Jocua 2 - JAM DE NHIALIC 2011

Jocua Atooc Nëëm Jeriko

¹ Na ɣɔn, ke Jocua wën ë Nun ë tooc nëëm kaarou në wun cɔl Akacia, ke kuc kɔc. Lëk keek an, “Lak caathkï piny, ayï wun dïït de Jeriko guöpde. Na wën, acï nëëm ɣet Jeriko, ke ke lɔ ɣön ë tiiŋ akɔɔrröör cɔl Raɣap.

² Na wën, ke piŋ ë melik de Jeriko luɔi de yen nëëm ke Yithriɛl cï bɛ̈n bïk piny bɛ̈n neem.

³ Go jam tɔ yïnë Raɣap lueel an, “Kɔc cï nyuc baaidu, bɔ̈ bïk piny bɛ̈n neem ëbɛ̈n! Ka yïn bɛ̈ɛ̈iyë keek bei!”

^4-5 Ku Raɣap acï nëëm thiaan kaarou. Go lueel an, “Ë yic, kɔc cï bɛ̈n baaidï, kɔc kuöc të ë bïï kek thïn. Ku acïk bɛ̈n jäl ee tëthiin wën le akɔ̈l pinyë. Ke kal ë wut ë kënë guɔ thiöök thok. Ku kueer cïk dɔmic akuöc. Ka week, dapkï ke cop cök. Abäk keek dhiɛl lɔ gïth.

⁶ (Ku acïï tik ke lɛɛr nhial ɣönde nɔm, le ke thiaan në bel ke rap thäär piny, bel nu ɣöt nɔm nhial.)

⁷ Go kɔc ke melik nëëm cop cök tëkkï në kueer ee lɔ të ye wɛ̈ɛ̈r de Jordan teem kɔ̈u. Na wën, aa jël ë kɔc cop nëëm cök, ke kal ë pänydït ë thiök thok.

⁸ Na wën, ŋoot ë nëëm ke ke kën guɔ tɔ̈c, ke Raɣap ë lɔ nhial ë ɣöt nɔm, le lɛ̈k keek an,

⁹ “Aŋiɛc luɔi cï Bɛ̈nydït we gäm ee pinyë. Raan ëbɛ̈n në woyiic, ë riɔ̈ɔ̈c në week.

¹⁰ Acuk piŋ luɔi ë cïï Bɛ̈nydït Abäpdit thith tɔ dëu, ɣɔn jäl wek ë Rip. Ku acuk piŋ ayadäŋ, luɔi cä wek meliik ke Amor riɔ̈ɔ̈k kaarou taitai, yï Thiɣon kekë Og, në wɛ̈ɛ̈r de Jordan kɔ̈u baŋ të lɔ aköl amiäk.

¹¹ Wok aa cïï riɔ̈ɔ̈c dɔm ɣɔn piŋ wok en, goku röt päl wei aläl në këdun. Bɛ̈nydït Nhialicdun Yen aye Nhialic de paannhial ku piny.

¹² Ku ënɔɔnë, kuɛ̈ɛ̈ŋkï në Nhialicdun, nɔn bä wek baaida looi apiɛth wadäŋ, cït man luɔi ɛn week apiɛth ënɔɔnë. Ku nyäŋkï yɛn kë bän e ŋic nɔn bä wek en looi.

¹³ Lɛ̈kkï yɛn nɔn bä wek awuur ŋiëc kony, kekë amaar, ayï mïthëkɔckuɔ, ayï nyïïrëkɔckuɔ në bɛ̈iken kedhie, ku cäkkï wo bï tɔ näk.”

¹⁴ Go nëëm lɛ̈k en an, “Wëikuɔ ayek nïïm wëikun! Të kɛ̈n wek wook luɛɛl, ke wek buk ŋiëc looi apiɛth në piɔ̈nda ëbɛ̈n wadäŋ, të le Bɛ̈nydït wo gäm ee pinyë.”

¹⁵ Ku Raɣap aa rɛ̈ɛ̈r ɣön cï yiëk ë kal ë pänydït kɔ̈u, go nëëm luaai piny awëërnyin në awiɛɛi.

¹⁶ Ku lëk keek an, “Lakï ë kuriic, ke we cïï kɔc ke melik bï gïth. Lak thiaankï ëtɛ̈ɛ̈n në nïn kadiäk, agut të bï kek kenïïm kɔn puk. Ku ëtɛ̈ɛ̈n, jakï bɛ̈n baaric.”

¹⁷ Ago nëëm lɛ̈k en an, “Gutguutduön cï yïn wok tɔ kuëëŋë abuk döt.

¹⁸ Ku kë bä looi kï: kööl peec wok wut, ke yï ruk lupɔ thith awëërnyin, awër wën bïï yïn wo bei. Ku bɛ̈ɛ̈iyë baaidun ɣöndu kedhie, yï wuur, ayï moor, ayï mïthëkɔckun.

¹⁹ Ku raan ëbɛ̈n, raan lɔ bɛ̈n bei ɣööt ku le thou, ke gääkde anu në yeyeth yetök, acïï bï aa këda. Ku na de raan lɔ dɛ kë yök en ɣööt, ka bï nɔm aa wook.

²⁰ Ku na lɔ kë loiku luɛɛl, ke wok cïï gutguut cïï wok kuëëŋ në yïn bï bɛ mukic.

²¹ Ago gam, ku tɔ ke jël. Na wën, acïk jäl, ke Raɣap ë ruk lupɔ thith awëërnyin.

²² Na wën, ke nëëm ë ke lɔ në kuriic, lek thiaan ëtɛ̈ɛ̈n. Go kɔc ke melik keek lɔ kɔɔr në kueer kɔ̈u ëbɛ̈n, në nïniic kadiäk, ku cïkkï keek yök. Agokï röt pɔ̈k Jeriko.

²³ Na ɣɔn acïk nïn aa diäk, ke nëëm ë ke löök bɛ̈n bei kaarou në kuriic, ku temkï kiir, pukkï kenïïm Jocua.

²⁴ Agokï Jocua lɔ guiëër këriëëc cïk yök ëbɛ̈n, luelkï an, “Acuk yök ë gök luɔi cïï Bɛ̈nydït wo gäm piny ëbɛ̈n. Kɔc nu ëtɛ̈ɛ̈n kedhie, ariɔ̈ckï aläl në wook.”