Jocua 3 - JAM DE NHIALIC 2011

Kɔc ke Yithriɛl Atemkï Jordan

¹ Na ɣɔn amiäk aduduur, ke Jocua ë jäl Akacia kekë kɔc ke Yithriɛl kedhie, lek piɔ̈ɔ̈t në Jordan kɔ̈u, ke ke tit kööl bï kek Jordan teem.

² Na wën, acï akööl aa diäk, ke bäny ke Yithriɛl nu në kɔc nïïm ë ke tëëk wutic.

³ Lek lɛ̈k kɔc an, “Të la wek bänydït ke kake Nhialic tïŋ aɣɛ̈ɛ̈c athänduŋ de män ë Bɛ̈nydït Nhialicdun, ke we mɛ̈ɛ̈t pɛɛnykuniic, ku kuanykï ke cök.

⁴ Abïk week nyuöth kueer, wek kën kɔn bɛ̈n eenë. Ku duökï ee ɣet në athänduŋ de mät lɔ̈ɔ̈m tëthiɔ̈k. Yak röt tɔ mec në yen, në kë cït agum (1,000) de akem, në yecök ciëën.”

⁵ Ku lëk ë Jocua keek an, “Wakkï röt, Bɛ̈nydït abï kadït ke gäi looi në weyiic miäk aköl.

⁶ Ku jɔ lɛ̈k bäny ke kake Nhialic, nɔn nööm kek athänduŋ de mät, ku tɔ ke lɔ në kɔc nïïm tueŋ. Agokï lɔ në kɔc nïïm tueŋ cït man cïï Jocua ye lueel.

⁷ Go Bɛ̈nydït lɛ̈k Jocua an, “Kë bä looi ë köölë, abï kɔc ke Yithriɛl tɔ rïïu yïn guöp, cït man ë raandït. Ku abïk jɔ ŋic nɔn täu Ɛn wokë yïn, cït man ɣɔn kan Ɛn tɔ̈u wokë Mothe.

⁸ lɛ̈kë bäny ke kake Nhialic ɣɛ̈ɛ̈c athänduŋ de mät, ë ke lɔ kɔ̈ɔ̈c ë pïïuwiic ëlëthɛɛr të cï kek ɣet kiir.

⁹ Ku be Jocua lɛ̈k kɔc ke Yithriɛl an, “Bä piɛŋkï kë lueel Bɛ̈nydït Nhialicdun.

¹⁰ Yen abä wek en jɔ ŋic ë gɔk luɔi nu ë Nhialic Pïïr në weyiic, ku gamkï aya yen luɔi bï Yen kɔc ke Kanaan cuɔp wei në wenïïm tueŋ, ku cop kɔc ke Ɣit, ku kɔc ke Ɣib, ku kɔc ke Peridh, ku kɔc ke Girgac, ku kɔc ke Amor, ku jɔ aa kɔc ke Jebuth.

¹¹ Tiëŋkï, athänduŋ de män ë Bɛ̈nydït de këriëëc ë pinynɔm ëbɛ̈n, abï wɛ̈ɛ̈r de Jordan teem në wenïïm tueŋ.

¹² Ku ënɔɔnë, kuanykï kɔc kathiëër ku rou. Raan tök në dhiëën ke Yithriɛl yiic ëbɛ̈n kathiëër ku rou.

¹³ Ku ëlëthɛɛr, të le bäny ke kake Nhialic kecök tääu wïïr ë pïïuwiic, bäny ɣɛ̈ɛ̈c athänduŋ de mät, Athänduŋ de Bɛ̈nydïït de këriëëc ë pinynɔm ëbɛ̈n, wɛ̈ɛ̈r de Jordan abï kɔ̈ɔ̈c ke cïï be wat. Ku pïïu wat, abïk kenïïm thɔɔc abïk ɣet nhial.”

^14-15 Na wën, ke kɔc ë ke mɛ̈ɛ̈t pɛɛnykeniic, ku jëlkï lek Jordan teem. Go bäny ke kake Nhialic lɔ në kenïïm tueŋ, ke ke ɣɛ̈ɛ̈c athänduŋ de mät. Ku aaye akööl ke tëm, ka wɛ̈ɛ̈r de Jordan aa cï thiɔɔr arëët. Na wën, acï bäny ke kake Nhialic ɣet ë kiir thok, ku cïk pïïu jak në kecök.

¹⁶ Pïïu acïk bɛ̈n kɔ̈ɔ̈c në wat, ku thɔckï kenïïm abïk ɣet nhial tëmec aläl. Të lɔ Adam, të lɔ pänydït cɔl Dharedhan. Ku athiöör wɛt të lɔ wɛ̈ɛ̈r de Araba, Wɛ̈ɛ̈r de Amilɔ, cï kɔ̈ɔ̈c taitai. Go kɔc jɔ tem tëthiɔ̈k ke Jeriko.

¹⁷ Ku bäny ke kake Nhialic wën ɣɛ̈ɛ̈c athänduŋ de män ë Bɛ̈nydït, aake kääc të ril në wɛ̈ɛ̈r de Jordanic cil. Ku tɔkï jur tëm ëbɛ̈n, ke ke cath të ril ayadäŋ.