Jɔn 8 - JAM DE NHIALIC 2011

Tiiŋ cï Dɔm ke Mony Lei

¹ Ku lɔ Yecu të nu kuur ë Olip.

² Na wën, aruu piny, ke be bɛ̈n ë Luaŋdïtic, ku bɔ̈ kɔc të nu yen kedhie, go nyuc, wëët keek.

³ Na wën, ke kɔc ee löŋ gɔ̈ɔ̈r kekë Parithai ke ke bïï tik të nu yen, tiiŋ cï dɔm ke cï lɔ kekë mony lei, agokï tääu ë ciɛɛlic.

⁴ Ku luelkï an, “Bɛ̈ny ee wëët, tiiŋë acï dɔm ke mony lei, aake yök ke ke nin ëtök.

⁵ Ku wo cïï Mothe yɔ̈ɔ̈k ë löŋic an, “Kɔc loi kacït ee kakë aduëërë ke biɔ̈ɔ̈k ë kur: ku na yïn, luel wudï?”

⁶ Aake luel kënë them kek en, ke bï dɛ të gɔɔny kek en. Go Yecu enɔm guöt piny tei, gɛ̈ɛ̈r piny e yecin.

⁷ Na wën, acïk cool e thiëëc kek en, ke jɔ rɔt jɔt, yöök keek an, “Raan cïn piɔ̈u kërac ë weyiic, ë kɔn kuur dɛ̈ny en.”

⁸ Go yenɔm bɛ guöt piny, gɛ̈ɛ̈r piny ë yecin.

⁹ Të cï kek e piŋ, go piɔ̈ɔ̈thken ke jɔ̈ɔ̈ny, gokï lɔ biic ëlemlem, gɔl ë röördït, leer ë kɔc kor: abï Yecu döŋ etök, ku kaac tiiŋë ë ciɛɛlic tëdɛn wën.

¹⁰ Na wën, acï Yecu rɔt jɔt, ku acïn raan cï tïŋ, ee tik etök, ke jɔ thiëëc an, “Tiiŋë, kɔc akou kɔc wënthɛɛr gɔɔny yïn? Cïn raan cï yïn yiëk yeth gääk?”

¹¹ Go lueel an, “Acïn raan, Bɛ̈nydït.” Go Yecu yɔ̈ɔ̈k an, “Ayï yɛn aya, yïn cä bï yiëk yeth gääk: lɔ, du kërac be looi anandu.”

Yecu ee Ɣɛɛr ë Piny nɔm

¹² Go Yecu kɔc yɔ̈ɔ̈k, an, “Yɛn ee ɣɛɛr ë piny nɔm: raan kuany a cök acïï bï cath tëcol, ku bï dɛ ɣɛɛrëpiny de pïïr.”

¹³ Go Parithai lueel an, “Yïn ee käŋ lueel ë këde yenhdu, këduön luel acie yic.”

¹⁴ Go Yecu pɔ̈k nɔm keek an, “Na ya cak käŋ lueel në këde yenhde, ke këdï ee yic, yɛn ŋic të ë bä yɛn thïn ayï të la yɛn thïn, ku week, we kuc të ë bä yɛn thïn, ku kuöckï të la yɛn thïn.

¹⁵ Wek ee löŋ guiir në këde guöp tei, ku yɛn, acïn raan aa yɛn löŋde guiir.

¹⁶ Ku na ya cak löŋ aa guiir, ke guiëër aa yɛn löŋ guiir ee yic, yɛn cïï rɛ̈ɛ̈r a tök, ee yɛn wokë Wäär raan ë toc ɛn.

¹⁷ Ku acï gɔ̈ɔ̈r ë löŋdunic aya an, kë lueel cäätɔɔ kaarou, yen aye yic.

¹⁸ Yɛn ee cäätɔ ë rɔt atök, ku Wäär raan ë toc ɛn ee cäätɔdï aya.”

¹⁹ Agokï thiëëc an, “Nu Wuur ënou?” Go Yecu bɛ̈ɛ̈r an, “Kuc ɛn ayï Wäär: tëë we ŋic ɛn, adï ŋiɛckï Wäär aya.”

²⁰ Aa luel wëlke të ye käŋ juaar thïn, të wëët en kɔc ë Luaŋdïtic: ku acïn raan cï yen dɔm, në luɔi ŋootë ë köölde ke kën bɛ̈n.

Wek cïï Duëër lɔ të La Yɛn

²¹ Go Yecu keek bɛ yɔ̈ɔ̈k an, “Yɛn jël ë jäldï, ku we bï a kɔɔr, ku we bï thou ë kërɛɛcdunic: të la yɛn thïn, ke wek cïï duëër bɛ̈n.”

²² Go Judai lueel an, “Bï rɔt nɔ̈k, nɔn lueel en en an, të la yɛn thïn, ke wek cï duëër bɛ̈n?”

²³ Go lɛ̈k keek an, “Wek ë bɔ̈ piny, ku yɛn ë bɔ̈ nhial: wek ee ka ke pinyë nɔm, yɛn cie kë de pinyë nɔm.

²⁴ Yen aa lɛ̈k ɛn e week, an, we bï thou në karɛckun yiic: ku të kɛ̈n wek a gam, ‘nɔn aa Yɛn En,’ ke we bï thou ë karɛckun yiic.”

²⁵ Gokï thiëëc an, “Ee yïn ŋa?” Go Yecu ke yɔ̈ɔ̈k an, “Ee raan wään aa cool ë lɛ̈k ɛn e week ëcaŋɣɔn.

²⁶ Yɛn de kajuëc bä lueel ë këdun ayï lööŋ juëc bä guiir: ku raan ë toc ɛn ee yic, ku ka cä piŋ tëde yen, kakë aya ke lɛ̈k kɔc ke piny nɔm.”

²⁷ Aake kuc nɔn cï e lɛ̈k keek në këde Wun.

²⁸ Go Yecu ke yɔ̈ɔ̈k an, “Të cä wek Wën ë Raan tääu nhial, yen abä wek e ŋic nɔn aa Yɛn En, ku nɔn cïn en kë cä looi në këde yenhdï, ku wëët cïï Wäär a wɛ̈ɛ̈t, yen aa luɛɛl ɛn kakë.

²⁹ Ku raan ë toc ɛn, yen arëër wok ëtök, Wäär akën a nyääŋ piny atök, luɔi aa yɛn cool ë loi kamit në yepiɔ̈u.”

³⁰ Na wën, cï en ee kakë lueel, go kɔc juëc këde jɔ gam.

Yic abï We Kony Wëi

³¹ Go Yecu Judai wën cï ye gam yɔ̈ɔ̈k an, “Të täu wek ë jamdï yic, ka wek ee kɔckiën ë piööcë në yic,

³² ku we bï yic ŋic, ku yic abï we lony.”

³³ Gokï bɛ̈ɛ̈r an, “Wok ee kɔ̈th ke Abraɣam, ku wo kën kɔn aa lïïm ke raan däŋ ëcaŋɣɔn: eeŋö lueel yïn en an, ‘We bï lony?’”

³⁴ Go Yecu bɛ̈ɛ̈r an, “Wek yɔ̈ɔ̈k ëyic an, ‘Raan ëbɛ̈n raan ë kërac looi, yen aye lïm ë kërac.

³⁵ Ku lïm acie rëër ɣööt athɛɛr: ku Wëndït yen aye rëër athɛɛr.

³⁶ Ku të lonyë Wëndït week, ke we bï aa kɔc cï lony.

³⁷ Wek ŋiɛc nɔn aa wek kɔ̈th ke Abraɣam, ku wek kɔɔr luɔi näk wek ɛn, luɔi cïn en të bï jamdï rëër ë weyiic.

³⁸ Yɛn ee käŋ lueel ka cä piŋ tëde Wäär: ku week aya, wek ee käŋ looi ka cäk piŋ tëde wuöördun.”

³⁹ Gokï bɛ̈ɛ̈r, yöökkï an, “Abraɣam yen aye wääda.” Go Yecu ke yɔ̈ɔ̈k an, “Të ya wek mïth ke Abraɣam adï yak luɔi de Abraɣam looi.

⁴⁰ Ku ënɔɔnë, wek kɔɔr luɔi näk wek ɛn, raan cï week lɛ̈k yic, kë cä piŋ tëde Nhialic: kënë akënë Abraɣam looi!

⁴¹ Wek ee luɔi ë wuöördun looi.” Gokï lueel an, “Wo cie adhiëthlëër, wo de Wääda tök, Nhialic.”

⁴² Go Yecu ke yɔ̈ɔ̈k an, “Tëë ye Nhialic yen ee Wuöördun, adï yak a nhiaar: nɔn ë bä yɛn tëde Nhialic bä eenë, ku yɛn ë cïï bɔ̈ në këde yenhdï, yen aa toc ɛn.

⁴³ Eeŋö cä wek jamdï ŋic? Ee luɔi cä wek jamdï lëu në pïŋ.

⁴⁴ Wek ee mïth ke jɔŋdït rac wuöördun, ku kɔ̈ɔ̈r kɔɔrë wuöördun kërac, yen aa yak kɔɔr ayadäŋ. Yen aaye nɛ̈k të ɣɔn ciɛkë käŋ, ku reec ceŋ në yicic, luɔi liiuwë yic tëde yen. Të töör en lueth, ee këde en lueel, nɔn ee yen alueeth, ku ye wun lueth.

⁴⁵ Ku luɔi luɛɛl ɛn yic, yen a cä wek a gam.

⁴⁶ Eeŋa në weyiic raan duëër a jɔ̈ɔ̈ny në baŋ de kërac? Ku na luɛɛl yic, eeŋö cä wek a gam?

⁴⁷ Raan ë Nhialic ee wël ke Nhialic piŋ: yen acä wek ke piŋ, luɔi cä wek ee kɔc ke Nhialic.”

Yecu ku Abraɣam

⁴⁸ Ago Judai bɛ̈ɛ̈r, luelkï an, “Cie yic en luelku an, Yïn ee Thamaritan, ku de ye guöp jɔŋ rac?”

⁴⁹ Go Yecu bɛ̈ɛ̈r an, “Yɛn cïn guöp jɔŋ rac, ku yɛn riëëu Wäär, ku wek reec a riëëu.

⁵⁰ Ku yɛn cïï lɛcdï kɔɔr: raan tök anu raan kɔɔr lɛc bï a leec, ku yen aye löŋ guiir.

⁵¹ Wek yɔ̈ɔ̈k ë yic an, të dötë raan wëlkï, ka cïï thuɔɔu bï tïŋ anande.”

⁵² Go yɔ̈ɔ̈k ë Judai an, “Ënɔɔnë aŋicku nɔn de yïn guöp jɔŋ rac. Abraɣam ë thou, ayï tït, ku ye lueel an, të dötë raan wëlkï, ka cïï thuɔɔu bï thiëëp anande.

⁵³ Wär wääda Abraɣam në dït, raan cï thou? Ayï tït acïk thou: ye rɔt tɔ ye ŋa?”

⁵⁴ Go Yecu bɛ̈ɛ̈r an, “Të lɛɛc ɛn rɔt, ke lɛcdï acïn naamde: ee Wäär yen alec ɛn, raan yak lueel an, ee Nhialicdun,

⁵⁵ ku akɛ̈nkï ŋic: ku aŋiɛc yɛn, ku na luɛɛl en an, akuöc ke yɛn bï ya alueeth cït week: ku aŋiɛc, ku ya jamde döt.

⁵⁶ Kuɛɛrëdun Abraɣam aa mit piɔ̈u në tïŋ duëër en kööldï tïŋ, ago tïŋ, ku jɔ piɔ̈u a yum.”

⁵⁷ Go yɔ̈ɔ̈k ë Judai an, “Runku yïn aŋootkï ë ke kën aa thiërdhïc, ku cï Abraɣam tïŋ?”

⁵⁸ Go Yecu ke yɔ̈ɔ̈k an, “Wek yɔ̈ɔ̈k ëyic an, ɣɔn ŋootë Abraɣam ke liu, ‘Yɛn ë nu.”’

⁵⁹ Gokï kur kuany piny lek biɔ̈ɔ̈k: go Yecu thiaan, na wën, ke jël ë Luaŋdïtic le biic, aa tëk ë keyiic cil, bɛɛric aya.