Jocua 20 - JAM DE NHIALIC 2011

Wuöt ke Thiaan

¹ Ku jɔ Bɛ̈nydït Jocua yɔ̈ɔ̈k an,

² “lɛ̈kë kɔc ke Yithriɛl e ke guik pɛ̈ɛ̈nydït ke thiaan cït man ɣɔn cän e lɛ̈k Mothe le guiëër week.

³ Ke raan cï raan wääth nɛ̈k abï aa kat ke lɔ thïn, ke cïï raan kɔɔr an guur raan cï thou en bï yök ku nɛ̈k.

⁴ Të cï yen kat ke lɔ wun tök në ee wuötkë yiic, abïï ë kɔc lɛɛr ë kal thok, kal ë wut, ku tët röördït ke wut kë cï rɔt looi. Ku ëtɛ̈ɛ̈n, abïï röördït ke wut en jɔ tɔ lɔ wut, ku gëmkï tëde rëër ku tɔkï rɛ̈ɛ̈r ke keek.

⁵ Ku të cïï raan kɔɔr en yen kuany cök ëtɛ̈ɛ̈n, acïï kɔc ke wut en bï gäm raan e kɔt. Abïk gël në luɔi ë wɛ̈ɛ̈th en raan ke cïn agönh e tɔ̈u në kaamden.

⁶ Ku abï rëër ëtɛ̈ɛ̈n gut të bïï ë jamde kɔn guiir në akutnɔm nɔm ku agut të bï bɛ̈nydïït ë kake Nhialic kɔn thou, bɛ̈nydïït ë lui në akööl e bïï yen në. Ku ëtɛ̈ɛ̈n aduëër rɔt jɔ pɔ̈k wunden, të ɣɔn ë kɔt en thïn.”

⁷ Agokï Kedec lɔc në Galili në piny ë kuur de Naptali yic, ku lɔckï Cekem në piny ë kuur de Eparaim yic, ku lɔckï Ɣebron në kur ke Juda yiic.

⁸ Ku lɔckï Bedher në jɔ̈ɔ̈ric ë Jordan kɔ̈u të lɔ aköl amiäk de Jeriko, ku Bedher nu ë jɔ̈ɔ̈ric piny de Ruben, ku lɔckï Ramoth në Giliyad, në piny de Gad ku lɔckï Golan në Bacan, në piny de Manatha.

⁹ Kek wuöt ke thiaan ka, wuöt ɣɔn kuɛ̈ny ë kɔc ke Yithriɛl kedhie ayï kɔc lei rɛ̈ɛ̈r në keek. Raan ëbɛ̈n, raan cï raan wääth aaye lɔ thiaan ëtɛ̈ɛ̈n në baŋ de raan kɔɔr an, bï raan ë näk guöör, ku acïï duëërë nɔ̈k ke jamde ë kënë kɔn lueel në akutnɔm nɔm.