ̈nydït.” Go Jocua rɔt cuat piny, ke jam ke gut e nyin piny, lɛ̈ŋ lueel an, “Yɛn awundu bɛ̈ny. Eeŋö kɔɔr kë luöi Yïn?”

¹⁵ Go bɛ̈ny ë rem de tɔŋ ë Bɛ̈nydït lɛ̈k en an, “Bɛ̈ɛ̈iyë wɛɛrku bei, yïn kääc tëɣeric.” Go Jocua warke bɛ̈ɛ̈i bei.