Jɔn 6 - JAM DE NHIALIC 2011

Yecu Aciëëm Aguum kadhïc de Kɔc

¹ Na wën, acï kakë wan, ke Yecu jël le Baar ë Galili nɔm lɔŋtui, (yen aye wɛ̈ɛ̈r ë Tiberia).

² Ku jɔ biɔɔth cök ë kut dïït ë kɔc, në kë cï kek göök tïŋ ka cï luöi kɔc tök.

³ Go Yecu lɔ ë kuurdït nɔm, le ku nyuuc ëtɛ̈ɛ̈n kekë kɔckɛn ë piööcë.

⁴ Ku Winythok, Dhuëëŋ ë Judai, ë guɔ thiɔ̈k.

⁵ Na wën, ke Yecu jɔt enyin nhial, ku tïŋ kut dïït ë kɔc abɔ̈ tëde yen, go Pilip thiëëc an, “Buk kuïn ɣɔɔc tënou, kuïn bïï kɔckë cam?”

⁶ (Aa lueel kënë them en en: yen guöp aŋic kë bï looi.)

⁷ Go Pilip puk nɔm an, “Kuïn cï pam ɣɔc ë jinii kathiëër acïï keek duëër lëu, luɔi bï ŋɛk dɛ këthiinakäŋ, ku de ŋɛk këthiinakäŋ, raan ëbɛ̈n.”

⁸ Go raan töŋ de kɔckɛn ë piööcë raan cɔl Andereya, mänhë ë Thimon Petero, go lɛ̈k en, an,

⁹ “Ade mɛnhthiin nu eenë, mɛnh muk kuïïn cï pam kadhïc kuïïn ke barli, ku rec thiiakäŋ kaarou: ku naamden akou tëde kɔc juëc yïnya?”

¹⁰ Go Yecu lueel an, “Tɔ kɔc nyuc piny.” Wal juëc anukï ëtɛ̈ɛ̈n. Go röör nyuc piny, kuënden acït aguum kadhïc.

¹¹ Na wën, ke Yecu nöm kuïïn cï pam, ku të cï en thieithieei lueel, ke ke jɔ tɛ̈k kɔckɛn ë piööcë ku tɛ̈kkï kɔc wën cï nyuc piny. Ayï rec aya acï keek looi aya, agokï yök ëbɛ̈n në këdɛn ë kekpiɔ̈ɔ̈th.

¹² Na wën, acïk kuɛth kedhie, ke jɔ lɛ̈k kɔckɛn ë piööcë an, “Kuötkï dhuɔtdɛn cï döŋ ke cïn kë bï määr.”

¹³ Agokï ke kut, ku thiäŋkï diööny kathiëër ku rou në dhuɔth ë kuïïn cï pam kadhïc, kuïïn ke barli, dhuɔth cï döŋ piny tëde kɔc wën cäm.

¹⁴ Ago kɔckë, të cï kek gök cï Yecu looi tïŋ, agokï lueel an, “Ee yic, raanë ee tiët wään, an, bï bɛ̈n ë piny nɔm!”

¹⁵ Të cï Yecu e ŋic nɔn kɔɔr kek luɔi bï kek ë bɛ̈n jɔt, bïk bɛ̈n tɔ ye melik, ke jɔ rɔt kual be lɔ ë kuurdït nɔm etök.

Yecu Acath ë Pïïu Nïïm

¹⁶ Na wën, aacï akɔ̈l thëi, ke kɔckɛn ë piööcë ke ke jɔ lɔ ë wɛ̈ɛ̈r yɔu,

¹⁷ ku lekï ë abëlic, alek lɔɔk Kapernaum. Ku cï piny guɔ cuɔl, ke Yecu ŋoot wei.

¹⁸ Go wɛ̈ɛ̈r lɔ tialtial, wën cï yom pɔ̈t aläl.

¹⁹ Na wën, acïk abël gɛɛr të cït meel kadiäk, ku nɔn ee kek ŋuan, ke ke tïŋ Yecu acath ë wɛ̈ɛ̈ric ë pïïu nïïm, ke bɔ̈ të nu abël: agokï riɔ̈ɔ̈c.

²⁰ Ago lɛ̈k keek an, “Ee yɛn, duökï riɔ̈c.”

²¹ Gokï gam tɔkï lɔ ë abëlic: ku jɔ abël guɔ ɣet lɔɔk ënɔnthiinë, të wën le kek thïn.

Kɔc Akɔɔrkï Yecu

²² Na ɣɔn amiäk, ke kut ë kɔc wään kääc ë wɛ̈ɛ̈r nɔm, lɔŋ ë jël kek thïn, acïn abël däŋ ë cïk tïŋ ëtɛ̈ɛ̈n, ee abël wään cï kɔckɛn ë piööcë lɔ thïn etök, ku acïk Yecu tïŋ wään nɔn kën en lɔ ë abëlic kekë kɔckɛn ë piööcë, kɔckɛn ë piööcë aake jël kapäc.

²³ (Ku abëël kɔ̈k aake bɔ̈ ë Tiberia tei, bïk tëthiääk ke të wään ciɛmë kɔc kuïn cï pam, ke Bɛ̈nydït cï thieithieei kɔn lueel):

²⁴ Na wën, acï kut ë kɔc e tïŋ nɔn liiuwë Yecu ëtɛ̈ɛ̈n, ayï kɔckɛn ë piööcë, ke ke jɔ lɔ ë abëël yiic kek gup, bïk Kapernaum, ke ke kɔɔr Yecu.

Yecu ee Kuïn de Pïïr

²⁵ Na wën, acïk e yök lɔŋtui, ke jɔkï thiëëc an, “Rabi, ë yï bɔ̈ eenë nɛn?”

²⁶ Go Yecu pɔ̈k nɔm keek an, “Wek yɔ̈ɔ̈k ëyic, an, acie luɔi cä wek göök tïŋ, ee luɔi cä wek cam në kuïn cï pam, abäk kuɛth, yen aa kaar wek ɛn.

²⁷ Duökï ee luui në këcam ee riääk, yak luui në këcam ee tɔ̈u aɣet pïïr athɛɛr, pïïr bïï Wën ë Raan gäm week: yen acïï Nhialic Wääda gäär guöp rinke.”

²⁸ Gokï thiëëc an, “Eeŋö buk dhil looi, ke wo bï luɔi de Nhialic aa looi?”

²⁹ Go Yecu bɛ̈ɛ̈r an, “Luɔi de Nhialic kï an, gëm gam wek raan cï tooc.”

³⁰ Gokï thiëëc an, “Ee gök ŋö loi ënɔɔnë, ke buk tïŋ, agoku yï gam? Ee luɔi ŋö loi?

³¹ Kuarkuɔ aake ye mana cam ë jɔ̈ɔ̈ric, acït man cï e gɔ̈ɔ̈r an, ‘Aa ye keek miɔɔc ë kuïn bɔ̈ paannhial yek cam.”’

³² Go Yecu ke yɔ̈ɔ̈k an, “Acie Mothe yen ë ye week gäm kuïnë, kuïn bɔ̈ paannhial, ee Wäär yen ee we miɔɔc ë kuïn yic bɔ̈ paannhial.

³³ Kuïn ë Nhialic ee kë bɔ̈ piny paannhial, ku ye piny nɔm gäm pïïr.”

³⁴ Agokï lɛ̈k en an, “Bɛ̈ny, ye wo miɔɔc ë kuïnë ëcaŋɣɔn.”

³⁵ Go Yecu ke yɔ̈ɔ̈k an, “Yɛn ee kuïn ë pïïr: raan bɔ̈ tëde yɛn, acïn cɔŋ bï ye bɛ nɔ̈k, ku raan gam ɛn, acïï bï bɛ yal anande.

³⁶ Ku we cä yɔ̈ɔ̈k an, we cï a tïŋ, ku cäkï ya gam.

³⁷ Kɔc kedhie kɔc cï Wäär gäm ɛn, abïk bɛ̈n tëde yɛn, ku raan bɔ̈ tëde yɛn acä bï cieec anandï.

³⁸ Yɛn ëcïï bɔ̈ piny paannhial, bä këde piɔ̈ndï bɛ̈n aa looi, yɛn ë bɔ̈ bä këde piɔ̈n ë raan ë toc ɛn bɛ̈n aa looi.

³⁹ Ku kënë ee këde piɔ̈n ë raan ë toc ɛn an, në käŋ kedhie ka cï gäm ɛn, acïn töŋ bä mɔ̈ɔ̈r, ku abä bɛ jat nhial ëkööl rial wadäŋ.

⁴⁰ Këde piɔ̈n ë Wäär kï, an, bï raan ëbɛ̈n raan tïŋ Wënde, ku gɛm, ka bï bɛ pïïr athɛɛr, ku abä jat nhial ëkööl rial wadäŋ.”

⁴¹ Go Judai ŋun ë keyäc, në jam wën cï lueel, an, “Yɛn ee kuïn ë bɔ̈ piny paannhial.”

⁴² Gokï lueel an, “Kënë cie Yecu, wën ë Jothep, raan ŋic wok wun ayï man? Ku eeŋö jɔ en ë lueel an, yɛn ë bɔ̈ piny paannhial?”

⁴³ Go Yecu bɛ̈ɛ̈r, yöök keek an, “Duökï ŋun wapäc.

⁴⁴ Acïn raan duëër bɛ̈n tëde yɛn, të kënë ye dhil tɔ bɔ̈ në Wääda raan ë toc ɛn, ku abä jat nhial ëkööl rial wadäŋ.

⁴⁵ Ë gɔ̈ɔ̈r ë tït an, ‘Kɔc abïï ke wɛ̈ɛ̈t ë Nhialic kedhie.’ Ago raan ëbɛ̈n raan cï käŋ piŋ tëde Wääda, ku cï wëët, go bɛ̈n tëde yɛn.

⁴⁶ Acïn raan cï Wääda tïŋ tei, ee raan bɔ̈ tëde Nhialic etök, yen acï Wääda tïŋ.

⁴⁷ Wek yɔ̈ɔ̈k ëyic: an raan gam ɛn acath ke pïïr athɛɛr.

⁴⁸ Yɛn ee kuïn ë pïïr.

⁴⁹ Kuarkun aake ye mana cam ë jɔ̈ɔ̈ric, ku acïk thou.

⁵⁰ Kënë ee kuïn bɔ̈ piny paannhial, bï raan aa cam ë ye, ke cïï thou.

⁵¹ Yɛn ee kuïn ë pïïr kuïn ë bɔ̈ piny paannhial: të ciɛmë raan ee kuïnë, ka bï pïïr athɛɛr: yeka, kuïn bä gam en ee rïïŋdï, rïïŋ bä gaam në këde pïïr bï kɔc pïïr kɔc ke piny nɔm.”

⁵² Ago Judai teer kapäc, luelkï an, “Raan duëër wo gäm rïïŋde adï buk cuet?”

⁵³ Go Yecu lɛ̈k keek an, “Wek yɔ̈ɔ̈k ëyic an, të cä wek rïïŋ ë Wën ë Raan ee cuet, ku dɛkkï riɛmde, ka we cïn yiic pïïr.

⁵⁴ Raan ee rïïŋdï cuet, ku dek riɛmdï, ee cath ke pïïr athɛɛr, ku abä jat nhial ëkööl rial wadäŋ.

⁵⁵ Rïïŋdï yen aye këcam yic, ku riɛmdï yen aye këdek yic.

⁵⁶ Raan ee rïïŋdï cuet, ku dek riɛmdï, ka ye rëër ë yayic, ku rɛ̈ɛ̈r ë yeyic.

⁵⁷ Acït Wääda, Raan pïïr, acït man cï en a tooc, ku ya pïïr në Wääda, yen acït pïïr ee raan ë ya cam pïïr ë yen aya.

⁵⁸ Kënë ee kuïn ë bɔ̈ piny paannhial: acïï cït man ɣɔn ye kuarkun cam në mana, ku yek thou, raan ë cam ë kuïnë abï pïïr athɛɛr.”

⁵⁹ Kakë aake lueel ɣön ë Nhialic, të wään wëët en ë Kapernaum.

Wël ke Pïïr Athɛɛr

⁶⁰ Ago kɔc juëc ë kɔckɛn ë piööcë yiic, të cï kek e piŋ, agokï lueel an, “Ee jam ril ee kënë, eeŋa duëër e piŋ?”

⁶¹ Na wën, acï Yecu ë ŋic ë yepiɔ̈u nɔn ŋuunë kɔckɛn ë piööcë në jamë, ke ke jɔ thiëëc an, “Cï jamë we tɔ diu piɔ̈ɔ̈th?”

⁶² Të cä wek Wën ë Raan tïŋ ke lɔ nhial të wään nu yen thïn, duɛ̈ɛ̈rkï lueel wäkdï?

⁶³ Ee wëi kek ee käŋ tɔ pïïr, guöp acïn kën ee lëu: wël cä lɛ̈k week, kek aye wëi, ku yek pïïr.

⁶⁴ Ku ade kɔc kɔ̈k ë weyiic kɔc reec gäm.” (Ɣɔn gɔlë käŋ Yecu aa ŋic kɔc bï ye rɛɛc gam, ku ŋic raan bï ye nyiɛɛn.)

⁶⁵ Go lueel an, “Yen aa lɛ̈k ɛn week an, Acïn raan duëër bɛ̈n tëde yɛn, të kënë ye tɔ bɔ̈ në Wääda.”

⁶⁶ Ëköölë ke kɔc juëc ë kɔckɛn ë piööcë yiic ke ke dɔk röt ciëën, ku cïkï ë bɛ cath ëyen.

⁶⁷ Go Yecu kɔc kathiëër ku rou thiëëc an, “Dɛkï piɔ̈ɔ̈th jäl ayadäŋ?”

⁶⁸ Go Thimon Petero puk nɔm an, “Bɛ̈nydït, buk lɔ tëde ŋa? Yïn cath wekë wël ke pïïr athɛɛr.

⁶⁹ Ku acuk gam ku ŋicku nɔn ee yïn Kërtho ɣeric Wën ë Nhialic.”

⁷⁰ Go Yecu pɔ̈k nɔm keek an, “Kɛ̈n week lɔc wathiëër ku rou, ku raan tök ë weyiic ee jɔŋdït rac!”

⁷¹ Aa luel ee kënë në këde Judath Yithkariɔt, raan töŋ de kɔc kathiëër ku rou, ee yen abï ye lɔ nyiɛɛn.