Jocua 23 - JAM DE NHIALIC 2011

Jam Ciëën ë Jiëëm ë Jocua Yithriɛl

¹ Na ɣɔn, acï akööl juëc tëëk, akööl ɣɔn cïï Bɛ̈nydït Yithriɛl gäm löŋ në kɔc de kek ater, Jocua acï jɔ dhiɔp arëët.

² Ago Jocua kɔc ke Yithriɛl cɔɔl kedhie, cɔɔl röördït ku bäny ke dhiën, ku bäny ke luk, ku bäny ee Yithriɛl gäär, ku lëk keek an, “Yɛn ë dhiɔp aläl.

³ Ku këriëëc cïï Bɛ̈nydït Nhialicdun luöi juöör de ater në week kedhie në këdun acäk tiŋ në wenyïïn wedhie. Bɛ̈nydït Nhialicdun ë tɔŋdun thɔ̈ɔ̈r.

⁴ Ku aŋiɛckï nɔn cän dhiëënken tɛ̈k piiny ke juöör, tɔkï ee piinyken, piiny ke juöör ŋoot ke ke kënë peec, ku piiny ke juöör cä peec, gɔl në Jordan ale guut Wɛ̈ɛ̈rdïït ɣer kɔ̈u të lɔ aköl athɛ̈i.

⁵ Abïï Bɛ̈nydït Nhialicdun ke cuɔp wei në wenïïm tueŋ. Abï Bɛ̈nydït ke tuöör wei në wenïïm, ka piny abï lɔ̈ɔ̈k aa këdun cït man cï Yen ë thɔ̈n week.

⁶ “Ka week kiɛmkï wenïïm piny, ku dɔ̈tkï këriëëc cï gɔ̈ɔ̈r në awerek de lööŋ de Mothe yic ëbɛ̈n, ku yak kë lueel looi.

⁷ Ku duökï röt liëëp në juöör cï döŋ në weyiic. Duökï yiëthken ee cɔɔl rin, ku duökï ee kuëëŋ në rinken. Duökï lam, ku duökï keek ee luööi.

⁸ Bɛ̈nydït Nhialicdun yen kuanykï cök anandun, cït man ya wek en kuany cök ë caaŋdun agut cï ënɔɔnë.

⁹ “Bɛ̈nydït ë göök dït ke juöör ril cop në wenïïm tueŋ, wuöt juëc aläl. Ku acïn wun töŋ cï we tiaam.

¹⁰ Raan tök në weyiic ee agum ë raan cop, në luɔi biök ë Bɛ̈nydït Nhialicdun ë tɔŋdunic, cït man wään cï en ë lueel.

¹¹ Ka week, kiɛmkï wenïïm piny, ku nhiaarkï Bɛ̈nydït Nhialicdun.

¹² Ku na lak kueer ë Bɛ̈nydït pɔ̈l, ku mätkï ee juöör lik cï döŋ ë woyiic, ku lak röt thiëk në keek,

¹³ Bɛ̈nydït Nhialicdun acïï we bï bɛ kuɔny, ka acïï juöör dɛ wek ater bï bɛ cuɔp wei. Abïk ciët wïn ë dɛ̈p, deep ë week, ku cïtkï wɛt duiyë week, ku cïtkï kon tɔ̈u në wenyïïn. Ku acïn raan tök në weyiic, raan bï döŋ në ee piny piɛth cïï Bɛ̈nydït Nhialicdun gäm week.

¹⁴ “Ku yɛn ë thiɔ̈k wokë thuɔɔu ënɔɔnë. Ku raan ëbɛ̈n në weyiic, aŋic në piɔ̈nde ëbɛ̈n, ka piɛth kiith cïï Bɛ̈nydït Nhialicdun looi, në luɔi cï yen we gäm këriëëc ë cï than ëbɛ̈n.

¹⁵ Cït man cïï thön piɛth kiith wään cïï Bɛ̈nydït Nhialicdun than tiiŋ kedhie, yen luɔi bïï këriëëc kɔ̈k cï lueel ëbɛ̈n ŋoot ke ke tiiŋ röt ka aya. Acï lueel aa bï we tɔ yök ë riääkdït në ee piny piɛɛth cï gäm weekë.

¹⁶ Të la wek löŋ de Bɛ̈nydït Nhialicdun dhoŋ kɔ̈u, löŋ cï thɔ̈n week, ku lak yiëth kɔ̈k lam, ku luöikï keek, Bɛ̈nydït abï gɔ̈th ke week arëët, ku riëëk week arëët në piny piɛth cï gäm week.”