Jɔn 9 - JAM DE NHIALIC 2011

Yecu atɔ Raan cï Dhiëëth ke ye Cɔɔr Waar

¹ Na wën, aa tëëk, ke tïŋ raan ë dhiëth ke ye cɔɔr.

² Go kɔckɛn ë piööcë thiëëc an, “Rabi, eeŋa ë loi kërac, në yï raanë, kekë wun ku man, ënɔɔn ë dhiëthë ye ke ye cɔɔr?”

³ Go Yecu bɛ̈ɛ̈r an, “Acie raanë yen ë loi kërac, ku cie wun ayï man: ee tïc bï luɔi ë Nhialic tïc ë yeguöp.

⁴ Yɛn bï luɔi dhil aa looi, luɔi ë raan ë toc ɛn, të ŋootë piny ke ye aköl: wakɔ̈u abɔ̈, të cïn raan duëër luui.

⁵ Të ŋuɔɔt ɛn ke ya nu ë piny nɔm, ke yɛn ee ɣɛɛr ë piny nɔm.”

⁶ Na wën, aacï kakë lueel, ke jɔ piny ŋuööt, go tiɔp nuaai ë luɛɛth, go cɔɔr rɔɔth nyin ë tiɔp,

⁷ ku yöök an, “Lɔ, waakë ë awuöl e Thilowamic (yen aye “Tuc” në thoŋda).” Go lɔ, ku wɛɛk, ku le bɛ̈n ke daai.

⁸ Go kɔc rɛ̈ɛ̈r ë yen ëtök, ayï kɔc wään ee ye tïŋ nɔn ee yen cɔɔr, agokï lueel an, “Cie raan wään ee rëër piny ke lip?”

⁹ Go kɔc kɔ̈k lueel an, “Ee yen.” Ku lueel kɔ̈k an, “Ei, ku acït en.” Go raan jɔ lueel an, “Ee yɛn.”

¹⁰ Gokï thiëëc an, “Ë yï liep nyin adï?”

¹¹ Go bɛ̈ɛ̈r an, “Raan cɔl Yecu ë tiɔp nuaai, ku rɔɔth a nyin, go lɛ̈k ɛn an, Lɔ waakë ë Thilowamic: guɔ lɔ, ku waak, guɔ piny tïŋ.”

¹² Gokï thiëëc an, “Nu nou yen ee raanë?” Go lueel an, “Akuöc.”

Parithai Akɔɔrkï Kueer ë Deem ë Raan

¹³ Gokï bɛ̈ɛ̈i tëde Parithai yen raan wään ee cɔɔr.

¹⁴ Ku yen aaye kööl ë Thabath kööl wään nuɛɛiyë Yecu tiɔp, ku liep raan nyin.

¹⁵ Go Parithai bɛ thiëëc në kë cï en piny tïŋ. Go lëk keek an, “Aa tɛ̈ɛ̈u tiɔp ë yanyin, ku ja waak, aguɔ jɔ guɔ daai.”

¹⁶ Go Parithai kɔ̈k lueel an, “Raanë aacïï bɔ̈ tëde Nhialic, ee kööl ë Thabath rɛɛc döt.” Ku lueel kɔc kɔ̈k an, “Raan ë kërac looi duëër göök cït ë kakë looi adï?” Go teer rɔt cak ë keyiic.

¹⁷ Gokï cɔɔr bɛ thiëëc an, “Yïn, luel wudï në këde, në kë cï en yï liep nyin?” Go lueel an, “Ee tiët.”

¹⁸ Ku reec Judai gäm në këde, nɔn ee yen cɔɔr, ku be piny tïŋ, agokï wun ku man raan wën cï tɔ daai cɔɔl.

¹⁹ Ku thiëckï keek an, “Ee wëndun ee kënë, raan wën luɛlkï an, ë dhiëth ke ye cɔɔr? E jɔ daai adï ënɔɔnë?”

²⁰ Go wun bɛ̈ɛ̈r ayï man, luelkï an, “Mɛnhë aŋicku nɔn ee yen wënda, ku ŋicku nɔn ë dhiëëthë yen ke ye cɔɔr.

²¹ Ku kë tɔ ye daai ënɔɔnë akucku, ayï raan ë liep yenyin, akucku, ee raan dït, jakï thiëëc, abï këde lueel yen ëtök!”

²² Kakë aake lueel wun kekë man, në riɔ̈ɔ̈c riɔ̈ɔ̈c kek ë Judai: Judai aake cï kethook mat an, të de yen raan gam en an, ee Kërtho, ka bï ciɛɛc biic ɣön ë Nhialic.

²³ Yen aa lueel wun ayï man an, “Ee raan dït, thiëckï!”

²⁴ Gokï raan wën ee cɔɔr bɛ cɔɔl raanrou, ku yöökkï an, “Leec Nhialic, raanë aŋicku nɔn ee yen raan ë kërac looi.”

²⁵ Go bɛ̈ɛ̈r an, “Nɔn ee yen raan ee kërac looi, ku nɔn cïï en ee yen, aa ja kuc: ee cöök tök yen aŋiɛc an, wään yɛn aaye cɔɔr, ënɔɔnë yɛn daai.”

²⁶ Gokï bɛ thiëëc an, “Ë loi yïn adï? Ë liep yïnyin adï?”

²⁷ Go pɔ̈k nɔm keek an, “Acä kɔn lɛ̈k week wën, ku kɛ̈nkï piŋ: eeŋö kaarkï, kë bäk bɛ piŋ? Kaarkï luɔi bä wek aa kɔckɛn ë piööcë ayadäŋ?”

²⁸ Agokï lat, ku luelkï an, “Yïn ee raandɛn ëpiööcë, ku wok ee kɔcpiööcë Mothe.

²⁹ Aŋicku nɔn cï Nhialic jam kekë Mothe, ku na ye raanë, akucku tëdɛn ë bï yen thïn!”

³⁰ Go raan bɛ̈ɛ̈r, lueel an, “Man ee kë ye kɔc tɔ gäi, kuny kuöc wek të ë bï yen thïn, ku yen aa liep a nyin.

³¹ Aŋicku nɔn cïï Nhialic këde kɔc ee kërac looi ye piŋ: ku të riëëuwë raan Nhialic, ku ye këde piɔ̈nde looi, këde aye Nhialic piŋ.

³² Të ɣɔn ciɛkë piny akënë kɔn piŋ nɔn de yen raan cï raan liep nyin raan cï dhiëth ke ye cɔɔr.

³³ Raanë, tëë cie raan ë bɔ̈ tëde Nhialic, adï cïn kë ye lëu!”

³⁴ Gokï bɛ̈ɛ̈r yöökkï an, “Yïn aa dhiëth ë këracic liŋliŋ, ku bä wook wɛ̈ɛ̈t?” Agokï ciɛɛc biic.

Cɔɔr de Wëi

³⁵ Ago Yecu piŋ nɔn cï kek e ciɛɛc biic, go yök, ku thiëëc an, “Gam Wën ë Raan?”

³⁶ Go bɛ̈ɛ̈r, thiëëc an, “Ye ŋa, Bɛ̈nydït, kë bän e gam?”

³⁷ Go Yecu lueel an, “Acï tïŋ guöp, ku ye kï, ee raan jam kekë yïnë.”

³⁸ Go lueel an, “Acä gam, Bɛ̈nydït.” Go lam.

³⁹ Go Yecu lueel an, “Ee guiëërëlöŋ yen aa bïï yɛn ë piny nɔm, ke kɔc cie daai ë ke bï bɛ̈n daai, ku bï kɔc daai bïk cɔɔr.”

⁴⁰ Të cï Parithai kakë piŋ, Parithai nu ë yelɔ̈ɔ̈m, ke jɔkï thiëëc an, “Ayï wook, yok cöör?”

⁴¹ Go Yecu ke yɔ̈ɔ̈k an, “Tëë we ye cöör, adï cïn awäny cath ke week: ku ënɔɔnë ayak lueel an, Wok daai, yen aye täu tɔ̈uwë awänydun.”