Jocua 17 - JAM DE NHIALIC 2011

Biäk de Manatha Tɔ̈u të lɔ Aköl Athɛ̈i

¹ Ku piny biäk acï gäm bɛ̈i ke dhiën ë Manatha wën kɛ̈i de Jothep, ku Makir yen aye wën kɛ̈i de Manatha, ku yen aye wun Giliyad. Ku Makir aaye jön riil ë tɔŋ, ago dhiën gäm piny ë Giliyad kekë Bacan.

² Ku gëmë piny däŋë bɛ̈i kɔ̈k ke dhiën ë Manatha yï: Abiedher kekë Ɣelek, ku Athril, ku Cekem, ku Ɣeper, ku Cemida. Ku keek ayek wɛ̈ɛ̈t ke dhiën ke Manatha, wën ë Jothep. Ku kek aaye kɔc nu në dhiën nïïm.

³ Ku Dhelopad acïn mïthwät ë cï dhiëëth, aa dhiëth duet kapäc. Ku duetke acɔl ke Mala ku Nowa, ku Ɣogla, ku Milka ku Tirdha. Ku Dhepeɣad ee wën ë Ɣeper de Giliyad de Makir de Manatha.

⁴ Ago duet ke Dhepeɣad bɛ̈n tëde Eleyadhar bɛ̈ny de kake Nhialic, ku Jocua wën ë Nun, ku bäny ke Yithriɛl nu në kɔc nïïm. Ku lëkkï keek an, “Acïï Bɛ̈nydït lɛ̈k Mothe ɣɔn, an gëm wo piny cït man ë piiny gëmë mïthwät.” Agokï kë cïï Bɛ̈nydït lueel piŋ, ku gëmkï duet piny cït piiny cïk gäm mïthwät.

⁵ Yen aa jɔ dhiën ë Manatha piiny kathiëër nööm të cïn piny ë Giliyad kekë Bacan në Jordan lɔŋ të lɔ aköl amiäk.

⁶ Në luɔi ë cïï wɛ̈ɛ̈tken miɔɔc ë piny, ayï duetken. Ku piny de Giliyad acï bɛ̈n tɛ̈k dhiën kɔ̈k ke Manatha.

⁷ Ku piny de Manatha, aa jël Acer agut cï Micemethath, në Cekem kɔ̈u të lɔ aköl amiäk. Ku jäl akeu ëtɛ̈ɛ̈n, ke wel enɔm wöuwic, agut cï piny ë Entapua.

⁸ Ku piny nu në Tapua lɔ̈ɔ̈m ëbɛ̈n aaye piny ë Eparaim, ee Tapua yetök yen ë ye këde Manatha.

⁹ Ku tëk akeu le në nyin Kana kɔ̈u. Ku pɛ̈ɛ̈nydït ke Manatha nu në nyin nɔm baŋ të lɔ wöuwic, aake ye pɛ̈ɛ̈nydït ke Eparaim. Ku jäl akeu ëtɛ̈ɛ̈n në Manatha baŋ të lɔ rut le guöt ë Wɛ̈ɛ̈rdïït ɣer kɔ̈u.

¹⁰ Ku piny baŋ të lɔ wöuwic, aaye piny de Eparaim, ku piny baŋ të lɔ rut aaye piny de Manatha. Ku akenden në baŋ të lɔ aköl athɛ̈i, aaye Wɛ̈ɛ̈rdïït ɣer. Ku aake de akeu në Acer, në biäk të lɔ rut. Ku dekï akeu në Yithakar në biäk të lɔ aköl amiäk.

¹¹ Ku në piny ë Yithakar kekë Acer, ku Beth Can kekë Yibiliim, aake ye wuöt ke Manatha. Ayï bɛ̈i thiääk në keek, ku ayï Dor kekë bɛ̈i thiääk në yen, ku Endor kekë bɛ̈i thiääk në yen, ku kɔc ceŋ Taanak, ayï bɛ̈i thiääk në yen, ku kɔc cieŋ Megido, ayï bɛ̈i thiääk në yen, ku wun ye wuöt diäk ee Napoth. Ku keek Kedhie ayek wuöt ke Manatha.

¹² Ku kɔc ke Manatha akënkï kɔc cieŋ ee pɛ̈ɛ̈nydïtkë bɛ̈n lëu në cup, ka kɔc ke Kanaan aake ŋoot ke ke cieŋ piny.

¹³ Na ɣɔn aa cï kɔc ke Yithriɛl riɛl, ke ke ye kɔc ke Kanaan tɔ luui keek në riɛl, ku akënkï ke tɔ jël.

Kɔc ke Eparaim ku Kɔc ke Manatha nu të lɔ Aköl Athɛ̈i Akɔɔrkï Piiny Kɔ̈k

¹⁴ Ago dhiën ë Jothep lɛ̈k Jocua an, “Eeŋö gëm yïn wook biäk töŋ ë piny, ku wok juëc arëët? Wok cïï Bɛ̈nydït thieei, ka wok ë kɛɛr arëët.”

¹⁵ Go Jocua bɛ̈ɛ̈r an, “Na cäk juëc, ku cïï piny ë kuur de Eparaim we be lɛɛr, ke we lɔ në roor ë kɔc ke Peridh yic kekë roor de Repaim, lak yiëpkï röt piny ëtɛ̈ɛ̈n, piny rɛ̈ɛ̈r wek thïn.”

¹⁶ Ago dhiën ë Jothep puk nɔm an, “Ë yic, piny ë kuur ë Eparaim akoor, acïï wo leer, ka töŋ jɔ nu cie luɔi de kɔc ke Kanaan nïïm abëël ke wëëth kedhie, abëël ke tɔŋ ke Kanaan rɛ̈ɛ̈r Beth Can, ayï kɔc rɛ̈ɛ̈r në bɛ̈i thiääk në yen, ayï kɔc rɛ̈ɛ̈r në Wak ë Jedhreel.

¹⁷ Go Jocua jɔ lɛ̈k Eparaim kekë Manatha an, “Wek juëc ë yic, ku wek ril aläl ayadäŋ. Wek bï ŋuak në piny.

¹⁸ Nämkï piny ë kuur, na cäk aa nɔn yen roorë, abäk yɛp piny ëbɛ̈n, ku takï ee pinydun. Ku na ee biäk de kɔc ke Kanaan, abäk keek tiaam, ku cuɔpkï keek, na cakaa nɔn riil kek, ku dekï nïïm abëël riil ke tɔŋ, abëël ke wëëth.”