Jocua 12 - JAM DE NHIALIC 2011

Meliik cïï Mothe ke Tiaam

¹ Kɔc ke Yithriɛl cï meliik kaarou tiaam, ku peckï piny tɔ̈u në Araba ëbɛ̈n ë wɛ̈ɛ̈r de Jordan kɔ̈u të lɔ aköl amiäk, gɔl në bäny de Arnon agut cï bäny de Jordan. Ku lee guöt cï kuur ë Ɣermon të lɔ rut.

² Ku ee meliikë, ee yï Thiɣon melik de kɔc ke Amor, ë cieŋ Ɣecbon. Ku ciɛɛŋde acï biäk de Giliyad mat thïn gɔl në Aroyer (në wak de Arnon këc) agut cï wundïït tɔ̈u në wakic cil, ku lee në kiir ë Jabok kɔ̈u në aken de kɔc ke Ammon.

³ Ku mɛt Araba thïn në bäny de Jordan yic, në Baar ë Galili agut cï Beth Yecimoth, në Wɛ̈ɛ̈r de Amilɔ kɔ̈u të lɔ aköl amiäk. Ku lee guöt në kuur de Pithga thar.

⁴ Ku tiamkï melik Og melik de Bacan, raan töŋ de kɔc ke Repaim ë cï döŋ. Ee yen ë cieŋ Acetaroth kekë Ederi.

⁵ Ciɛɛŋde aɣet agut cï kuur de Ɣermon, ku Thaleka, ku Bacan ëbɛ̈n alɔ gut aken ë Gecur kekë Maaka, ku lɔ biäk de Giliyad aya. Ku le dɛ akeu kekë piny de melik Thiɣon, melik de Ɣecbon.

⁶ Kek ee meliikë kaarou ee Mothe yen ë tiam keek kekë kɔc ke Yithriɛl. Ago Mothe awun ë Bɛ̈nydït pinyden gäm dhiën ë Ruben kekë dhiën ë Gad, ku biäk de dhiën ë Manatha tɔkï ee pinyden.

Meliik cïï Jocua ke Tiaam

⁷ Ku Jocua kekë kɔc ke Yithriɛl, cï meliik tiaam kedhie në Jordan kɔ̈u të lɔ aköl athɛ̈i. Gɔl në Baalgad në Lebanɔn të lɔ kuur ë Ɣalak thiääk ke Edom. Ago Jocua dhiëën ke Yithriɛl tɛ̈k piny, nömkï ke ye piinyken.

⁸ Ku piiny ë tek, ee piny ë kuur, ku liööŋ, ku wak në Araba, ku kur nïïm, ku jɔ̈ɔ̈r. Ku aaye piny de kɔc ke Ɣit, ku kɔc ke Amor, ku kɔc ke Kanaan, ku kɔc ke Peridh, ku kɔc ke Ɣib, ku kɔc ke Jebuth.

⁹ Ku kɔc ke Yithriɛl tiam meliik ke ee wuötkë: meliŋ de Jeriko, ku meliŋ de Ai (në Bethel lɔ̈ɔ̈m),

¹⁰ ku meliŋ de Jeruthalem, ku meliŋ de Ɣebron.

¹¹ Ku meliŋ de Jarmuth, ku meliŋ de Lacic,

¹² ku meliŋ de Egolon, ku meliŋ de Gedher,

¹³ ku meliŋ de Debir, ku meliŋ de Geder,

¹⁴ Ku meliŋ de Ɣorma, ku meliŋ de Arad,

¹⁵ ku meliŋ de Libna, ku meliŋ de Adulam,

¹⁶ ku meliŋ de Makeda, ku meliŋ de Bethel,

¹⁷ Ku meliŋ de Tapua, ku meliŋ de Ɣeper,

¹⁸ Ku meliŋ de Apek, ku meliŋ de Lacaron,

¹⁹ ku meliŋ de Madon, ku meliŋ de Ɣadhor,

²⁰ ku meliŋ de Cimron Meron, ku meliŋ de Akecap,

²¹ ku meliŋ de Taanak, ku meliŋ de Megido,

²² ku meliŋ de Kedec, ku meliŋ de Jokniim (në Karmel),

²³ Ku meliŋ de Dor (në wɛ̈ɛ̈r yɔu), ku meliŋ de Goyim (në Galili).

²⁴ Ku meliŋ de Tirdha. Aake ye meliik kathiërdiäk ku tök ëbɛ̈n.