Jocua 13 - JAM DE NHIALIC 2011

Piny Ŋoot ke bïï bɛ Peec

¹ Ku Jocua acï jɔ dhiɔp arëët. Go Bɛ̈nydït lɛ̈k en an, “Yïn ë dhiɔp arëët, ku ade piny ŋoot ke kënë guɔ peec.

² Piny de Pilithtia ëbɛ̈n aŋoot ke kënë peec, ayï piny de Gecur,

³ ayï piny de Awim ëbɛ̈n, (gɔl në wak de Ciɣor në aken ë Rip nɔm të lɔ aköl amiäk, ku ɣeet në aken ë Ekeron nɔm të lɔ rut, aaye piny de Kanaan. Ku ade meliik ke Pilithiin ë rɛ̈ɛ̈r ëtɛ̈ɛ̈n kadhïc: Melik de Gadha, ku melik de Acedɔd, ku melik de Acekelon, ku melik de Gath, ku melik de Ekeron.)

⁴ Ku piny de Kanaan biäk të lɔ wöuwic aa ŋoot ke kënë peec, ayï piny de Mira (yen aye piny de Thidonai), ayï piny de Apek në aken ë kɔc ke Amor nɔm.

⁵ Ayï piny de Gebalai, ku piny de Lebanɔn ëbɛ̈n alɔ guut të lɔ aköl amiäk. Gɔl në Baalgad në kuur ë Ɣermon kɔ̈u të lɔ wöuwic, ku winy Ɣamath thok.

⁶ Ku mɛt piny ë kɔc ke Thidon thïn ëbɛ̈n ayï kurkɛn rëër kek thïn, në kaam de piny ë kuur ë Lebanɔn kekë Mithapoth Maim. Kɔckë kedhie abä keek cuɔp wei, të le Yithriɛl ke bɔ̈ thïn. Ku piny abä tɛ̈k kɔc ke Yithriɛl cït man cän e lɛ̈k yïn.

⁷ Ku ënɔɔnë, tɛ̈k ë piny dhiëën cï döŋë kadhoŋuan, ku biäk de Manatha, tɔkï ee pinyden.”

Tëŋ de Piny Tɔ̈u në Jordan Kɔ̈u të lɔ Aköl Amiäk

⁸ Ku piny nu në Jordan kɔ̈u të lɔ aköl amiäk, acïï Mothe, awun ë Bɛ̈nydït tɛ̈k dhiën ë Ruben kekë dhiën ë Gad, ku biäk de dhiën ë Manatha, ka aa cïk nööm ke ye pinyden.

⁹ Ku pinyden agɔl rɔt në Aroyer (në bäny de Arnon thok), ku wundïït nu në wakic cil, ku mɛt kur ke Medeba thïn alɔ guut Dibon.

¹⁰ Ku lee guöt aken de kɔc ke Amor nɔm. Ku mɛt pɛ̈ɛ̈nydït ke kɔc ke Amor ɣɔn cieŋ ë melik Thiɣon thïn kedhie, melik ɣɔn cieŋ Ɣecbon.

¹¹ Ku acï Giliyad mat thïn ayadäŋ, ku piny de Gecur, ku piny de Maaka, ku kur ke Ɣermon kedhie, ku piny de Bacan ëbɛ̈n agut cï Thaleka.

¹² Ku mɛt ciɛɛŋ ë cieŋ ë Og thïn në Bacan, melik ɣɔn thöök ë meliik ke Repaim thäär, melik ɣɔn cieŋ Acetaroth kekë Ederi. Ee Mothe yen ë tiam keek, ku cop ke wei.

¹³ Ku kɔc ke Yithriɛl kën kɔc ke Gecur cuɔp wei, ayï kɔc ke Maaka, ka aŋootkï ke ke rɛ̈ɛ̈r në kɔc ke Yithriɛl agut cï ee köölë.

¹⁴ Ku Mothe acïn piny cï gäm dhiën de Lebi. Cït man cï ë Bɛ̈nydït ye lɛ̈k Mothe, kë bïk nööm ke ee biäkden ee miɔ̈c näk ye nyop në yïïŋ de Bɛ̈nydït Nhialic de Yithriɛl nɔm.

Piny cï Gäm Dhiën ë Ruben

¹⁵ Na ɣɔn, ke Mothe ë gëm piny biäk dhiën ë Ruben cït man ë kuën ë ɣöötken, tɔkï ee pinyden.

¹⁶ Ku pinyden agɔl rɔt në Aroyer (në bäny de Arnon thok), ku wundïït tɔ̈u në wakic cil, ku mɛt kur ke Medeba thïn aya.

¹⁷ Ku mɛt Ɣecbon thïn kekë pɛ̈ɛ̈nydït ke kuriic kedhie: yï Dibon kekë Bamoth Baal, ku Beth Baalmion,

¹⁸ ku Jaɣadh, ku Kedemoth, ku Mepaath,

¹⁹ ku Kiriathaim, ku Thibima, ku Dhereth Caɣar në kuur nɔm ë wakic.

²⁰ Ku Beth Peyor, ku kur ke Pithga nïïm, ku Beth Yecimoth.

²¹ Acï pɛ̈ɛ̈nydït ke kur nïïm mat thïn kedhie në ciɛɛŋ ë cieŋ ë Thiɣon ëbɛ̈n, melik de kɔc ke Amor ɣɔn cieŋ në Ɣecbon. Acï Mothe en bɛ̈n tiaam kekë bäny ke Midian kedhie: yï Epi kekë Rekem, ku Dhur, ku Reba. Keek kedhie ye bäny ke melik Thiɣon.

²² Ku tiët Balaam, wën ë Beyor acï bɛ̈n nɔ̈k në kɔc ke Yithriɛl të ɣɔn nɛ̈k kek kɔc.

²³ Ku wɛ̈ɛ̈r de Jordan yen aaye aken de dhiën ë Ruben të lɔ aköl athɛ̈i. Kek pɛ̈ɛ̈nydït ku bɛ̈i ë gëmë dhiën ë Ruben në ɣöötken thook ka ke ye pinyden.

Piny cï Gäm Dhiën ë Gad

²⁴ Ku Mothe acï piny biäk gäm dhiën ë Gad cït kuën ë ɣöötken, tɔkï ee pinyden.

²⁵ Ku pinyden agɔl rɔt Jadher, ku pɛ̈ɛ̈nydït ke Giliyad, ku biäk de piny de kɔc ke Amor, agut cï Aroyer, në Raba kɔ̈u të lɔ aköl amiäk.

²⁶ Ku gɔl rɔt në Ɣecbon, agut cï Ramath Midhpa, ku Betonim. Ku dɔm në Maɣanayim, agut cï aken de Lodebar.

²⁷ Ku në Jordan yɔu, agɔl rɔt në Beth Ɣaran, ku Beth Nimra, ku Thukoth, ku Thapon, ku biäk de ciɛɛŋ ɣɔn cieŋ ë melik Thiɣon, melik de Ɣecbon. Ku wɛ̈ɛ̈r de Jordan yen aaye akenden të lɔ aköl athɛ̈i agut Baar ë Galili.

²⁸ Kek pɛ̈ɛ̈nydït ku bɛ̈i ë gëmë dhiën ë Gad në ɣöötken thook ka, ke ye pinyden.

Piny cï Gäm Biäk de Dhiën ë Manatha nu të lɔ Aköl Amiäk

²⁹ Ku Mothe acï piny biäk gäm biäk de dhiën ë Manatha cït kuën ë ɣöötken, tɔkï ee pinyden.

³⁰ Ku pinyden agɔl rɔt në Maɣanayim, ku mɛt Bacan thïn ëbɛ̈n, në ɣɔn cieŋ ë melik Og ëbɛ̈n, melik de Bacan, ku pɛ̈ɛ̈nydït ke Jayir kedhie kathiërdhetem në Bacan.

³¹ Ku mɛt biäk de Giliyad thïn, kekë Acetaroth, ku Ederi, ku pɛ̈ɛ̈nydït ke ciɛɛŋ ɣɔn cieŋ ë melik Og në Bacan. Kek wuöt ë gëmë biäk de dhiën ë Manatha ka, mïth baai ke ɣön ë Makir thok, wën ë Manatha.

³² Yen luɔi ë tek ë Mothe piny tɔ̈u në Jordan kɔ̈u ka, kekë piny tɔ̈u në Jeriko kɔ̈u të lɔ aköl amiäk ɣɔn tɔ̈u en në riaaŋ de Mowap.

³³ Ku Mothe acïn piny ë cï gäm kɔc ke Lebai. Acï bɛ̈n lɛ̈k keek nɔn ye miɔ̈c ye gäm Bɛ̈nydït Nhialic de Yithriɛl këden.