Jocua 14 - JAM DE NHIALIC 2011

Tëŋ de Piny Tɔ̈u në Jordan Kɔ̈u të lɔ Aköl Athɛ̈i

¹ Eleyadhar bɛ̈ny de kake Nhialic, kekë Jocua wën ë Nun, ku bäny nu në dhiëën ke Yithriɛl nïïm, cï piny ë Kanaan tɔ̈u të lɔ aköl athɛ̈i tɛ̈k kɔc ke Yithriɛl tɔkï ee pinyden.

² Ku piny de dhiëënkë kadhoŋuan, ku biäk de dhiën ë Manatha, aa tek në gɛk cït man wään cïï Bɛ̈nydït ë thɔ̈n Mothe.

^3-4 Në luɔi ë cïï Mothe dhiëën kɔ̈kë kaarou, ku biäk töŋ de Manatha gäm piny në Jordan kɔ̈u të lɔ aköl amiäk, ku acïn piny ë cï gäm Lebai. Ku dhiëën ke Jothep aake ye rou, dhiën ë Manatha kekë dhiën ë Eparaim. Ku Lebai acïn piny ë cï gäm keek, ee pɛ̈ɛ̈nydït cieŋkï kapäc kek ë gëmë keek ku gëmë ke të de nyuäth ë ɣɔ̈kken.

⁵ Kɔc ke Yithriɛl acïk piny bɛ̈n tek në gɛk cït man cïï Bɛ̈nydït ë thɔ̈n Mothe.

Ɣebron acï Gäm Kalep

⁶ Ku ëtɛ̈ɛ̈n kɔc ke dhiën ë Juda acïk bɛ̈n lɔ të de Jocua në Gilgal, ke ke cath në Kalep wën ë Jepuna, raan ë Kenidhai. Go Kalep lɛ̈k Jocua an, “Yïn ŋic kë wään lëk ë Bɛ̈nydït Mothe, raan de Nhialic, në Kadec Barniya në biäkdï wokë yïn.

⁷ Yɛn aye run thiërŋuan ɣɔn tooc ë Mothe awun de Bɛ̈nydït yɛn ke nu ë Kadec Barniya, bä ee pinyë bɛ̈n neem. Guɔ bɛ̈n lɔ yiɛ̈n thoŋ piɛth.

⁸ Ku kɔc ë cath në wook, acïk kɔckuɔ bɛ̈n ŋeer piɔ̈ɔ̈th në jam ë bïïkï. Ka ee yɛn ë cï jam ë Bɛ̈nydït Nhialicdï bɛ̈n döt yatök.

⁹ Ku në biäk de ë kënë, Mothe ë bɛ̈n kuëëŋ ee köölë ku lueel an, “E yic, piny lɔ käc nɔm në yïcök, abï ya pinydu wekë mïthku aɣet athɛɛr. Në luɔi cï yïn jam ë Bɛ̈nydït döt ëgɔk.

¹⁰ Ku tiŋ ënɔɔnë, run acïk aa thiërŋuan ku dhïc, të ɣɔn lëk ë Bɛ̈nydït en Mothe. Aa ye akööl ɣɔn ciɛthë Yithriɛl në jɔ̈ɔ̈ric, ku Bɛ̈nydït ë ŋoot ke muk ɛn wëi cït man wään cï yen ë thɔ̈n ɛn. Ku runkï ayek thiërbɛ̈t ku dhïc ënɔɔnë

¹¹ Ku yakï ŋoot ke ya ril cït man akööl ɣɔn tooc ë Mothe yɛn. Yɛn ŋoot ke ya lëu tɔŋ cït man ɣɔn.

¹² Ka yïn, gämë ya piny ë kuur cït man wään cïï Bɛ̈nydït ye than kööl ɣɔn bïï wok thok. Acuk bɛ̈n lɛ̈k yïn nɔn nu jööt ke Anakim në pɛ̈ɛ̈nydït cï gël aril. Go lueel an, Bɛ̈nydït abï tɔ̈u ke yɛn ka abä ke cuɔp wei cït man cïï Bɛ̈nydït ë lueel.”

¹³ Go Jocua Kalep wën ë Jepuna thieei, ku gëm Ɣebron ke ye wunde.

¹⁴ Ku Ɣebron aŋoot ke ye wun ë mïth ke Kalep wën Jepuna raan ë Kenidhai, në luɔi ë cï yen Bɛ̈nydït, Nhialic de Yithriɛl gam thok ëgɔk.

¹⁵ Ɣɔn tueŋ, Ɣebron aaye cɔl pänydït Arba. (Arba yen aaye gökdïït ë raan adhuɛ̈ŋ në kɔc ke Anakim yiic kedhie). Ku piny acï jɔ lɔ̈ŋ kekë tɔɔŋ, piny cï gäm Juda.