Jocua 11 - JAM DE NHIALIC 2011

Jocua Atiam Jabin kekë Kɔc Mät në Yen

¹ Na wën, apiŋ melik Jabin ee kënë, melik de Ɣadhor, ke tɔ thok lɔ tëde Jobap, melik de Madon, ayï melik de Cimron kekë melik de Akecap,

² ayï meliik nu piny ë kuur, kur nu të lɔ rut, ayï meliik nu në Araba në Jordan yɔu në Baar ë Galili baŋ të lɔ wöuwic, ayï meliik nu në kur thäär, ayï wɛ̈ɛ̈r thok të thiääk kekë Dor të lɔ aköl athɛ̈i.

³ Ku tɔ thok lɔ tëde kɔc ke Kanaan nu të lɔ aköl amiäk ku të lɔ aköl athɛ̈i ayadäŋ, kɔc nu në Jordan lɔŋë, ayï lɔŋ däŋë, ayï kɔc ke Amor, ayï kɔc ke Ɣit, ayï kɔc ke Peridh, ayï kɔc ke Jebuth nu piny ë kuur, ayï kɔc ke Ɣib, kɔc rɛ̈ɛ̈r në kuur ë Ɣermon thar në piny ë Midhepa.

⁴ Agokï guëër në kɔckɛn ke tɔŋ, kɔc juëc aläl cït liɛɛt de wɛ̈ɛ̈r yɔu. Ku de nïïm Jöŋgöör juëc aläl, ayï abëël ke tɔŋ juëc aya.

⁵ Meliikë kedhie, cï kecin mat, ku yïnkï tɔŋ Yithriɛl. Agokï röt lɔ dam piny në pïïu ke Merom lɔ̈m, ku bïk jɔ piɔ̈t në Yithriɛl.

⁶ Go Bɛ̈nydït lɛ̈k Jocua, an, “Du riɔ̈c në keek. Miäk aköl wälë, abä ke gäm Yithriɛl ke ke cï thök ë nääk kedhie. Wek bï jöŋgöörken tɔ ye ŋöl miäk, ku ɣaakkï abëëlkɛn ke tɔŋ.

⁷ Ago Jocua lɔ ke kɔcke, lek keek muɔɔk piny ëthiäu në pïïu ke Merom nɔm.

⁸ Ago Bɛ̈nydït ke tɔ tiɛɛm ë kɔc ke Yithriɛl, ago kɔc ke Yithriɛl ke cop cök agut cï Mithapoth Maim, ku Thidon në baŋ të lɔ wöuwic agut cï bäny de Midhepa në baŋ të lɔ aköl amiäk. Tɔŋ akën bɛ̈n kɔ̈ɔ̈c abïï kɔc de ater në Yithriɛl kɔn thök në thuɔɔu.

⁹ Ago Jocua ke luöi kë cïï Bɛ̈nydït lɛ̈k en. Ago jöŋgöörken tɔ ye ŋöl, ku ɣɛɛk abëëlkɛn ke tɔŋ.

¹⁰ Ago Jocua rɔt puɔ̈k ciëën peec Ɣadhor, ku nɛ̈k melikde. (Ku në aköölkë yiic Ɣadhor yen aye wun töŋ ril në wuötiic kedhie.)

¹¹ Agokï kɔc nɔ̈k kedhie abïï ciɛ̈n raan töŋ pïïr, ku ɣɔɔkkï wut.

¹² Pɛ̈ɛ̈nydïtkë acïï Jocua ke bɛ̈n peec kedhie, ayï meliiken ku nɛ̈k kɔc nu thïn kedhie, cït man wään cïï Mothe, awun de Bɛ̈nydït ye lueel.

¹³ Ku kɔc ke Yithriɛl acïn wun e cïk nyop në pɛ̈ɛ̈nydït cï yïk ë kur nïïm, ee Ɣadhor yetök yen ë ɣɛɛk ë Jocua.

¹⁴ Ku kɔc ke Yithriɛl aake cï këriëëc piɛth peec ëbɛ̈n, ayï këriëëc pïïr në ee pɛ̈ɛ̈nydïtkë yiic, ku nömkï kaken. Ku acïk kɔc bɛ̈n nɔ̈k kedhie, abïï ciɛ̈n raan töŋ dɔ̈ŋ ke pïïr.

¹⁵ Bɛ̈nydït acï lööŋkë gäm awundɛn Mothe, go Mothe ke lɔ gäm Jocua, go Jocua ke lɔ döt. Ku looi këriëëc ëbɛ̈n, kë cïï Bɛ̈nydït thɔ̈n Mothe.

Wuöt cïï Jocua ke Peec

¹⁶ Ku Jocua acï piny jɔ peec ëbɛ̈n, piny ë kuur, ayï kur thäär kedhie të lɔ Araba të lɔ wöuwic, ayï të lɔ rut. Ku peec piny de Gocen, ayï Jɔ̈ɔ̈ric ëbɛ̈n, ayï Jordan yɔu.

^17-18 Piny gɔl rɔt në kuur de Ɣalak të lɔ wöuwic në Edom lɔ̈ɔ̈m, agut cï Baalgad të lɔ rut, në bäny ë Lebanɔn në kuur de Ɣermon. Jocua acï cieŋ ke piɔ̈t ke meliik ceŋ ee pinyë, ku acï ke bɛ̈n tiaam, ku nɛ̈k keek kedhie.

¹⁹ Ee Gibiɔn yetök, yen aye wun ë cï mät looi kekë kɔc ke Yithriɛl, wun rëër ë kɔc kɔ̈k ke Ɣib thïn. Ku wuöt kɔ̈kë kedhie, peec në tɔŋ.

²⁰ Aake cïï Bɛ̈nydït tɔ gam tɔŋ në Yithriɛl, në luɔi bïï ke riɔ̈ɔ̈k taitai, ku näk keek të cïn kokdepiɔ̈u. Yen kë ɣɔn thön ë Bɛ̈nydït Mothe ka.

²¹ Në aköölkë yiic, Jocua ë Anakim bɛ̈n riɔ̈ɔ̈k në gɔl ë piny ë kuur, ku ë Ɣebron, ku Debir, ku Anab. Ku riëëk keek piny ë kuur de Juda yic ëbɛ̈n, ayï piny ë kuur de Yithriɛl. Acïï Jocua ke bɛ̈n riɔ̈ɔ̈k taitai ayï pɛ̈ɛ̈nydïtken.

²² Acïn raan töŋ de Anakim cï bɛ̈n döŋ piny de Yithriɛl. Ee kɔc liiakäŋ tei kek ë cï döŋ Gadha, ku dɔ̈ŋ kɔ̈k Gath ku Acedɔd.

²³ Go Jocua piny peec ëbɛ̈n cït man wään cïï Bɛ̈nydït e lɛ̈k Mothe, ku tëk Jocua piny dhiëën ke Yithriɛl ke ye piinyken, piny ke dhiën tök. Ago kɔc jɔ lɔ̈ŋ në tɔɔŋ.