Jocua 16 - JAM DE NHIALIC 2011

Piny cï Gäm Eparaim ku Biäk de Dhiën ë Manatha nu të lɔ Aköl Athɛ̈i

¹ Ku piny ë gëmë dhiën ke wɛ̈ɛ̈t ke Jothep, agɔl rɔt në Jordan kɔ̈u në Jeriko, të tiŋ awɛɛŋ ke pïïu ke Jeriko kɔ̈ɔ̈th të lɔ aköl amiäk, ku le ë jɔ̈ɔ̈ric ku jël Jeriko le nhial në piny ë kuur lee Bethel.

² Ku jël Bethel gut Ludh, bɛɛric Ataroth Addar, piny ë Arkai.

³ Ku gut rɔt të lɔ aköl athɛ̈i, le piny de Japaletai, ku ɣeet piny thuuth de Bethɣaron. Ku Bɛɛric Gedher ale guut në Wɛ̈ɛ̈rdïït ɣer kɔ̈u.

⁴ Yen piny ë nööm ë dhiën ke wɛ̈ɛ̈t ke Jothep ka ke ye pinyden: Eparaim kekë biäk de dhiën ë Manatha tɔ̈u të lɔ aköl athɛ̈i.

Dhiën ë Eparaim

⁵ Piny ë gëmë ɣööt ke dhiën ë Eparaim kï: Akenden agɔl rɔt në Ataroth Addar, ku cök rɔt të lɔ aköl amiäk le nhial Bethɣaron,

⁶ ku bɛɛric Wɛ̈ɛ̈rdïït ɣer kɔ̈u, dhɛ̈ŋ Micemethath të lɔ rut. Ku lɔ akeu rɔt tiɔ̈ɔ̈t Taanath Cilo të lɔ aköl amiäk, ku bɛɛric Janowa të lɔ aköl amiäk.

⁷ Ku gut piny ee tëëk në Janowa le Ataroth Addar ku Naara, ku ɣeet Jeriko le guöt ë Jordan kɔ̈u.

⁸ Ku jäl akeu në Tapua le në nyin ë Kana, ku le guut në Wɛ̈ɛ̈rdïït ɣer kɔ̈u. Yen piny ë bɛ̈i ke dhiën ke Eparaim ka, ke ye pinyden.

⁹ Wuöt ku bɛ̈i juëc nu piny ë Manatha, ku acïï kɔc ke Eparaim ke bɛ̈n nööm.

¹⁰ Ku kɔc ke Eparaim akënkï kɔc ke Kanaan bɛ̈n cuɔp wei në Gedher, ka kɔc ke Kanaan aŋootkï kekë rɛ̈ɛ̈r në kɔc ke Eparaim agut cï ye köölë ka acïk aa lïïm ke Eparaim.