Jocua 15 - JAM DE NHIALIC 2011

Piny cï Gäm Juda

¹ Ku piny ë gëmë bɛ̈i ke dhiën ë Juda kï: Agɔl rɔt në piny Edom thok, ku ɣeet ë jɔ̈ɔ̈r de Dhin të lɔ wöuwic.

² Ku akende biäk të lɔ wöuwic atëk në Wɛ̈ɛ̈r de Amilɔ thok të lɔ wöuwic,

³ ku cök yenɔm wöuwic në Akrabim, ku bɛɛric Dhin. Ku tëëk në Kadec Barniya baŋ të lɔ wöuwic, ku le tëëk Ɣedheron, ku bɛɛric Addar, ku le rɔt puɔ̈k Karka.

⁴ Ku le tëëk Adhemon ke dɔm nyinic në aken ë Rip nɔm, agut cï Wɛ̈ɛ̈rdïït ɣer të ye akeu guut ka. Yen aken ë Juda ka baŋ të lɔ wöuwic.

⁵ Ku aken ë Juda në baŋ të lɔ aköl amiäk, agɔl rɔt në Wɛ̈ɛ̈r de Amilɔ agut cï wɛ̈ɛ̈r de Jordan thok. Ku aken ë Juda në baŋ të lɔ rut, agɔl ëtɛ̈ɛ̈n,

⁶ ku tëëk në Beth Ɣogla, ku le tëëk ë baŋ të lɔ rut në Beth Araba, ku bɛɛric në kuur de Boɣan wën ë Ruben,

⁷ ku tëëk akeu në wak de Akor, ku le Debir, ku bɛɛric të lɔ rut, ku le rɔt puɔ̈k Gilgal ke tuööm nɔm kekë Adumim nu në wak thok të lɔ wöuwic. Ku tëëk në awɛɛŋ ke pïïu ke Encemec, ku bɛɛric Enrogel,

⁸ ku tëëk në bäny de Ɣinom, në kuur baŋ të lɔ wöuwic, kuur ɣɔn nu ë Jeruthalem de kɔc ke Jebuth ë yelɔ̈ɔ̈m. Ku tëk akeu në kuur nɔm në bäny de Ɣinom baŋ të lɔ aköl athɛ̈i, në Repaim thok të lɔ rut.

⁹ Ku bɛɛric ëtɛ̈ɛ̈n, le në nyin ë pïïu ke Neptowa, Ku bɛɛric pɛ̈ɛ̈nydït thiääk në kuur Eperon. Ku le rɔt puɔ̈k Baala ëtɛ̈ɛ̈n (Baala yen aye Kiriath Jiriim),

¹⁰ ku le rɔt tiɔ̈ɔ̈t kuur ë Their në Baala baŋ të lɔ aköl athɛ̈i, ku tëëk në Kuur ë Jirim kɔ̈u baŋ të lɔ rut (Jiriim yen acɔl Cathalon ayadäŋ), ku tëëk ë Beth Cemec, ku le Timena winy thok.

¹¹ Ku tëëk akeu në kuur de Ekeron baŋ të lɔ rut, ku tiööt rɔt Cikeron, ku bɛɛric kuur ë Baala, ku tëëk në Jamina, ku le guut në Wɛ̈ɛ̈rdïït ɣer kɔ̈u.

¹² Yen aken ë Juda baŋ të lɔ aköl athɛ̈i ka. Yen piny ë cieŋ ë kɔc ke Juda ka.

Kalep Apec Ɣebron kekë Debir

¹³ Ku piny de Juda biäk, acïï Jocua bɛ̈n gäm Kalep, wën ë Jepuna cït man wään cïï Bɛ̈nydït ye thɔ̈n Jocua. Acïï Jocua bɛ̈n gäm Ɣebron wun Arba (Arba yen aye wun Anak)

¹⁴ Ago Kalep mïth ke Anak cuɔp wei wut, cop dhiën ë Cecai, ku dhiën ë Aɣiman, ku dhiën ë Talmai.

¹⁵ Ku jël Kalep ëtɛ̈ɛ̈n, lee tɔŋ Debir. (Debir aaye kɔn cɔɔl ɣɔn an Kiriath Theper)

¹⁶ Aa cïï Kalep lueel an, Aketha nyandï, abä gäm raan lɔ Kiriath Theper rum.

¹⁷ Ago Othaniɛl, wën ë Kenadh mɛnhkënë Kalep wut rum. Go Kalep en gäm Aketha nyande, tɔ ye tik.

¹⁸ Na wën, në kööl de thiëëk, go Othaniɛl lɛ̈k Acetha an, “Lip wuur në dom.” Na wën, ke Acetha lɔ piny ë muul kɔ̈u, go Kalep en luɔp në kë kɔɔr.

¹⁹ Go lɛ̈k en an, “Yɛn kɔɔr miɔ̈c däŋ: yïn ë ya gäm piny nu ë jɔ̈ɔ̈ric, ka yïn gäm ë yɛn awɛɛŋ ke pïïu ayadäŋ. Go Kalep en gäm awaŋ ë pïïu nu tëthöny nhial kekë awaŋ nu tëthuth piny.

Wuöt ke Juda

²⁰ Yen piny ë gëmë kɔc ke Juda kï në bɛ̈iken kedhie.

²¹ Pɛ̈ɛ̈nydïtkɛn nu në piny thok ya, të lɔ wöuwic në aken Edom lɔ̈ɔ̈m ee Kabedhiil kekë Eder, ku Jagur,

²² ku Kina, ku Dimona, ku Adada,

²³ ku Kedec, ku Ɣadhor ku Yithnan,

²⁴ ku Dhip, ku Telem, ku Biiloth,

²⁵ Ku Ɣadhor Ɣadata, ku Kerioth Ɣedheron (yen aye Ɣadhor),

²⁶ ku Amam, ku Cema ku Molada,

²⁷ Ɣadhar Gada Ku Ɣecmon, ku Bethpelet,

²⁸ ku Ɣadharcual, ku Biirceba, ku Bidhiothia,

²⁹ Ku Baala, ku Yim, Yethem,

³⁰ ku Eletolad, ku Kethil, ku Ɣorma,

³¹ ku Dhiklak, ku Madmana, ku Thanthana,

³² ku Lebawoth, ku Ciliɣim, ku Ayin, ku Rimon. Keek kedhie, ayek pɛ̈ɛ̈nydït kathiërrou ku dhoŋuan, ayï bɛ̈i nu ë kelɔ̈m.

³³ Ku wuöt nu ë kur thäär ee Ectawol kekë Dhora, ku Acena,

³⁴ ku Dhanodawa, ku Enganim, ku Tapua, ku Enam,

³⁵ ku Yarmuth, Adulam, ku Thokoth, ku Adheka,

³⁶ ku Caaraim, ku Adithaim, ku Gedera, ku Gederothaim: kedhie ye pɛ̈ɛ̈nydït kathiëër ku ŋuan, në bɛ̈i tɔ̈u në kelɔ̈m.

³⁷ Ku wuötkɛn kɔ̈k ee yï Dhenan, kekë Ɣadaca, ku Migdalgad,

³⁸ ku Diliin, ku Midhpa, ku Jokthiil,

³⁹ ku Lacic, ku Bodhkath, ku Egolon,

⁴⁰ ku Kabon, ku Lamam, ku Citlic,

⁴¹ ku Gederoth, ku Bethdagon, ku Naama, ku Makeda: kedhie ayek pɛ̈ɛ̈nydït kathiëër ku dhetem, në bɛ̈i nu në kelɔ̈m.

⁴² Ku wuöt kɔ̈k ee yï Libna, ku Ether, ku Acan,

⁴³ ku Yipta, ku Acena, ku Nedhib,

⁴⁴ ku Keila, ku Akedhip, ku Mareca: kedhie ayek pɛ̈ɛ̈nydït kadhoŋuan në bɛ̈i nu në kelɔ̈m.

⁴⁵ Ekeron kekë wuötke ayadäŋ, kekë bɛ̈i thiääk në yen kedhie: wuötdït ku wuötkor,

⁴⁶ ku bɛ̈i nu në Acedɔd lɔ̈ɔ̈m kedhie, gɔl në Ekeron le ë Wɛ̈ɛ̈rdïït ɣer.

⁴⁷ Ku lɔ Acedɔd kekë Gadha, në bɛ̈i thiääk në keek kedhie, wuöt ku bɛ̈i alɔ gut në nyin kɔ̈u në aken ë Rip nɔm, ku Wɛ̈ɛ̈rdïït ɣer yɔu.

⁴⁸ Ku wuötkɛn nu piny ë kuur, ee Camir kekë Jatir, ku Thokoth,

⁴⁹ ku Dana, ku Kiriath Theper (yen aye Debir),

⁵⁰ Ku Anab ku Ecetemowa, kekë Anim,

⁵¹ Gocen, Ku Ɣolon ku Gilo: kedhie ye pɛ̈ɛ̈nydït kathiëër ku tök, në bɛ̈i thiääk në keek.

⁵² Ku wuötkɛn kɔ̈k ee Arab kekë Duma, ku Ecan,

⁵³ ku Yanim, ku Beth Tapua, ku Apeka,

⁵⁴ ku Ɣimta, ku Ɣebron, ku Dhiyor: kedhie ayek pɛ̈ɛ̈nydït kadhoŋuan në bɛ̈i thiääk ë keek

⁵⁵ Ku wuötkɛn kɔ̈k ee Mawon kekë Karmel, ku Dhip, ku Juta,

⁵⁶ ku Jedhreel, ku Yokdiin, ku Dhanowa,

⁵⁷ ku Kain ku Gibia, ku Timena: kedhie ayek pɛ̈ɛ̈nydït kathiëër në bɛ̈i thiääk në keek.

⁵⁸ Ku Ɣalul kekë Bethdhur, ku Gedor,

⁵⁹ ku Maarath ku Bethanath, ku Eltekon: kedhie ayek pɛ̈ɛ̈nydït kathiërrou në bɛ̈i thiääk në keek.

⁶⁰ Ku pɛ̈ɛ̈nydïtkɛn kɔ̈k ee Kiriath Baal (yen aye Kiriath Jiriim ayadäŋ) ku Raba, ayek pɛ̈ɛ̈nydït kaarou në bɛ̈i thiääk në keek

⁶¹ Ku wuötkɛn ë nu në jɔ̈ɔ̈ric, ee Araba kekë Midin, ku Thekaka,

⁶² ku Nibcan Pänydït de Amilɔ, ku Engedi: kedhie ayek pɛ̈ɛ̈nydït kadhetem në bɛ̈i thiääk në keek.

⁶³ Ku kɔc ke Juda akënkï kɔc ke Jebuth bɛ̈n lëu në cup, kɔc ɣɔn rɛ̈ɛ̈r ëtɛ̈ɛ̈n në kɔc ke Juda ëtök.