Jocua 1 - JAM DE NHIALIC 2011

Bɛ̈nydït Ayöök Jocua bïï Kanaan Peec

¹ Ɣɔn cïï Mothe awun de Bɛ̈nydït thou, ke lëk ë Bɛ̈nydït Jocua wën ë Nun, raan ë ye Mothe kuɔny,

² an, “Mothe, awundï ë thou. Ka ënɔɔnë, guiir rɔt wekë kɔc ke Yithriɛl kedhie, ke we bï wɛ̈ɛ̈r de Jordan teem lakï piny kaar bä gäm week.

³ Të cä wek wecök thɛm thïn ëbɛ̈n, abä gäm week, cït man wään cän ë lɛ̈k Mothe.

⁴ Pinydun abï rɔt gɔl në jɔ̈ɔ̈ric agut cï Lebanɔn, aɣet cï wɛ̈ɛ̈r ë Yuparat. Abï piny ë kɔc ke Ɣit nööm ëbɛ̈n, lee në Wɛ̈ɛ̈rdïït ɣer nu aköl athɛ̈i.

⁵ Acïn raan lëu bï yï gël nɔm në pïïrdu yic ëbɛ̈n. Yɛn bï tɔ̈u wo yïn, cït man wään täu Ɛn wokë Mothe. Ku yïn cä bï pɔ̈l, ku cä yï bï nyääŋ piny.

⁶ “Rit yïpiɔ̈u, ku du riɔ̈c, në luɔi bï yïn kɔc wat piny bïk lɔ lak, piny cän kuëëŋ në kuarken nïïm nɔn bän en gäm keek.

⁷ Rit yïpiɔ̈u arëët, ku tɔ rɔt ril. Ku them ëgɔk nɔn bï yïn löŋdï döt ëbɛ̈n, löŋ cïï Mothe awundï gäm yïn. Ku du päl, ke yï bï ya tiam në këriëëcic ëbɛ̈n.

⁸ Du awerek de ee löŋë kɔn tɔ jël në yïthok. Ye cool ë ŋɛk yïn e yic, aköl ku wäkɔ̈u ke yï bï luɔi de këriëëc ëbɛ̈n jɔ lëu, kë cï gɔ̈ɔ̈r thïn. Ke yï bï jɔ tiam.

⁹ Yïn cä yɔ̈ɔ̈k an rit yïpiɔ̈u, ku tɔ rɔt ril. Du rɔt tɔ riëëcë, ku du rɔt pɛ̈l wei, Bɛ̈nydït Nhialic abï tɔ̈u ke yïn alɔ të le yïn thïn.

Jocua Agëm Kɔc lööŋ

¹⁰ Go Jocua bäny nu ë kɔc nïïm yɔ̈ɔ̈k an,

¹¹ Lakï wut, lak lɛ̈kkï kɔc an, “Ë ke kïït kaken. Në ee nïnkë yiic kadiäk, wek bï wɛ̈ɛ̈r de Jordan teem lak piny nööm, piny gëm ë Bɛ̈nydït Nhialicdun week, bï ya pinydun.”

¹² Na wën, ke lëk ë Jocua dhiën ë Ruben kekë dhiën ë Gad, ku biäk de dhiën ë Manatha an,

¹³ “Takkï wenïïm në jam ɣɔn lëk ë Mothe awun ë Bɛ̈nydït week, në biäk bï Bɛ̈nydït Nhialicdun we gäm ee pinyë. Piny tɔ̈u në wɛ̈ɛ̈r de Jordan kɔ̈u baŋ të lɔ aköl amiäk, bï ya pinydun.

¹⁴ Diäärkun ë ke dɔ̈ŋ eenë, ayï mïthkun, ayï ɣɔ̈kkun. Ku takï remduön ë tɔŋ nöm tɔɔŋken, ku temkï wɛ̈ɛ̈r në kɔc ke Yithriɛl nïïm tueŋ, bïk keek lɔ kuɔny.

¹⁵ Agut të bï Bɛ̈nydït keek kɔn tɔ rum piny nu në wɛ̈ɛ̈r de Jordan kɔ̈u baŋ të lɔ aköl athɛ̈i ëbɛ̈n. Piny cïï Bɛ̈nydït Nhialinydun gäm keek, ku tɔ keek lɔ̈ŋ. Ku ëtɛ̈ɛ̈n, wek bï wenïïm jɔ dɔ̈k, bäk bɛ̈n piɔ̈ɔ̈t pinydun eenë në wɛ̈ɛ̈r de Jordan kɔ̈u baŋ të lɔ aköl amiäk. Të cï Mothe awun ë Bɛ̈nydït gäm week.”

¹⁶ Na wën, ke pukkï nɔm Jocua an, “Këriëëc cï lɛ̈k wook ëbɛ̈n, abuk looi. Ku agut të cïn wo tuɔɔc thïn, wok bï lɔ.

¹⁷ Yïn buk gam thok cït man wään ye wok Mothe gam thok. Ku Bɛ̈nydït Nhialicdu, abï tɔ̈u kekë yïn cït man wään tɔ̈u en kekë Mothe!

¹⁸ Raan ëbɛ̈n, raan lɔ jamdu dhɔ̈ŋic, ayï raan reec jamdu piŋ, abï nɔ̈k. Ka yïn rit yïpiɔ̈u, ku tɔ rɔt ril.