Jocua 21 - JAM DE NHIALIC 2011

Wuöt ke Kɔc ke Lebai

¹ Go bänydït ke baai de Lebai lɔ tëde Eleyadhar bɛ̈ny de kake Nhialic, ku lekkï tëde Jocua wën ë Nun, ku lekkï tëde bänydït ke dhiëën ke Yithriɛl thook kedhie.

² Ku lëk keek ëtɛ̈ɛ̈n në Cilo piny e Kanaan an, “Bɛ̈nydït acï Mothe yɔ̈ɔ̈k ɣɔn në luɔi bï wo miɔɔc në wuöt bïï wok rëër thïn, ku lɔ tëde nyuäth në kelɔ̈m bï ɣɔ̈kkuɔ aa nyuäth thïn.”

³ Ago kɔcke Yithriɛl kɔc ke Lebai miɔɔc në wuöt ku tëde nyuäth në piinyken yiic, cït man cïï Bɛ̈nydït ye lueel.

⁴ Gaak tueŋ aa kɔn löny kekë dhiën ë Koɣath. Ku dhiën ke Aron bɛ̈ny de kake Nhialic kek aa gëmë ke pɛ̈ɛ̈nydït kathiëër ku diäk në dhiëën ke Juda, kekë Thimion ku Benjamin.

⁵ Ku biäk de dhiën e Koɣath aa gëmë wuöt kathiëër piny de Eparaim kekë Dan, ku biäk de Manatha.

⁶ Ku dhiën e Gercon aa gëmë wuöt kathiëër ku diäk piny de Yithakar kekë Acer, ku Naptali, ku biäk de Manatha däŋë.

⁷ Ku ɣööt ke dhiën de Merari aa gëmë ke wuöt kathiëër ku rou piny de Ruben, kekë piny de Gad ku piny de Dhebulun.

⁸ Kɔc ke Yithriɛl acïk wuötkë bɛ̈n gäm kɔc ke Lebai në piinykɛn ke nyuäth në gɛk cït man cïï Bɛ̈nydït e lɛ̈k Mothe ɣɔn.

⁹ Rin ke wuöt kï wuöt ɣɔn nöm ke piny e Juda kekë Thimion ku gëmë ke

¹⁰ dhiën e Koɣath mïth ke Aron ku ye kuat de Lebai. Ee kek ë kɔn ë miɔɔc tueŋ.

¹¹ Aake gëmë ke Kiriath Arba (Arba yen aye wun Anak) ku acɔl Ɣebron kekë tëde nyuäth tɔ̈u në yelɔ̈ɔ̈m në piny ë kuur de Juda yic.

¹² Ku duum ayï pänydït ku bɛ̈i thiääk në yen, aake yök acï ke kɔn gäm Kalep wën e Jepuna ke ye kake.

¹³ Ku gëmë Ɣebron kuat de Aron, bäny ke kake Nhialic (Ɣebron aaye wun ë luääk). Ku gëmkï keek wuöt kɔ̈k ayadäŋ piinykɛn ë luääk: Libna,

¹⁴ ku Jatir, ku Ecetemowa,

¹⁵ ku Ɣolon, ku Debir,

¹⁶ ku Ayin, ku Juta, ku Beth Cemec. Kek pɛ̈ɛ̈nydït kadhoŋuan ë gëmë dhiëën kaarou ka, dhiën ë Juda kekë dhiën ë Thimion.

¹⁷ Ku wuöt kɔ̈k ë gëmë keek kï kaŋuan piny de dhiën ë Benjamin: Gibiɔn kekë Geba,

¹⁸ ku Anathoth, ku Almon në piinykɛn ë nyuäth nu në kelɔ̈m.

¹⁹ Kek ee wuötkë kathiëër ku diäk ku piinykɛn ke nyuäth, kek aa gëmë bäny ke kake Nhialic, kuat de Aron.

²⁰ Ku ɣööt baai ke Koɣath, në dhiën ë Lebai, cï gäm wuöt kɔ̈k në piny de Eparaim.

²¹ Aake gëmë Cekem, në piny ë kuur de Eparaim yic (Cekem aaye wun ë Luääk), ku gëmë ke Gedher,

²² ku Kibdhaim, ku Bethɣaron. Aake ye wuöt kaŋuan në piinykɛn ke nyuäth.

²³ Ku gëmë dhiën ë Dan keek wuöt kɔ̈kë kaŋuan në piinykɛn ke nyuäth: Eleteke kekë Gibethon,

²⁴ ku Aijalon, ku Gathrimon.

²⁵ Ku gëmë ë biäk de dhiën ë Manatha nu të lɔ aköl athɛ̈i keek wuöt kaarou Taanak kekë Gathrimon, në piinykɛn ë nyuäth.

²⁶ Kek ee wuötkë kathiëër në piinykɛn ë nyuäth, kek aa gëmë ke ɣööt baai ke Koɣath de dhiën ë Lebai.

²⁷ Ku ɣööt baai ke Gercon në biäk ë dhiën ë Manatha nu të lɔ aköl amiäk. Aake cï gäm Golan në Bacan (Golan aaye wun ë thiaan).

²⁸ Ku gëmë ë dhiën ë Yithakar keek Kicion kekë Daberath,

²⁹ ku Yamuth, ku Enganim, ku piinykɛn ë nyuööth tɔ̈u në kelɔ̈m.

³⁰ Ku gëmë ë dhiën ë Acer keek wuöt kaŋuan në piinykɛn ë nyuäth, Mical kekë Abadon,

³¹ ku Ɣelkath, ku Reɣop.

³² Ku gëmë ë dhiën ë Naptali keek wuöt kadiäk, në piinykɛn, ë nyuäth, Kedec në Galili (Kedec aaye wun ë Luääk), ku Ɣamoth Dor, ku Katan.

³³ Kek ee wuötkë kathiëër ku diäk, në piinykɛn ke nyuäth, kek aa gëmë ɣööt baai ke Gercon de dhiën ë Lebai.

³⁴ Ku ɣööt kɔ̈k ke Lebai ë cï döŋ piny, ɣööt baai ke Merari, acï ke bɛ̈n gäm wuöt kɔ̈k piny ë Dhebulun në piinykɛn ke nyuäth. Aake gëmë Jokniim, ku Katath,

³⁵ ku Dimna, ku Naɣalal.

³⁶ Ku gëmë ë dhiën ë Ruben keek wuötkë kaŋuan, në piinykɛn ë nyuäth, Bedher kekë Jaɣadh,

³⁷ ku Kedemoth, ku Mepaath.

³⁸ Ku gëmë ë dhiën ë Gad keek wuötkë kaŋuan, në piinykɛn ke nyuäth, Ramoth në Giliyad (Giliyad aaye wun ë luääk), ku Maɣanayim,

³⁹ ku Ɣecbon, ku Yadher.

⁴⁰ Kek ee wuötkë kathiëër ku rou, në piinykɛn ke nyuäth, kek aa gëmë ɣööt baai ke Merari de dhiën ë Lebai.

⁴¹ Wuöt kathiërŋuan ku bɛ̈t në piinykɛn ë nyuäth kek aa gëmë Lebai

⁴² Ku wut ëbɛ̈n, në wuötkɛn ë gëmë keek a de nɔm piny ë nyuäth ë yekëc.

Yithriɛl Anöm Piny

⁴³ Ago Bɛ̈nydït Yithriɛl jɔ gäm piny ëbɛ̈n, piny ɣɔn cï thɔ̈n kuarken an bï gäm keek. Na ɣɔn, acïk piny nööm, ke ke jɔ piɔ̈ɔ̈t thïn.

⁴⁴ Ago Bɛ̈nydït ke gäm mät cït man wään cï en ë thɔ̈n kuarken. Acïn raan tök në kɔc de kek ater cï kɔ̈ɔ̈c bɛ̈n lëu në kenïïm, në biäk ë cïï Bɛ̈nydït ke gäm tiëm.

⁴⁵ Ku thön ë cïï Bɛ̈nydït thɔ̈n baai de Yithriɛl ëbɛ̈n, acïk rɔt bɛ̈n looi cït ee manë.