Jɔn 7 - JAM DE NHIALIC 2011

Yecu ku Mïthëkɔcken

¹ Na wën, acï kakë thök, ke Yecu ye cath ë Galili: acïn piɔ̈u luɔi bï en aa cath ë Juda, luɔi kɔɔrë Judai luɔi bï kek e nɔ̈k.

² Ku dhuëëŋ ë Judai ë guɔ thiɔ̈k, Dhuëëŋ de Kɛ̈ɛ̈t.

³ Go yɔ̈ɔ̈k ë mïthëkɔcken an, “Jël ee tënë, lɔ Juda, ke kɔckuön ë piööcë ke ke bï luɔidu tïŋ ayadäŋ luɔi loi.

⁴ Acïn raan ë käŋ looi athiɛɛn, të kɔɔr en luɔi bï ye ŋic ë kɔc. Të looi yïn ee kakë, ke yï nyuth rɔt kɔc ke piny nɔm!”

⁵ (Ayï mïthëkɔcken aya aake kën këde gam.)

⁶ Go Yecu keek yɔ̈ɔ̈k an, “Kööldï aŋoot ke kën bɛ̈n, ku kööldun ee nu ëcaŋɣɔn.

⁷ Kɔc ke piny nɔm acïkï we duëër maan, ee yɛn mankï, në luɛl aa yɛn ë lueel an, luɔiden arac.

⁸ Lakï week të nu dhuëëŋë: yɛn cïï lɔ të nu dhuëëŋ ënɔɔnë, kööldï aŋoot wei, akën guɔ bɛ̈n.”

⁹ Të cï en ee kënë lɛ̈k keek, ke ŋoot ke rɛ̈ɛ̈r ë Galili.

Yecu anu ë Dhuëëŋ de Kɛ̈ɛ̈t Yic

¹⁰ Na wën, aacï mïthëkɔcken lɔ tëde dhuëëŋ, ke jɔ lɔ̈ɔ̈k lɔ aya, ku cïï lɔ ë kɔc nïïm, ë rɔ dhaaŋ.

¹¹ Go Judai ye kɔɔr ë dhuëëŋic, ku yek thiëëc an, “Ee tënou nu yen?”

¹² Ŋun cïï kɔc ŋun në këde acï dït ë kɔc yiic: alueel kɔc kɔ̈k an, “Ee raan piɛth, go kɔc kɔ̈k lueel an, Acie yen, ee kɔc math tei.”

¹³ Ku acïn raan ee jam ë këde yen ë kɔc yiic, në riɔ̈ɔ̈c wën cï kek riɔ̈ɔ̈c ë Judai.

¹⁴ Na wën, të cït dhuëëŋic cil, ke Yecu lɔ ë Luaŋdïtic, le kɔc wɛ̈ɛ̈t.

¹⁵ Go Judai gäi, ku luelkï an, “Raanë ëŋic wël adï, ku kënë kɔn wɛ̈ɛ̈t anande?”

¹⁶ Go Yecu pɔ̈k nɔm keek an, “Wëët wɛ̈ɛ̈t ɛn kɔc acie këdï, ee këde raan ë toc ɛn.

¹⁷ Të kɔɔrë raan nɔn bï en këde piɔ̈nde looi, ka bï këdiën wɛ̈ɛ̈t dhil ŋic, nɔn ë bï yen tëde Nhialic, ku nɔn jaam ɛn në këde yenhdï.

¹⁸ Raan ë jam ëkëde yenhde ee lɛc de yenguöp en kɔɔr: ku raan kɔɔr lɛc de raan ë toc en, yen aye raan yic, ku cïnic kërac.

¹⁹ Kën Mothe we gäm löŋ, ku acïn raan tök ë weyiic raan ë löŋ tiiŋic? Eeŋö kaar wek luɔi näk wek ɛn?”

²⁰ Go kut ë kɔc bɛ̈ɛ̈r, an, “Yïn cath we jɔŋ rac! Eeŋa kɔɔr luɔi bï en yï nɔ̈k?”

²¹ Go Yecu bɛ̈ɛ̈r, lëk keek an, “Luɔi töŋë acä looi, aguɔkï gäi wedhie.

²² Mothe acï we yiɛ̈n cuɛ̈l (ku acie këde Mothe, ee këde kuarkuɔ), ku wek ee raan cueel ëkööl ë Thabath.

²³ Ku ënɔɔnë, të ye raan cueel ë kööl ë thabath, ke löŋë Mothe cïï bï dhɔ̈ŋic, eeŋö gɔ̈th wek në yɛn, luɔi cän raan tɔ piɔl guöp ëliŋliŋ ëkööl ë thabath?

²⁴ Duökï löŋ ë guiir në kë cï tïc tei, yak löŋ piɛth guiir.”

Ee Yen Kërtho

²⁵ Go kɔc kɔ̈k ke Jeruthalem lueel an, “Cie yen raan kɔɔr kɔc luɔi nɛ̈k kek en?

²⁶ Wɔikï! Ajam ë kɔc yiic, ku acïn kë lëkkï yen. Cï bäny ceŋ piny dhil ŋic nɔn ee yen Kërtho ëyic?

²⁷ Ku raanë aŋicku të bï yen thïn: ku na miäk bɔ̈ Kërtho, acïn raan ŋic të bï en bɛ̈n thïn.”

²⁸ Go Yecu cööt ë Luaŋdïtic, të wën wëët en kɔc an, “Wek ŋic ɛn ayï të ë bä yɛn thïn aya aŋiɛckï, ku yɛn aacïï bɔ̈ në këde yenhdï, ku raan ë toc ɛn, yen aye raan yic, raan kuöckï.

²⁹ Ku aŋiɛc yɛn, luɔi e bä yɛn tëde yen, ku yen aa toc ɛn.”

³⁰ Agokï piɔ̈ɔ̈th dɛ luɔi bï kek e dɔm: ku acïn raan cï yeciin tääu ë yeguöp, luɔi ŋootë köölde ke kën guɔ bɛ̈n.

³¹ Ku kɔc juëc në kutic acïk e gam, ku luelkï an, “Kërtho, të cï yen bɛ̈n, bï göök looi göök wär ka looi ee raanë?”

Kɔc acï ke Tooc bïk Yecu lɔ Dɔm

³² Go Parithai piŋ nɔn ŋuunë kɔc aya në këde, go Parithai ku bäny dït ke kakë Nhialic gokï bäny ee kɔc mac tooc, lek dɔm.

³³ Go Yecu lɛ̈k keek, an, “Ë döŋ ke ye tëthiinakäŋ ke ya rɛ̈ɛ̈r wo week, ku bä jɔ lɔ tëde raan ë toc ɛn.

³⁴ We bï a kɔɔr, ku we cïï a bï yök, ku të nuö yɛn thïn, acä wek duëër bɛ̈n.”

³⁵ Go Judai lueel kapäc, an, “Ee tënou bï raanë lɔ thïn, të cïï wok en bï yök? Bï lɔ tëde kɔc cï thiëi ë Girikii yiic, le Girikii aa wɛ̈ɛ̈t?

³⁶ Ee jam tɔ̈u adï ee kënë, jam yen e lueel an, “We bï a kɔɔr, ku we cïï a bï yök: ku an, të nuö yɛn thïn, acä wek duëër bɛ̈n?”

Kiɛɛr ke Pïïu ke Pïïr

³⁷ Na wën, ëkööl thöökë dhuëëŋ, yen aye kööl dït, ke Yecu kääc ku cööt an, “Të de yen raan cï yal, në bɔ̈ tëde yɛn, bï bɛ̈n dek.

³⁸ Raan gam ɛn, acït man cï këcïgɔ̈ɔ̈r e lueel, an, kiɛɛr ke pïïu ke pïïr abïk aa kuëër bei ë yeyic.”

³⁹ Aa luel ee kënë në këde Wëidït, Wëi bïï kɔc gam en lɔ̈ɔ̈k nööm, Wëidït aake ŋoot ke ke kënë guɔ gam, luɔi ŋootë Yecu ke kënë guɔ gäm dhuëëŋ.

Kɔc acïk Keyiic Tek

⁴⁰ Na wën, acïk jamë piŋ, ke luel kɔc juëc ë kut ë kɔc yiic an, “Raanë ee tiët ë yic!”

⁴¹ Ku lueel kɔc kɔ̈k an, “Raanë ee Kërtho!” Ku në kɔc kɔ̈k an, “Cai! Bï Kërtho bɛ̈n bei ë Galili!

⁴² Kënë këcïgɔ̈ɔ̈r lueel, an, Kërtho abɔ̈ në käu de Debid, ku bïï bei ë Betheleɣem, paan ɣɔn nu Debid thïn?”

⁴³ Go ater rɔt cak ë kut ë kɔc yiic në biäkde.

⁴⁴ Kɔc acïk piɔ̈ɔ̈th de luɔi dɔm kek en, ku acïn raan cï e ciin tääu ë yeguöp.

Ciɛ̈n Gäm de Bäny ke Judai

⁴⁵ Go bäny ee kɔc mac bɛ̈n tëde bänydït ke kake Nhialic ku Parithai, gokï keek thiëëc an, “Eeŋö kɛ̈n wek en bɛ̈ɛ̈i?”

⁴⁶ Go bäny ee kɔc mac pɔ̈k nïïm keek an, “Ëcaŋɣɔn acïn raan cï kɔn jam cït man ee raanë!”

⁴⁷ Go Parithai pɔ̈k nïïm keek an, “Cï we math ayadäŋ?

⁴⁸ De raan töŋ cï ye gam në bäny yiic ayï Parithai yiic?

⁴⁹ Ku na kut ë kɔcë kut kuc löŋ, kek adekï gup aciɛɛn!”

⁵⁰ Go Nikodemo (yen aye raan wään bɔ̈ tëde yen wakɔ̈u, ku ye raan ŋic löŋden), go keek thiëëc, an,

⁵¹ “Löŋda acïï këde raan ee guiir, të kën en jam kɔn piŋ ë raan thok, ku jɔ kë looi ŋic?”

⁵² Gokï bɛ̈ɛ̈r, yöökkï, an, “Ayïk yïn, yee raan ë Galili? Kɔɔr ku tïŋ: acïn tiët ee rɔt jɔt bïï bei ë Galili.”

⁵³ Gokï jäl kedhie, lɔ ŋɛk ɣönde, ku lɔ ŋɛk ɣönde.