Jɔn 5 - JAM DE NHIALIC 2011

Raan cï tɔ Waar në Awuöl Nɔm

¹ Na wën, acï kakë thök, ke Judai ë ke jɔ Dhuëëŋ looi, ago Yecu jäl le Jeruthalem.

² Ku ade awuöl nu Jeruthalem awuöl thiääk ke kal thok Kal ë Amɛ̈l, awuöl de göl kadhïc, ku acɔl Bethaida në thoŋ de Ɣeberuu.

³ Ku ade kut dïït ë kɔc ë tɔ̈c ë gölke yiic, kɔc tök, cöör, ayï ŋöl ayï aduɛɛny, ke ke ye kööl bï pïïu weer tiit.

⁴ Ade tunynhial ë Bɛ̈nydït ee bɛ̈n piny le ë awuölic ëkööl mɛɛn, bï pïïu bɛ̈n weer: ku raan ë kɔn lɔ ë pïïu yiic, të cï ke weer, ka bï waar ë juändɛn nu ë yeguöp.

⁵ Ku ade raan ëtɛ̈ɛ̈n, raan ë töök ë run kathiërdiäk ku bɛ̈t.

⁶ Na wën, acï Yecu e tïŋ adhɔt piny, ku ŋic nɔn cï e töök ë run juëc, ke jɔ thiëëc an, “De yï piɔ̈u nɔn bï yïn guöp pial?”

⁷ Go raan tök puk nɔm, an, “Bɛ̈ny, yɛn cïn nɔm raan bï a tääu ë awuölic, të cï pïïu weer: ku tën aa yɛn ŋoot kueer, ke raan däŋ ee guɔ lɔ ë yanɔm tueŋ.”

⁸ Go Yecu yɔ̈ɔ̈k an, “Jɔt rɔt, jɔt biöŋdu, cathë.”

⁹ Go raan guöp waar ënɔnthiinë, go biöŋde jɔt, ku ciɛth. Ku ëköölë ee kööl ë Thabath.

¹⁰ Na wën, ke Judai ke ke yöök raan wën cï dem an, “Ëköölë ee kööl ë Thabath, acïï piɛth luɔi ɣɛ̈ɛ̈c yïn biöŋdu.”

¹¹ Go pɔ̈k nɔm keek an, “Raan ë tɔ ya piɔl, yen aa yöök ɛn an, jɔt biöŋdu, cathë.”

¹² Gokï thiëëc an, “Ee raan ŋa ë yöök yïn an, jɔt biöŋdu, cathë?”

¹³ Ku kuc raan cï dem nɔn ee yen ŋa: Yecu acï jäl, në baŋ de kut ë kɔc nu ëtɛ̈ɛ̈n.

¹⁴ Të cï kakë thök, ke Yecu jɔ raanë yök ë Luaŋdïtic, go lɛ̈k en an, “Tïŋ, yïn cï guöp waar: du käŋ ee bɛ wööc, ke yï cïï kërac bï yök kërɛɛc wär këwään.”

¹⁵ Go raanë jäl le lɛ̈k Judai nɔn ee yen Yecu, yen ë tɔ yen dem.

¹⁶ Yen aaye Judai Yecu yɔŋ, ku yek kɔɔr an, bïk nɔ̈k, në kë cï en kakë looi ëkööl ë Thabath.

¹⁷ Go Yecu pɔ̈k nɔm keek an, “Wäär ee luui aɣet cï ënɔɔnë, ku yɛn ee luui aya.”

¹⁸ Yen akɔɔr Judai luɔi nɛ̈k kek en, acie luɔi cï en kööl ë Thabath rɛɛc theek etök, ee luɔi cï en Nhialic tɔ ye Wun aya, ago rɔt thɔ̈ɔ̈ŋ kekë Nhialic.

Riɛl de Wënde

¹⁹ Go Yecu bɛ̈ɛ̈r, yöök keek an, “Wek yɔ̈ɔ̈k ëyic, an, Wënde acïn kën ee lëu etök, ee kë cï tïŋ aye Wääda looi, yen aye looi: käŋ kedhie kak ee Wääda looi, kek aye Wënde ke looi ayadäŋ.

²⁰ Wääda anhiaar Wënde, go ya nyuöth käŋ kedhie kak ee looi: ku bï nyuöth luɔi dïït wär ee kakë, ke we bï gäi.

²¹ Acït man ee Wääda kɔc cï thou jɔt, tɔ keek pïïr, yen aye këde Wënde aya, ee kɔc tɔ pïïr kɔc nu ë yenpiɔ̈u.

²² Acïn raan ee Wääda löŋde guiir, acï guiëërëlöŋ tääu ë Wënde ciin ëbɛ̈n.

²³ Ke kɔc ë ke bï Wënde aa riëëu kedhie, cït man ee kek Wääda riëëu aya, raan ë toc e.

²⁴ “Wek yɔ̈ɔ̈k ëyic an, Raan piŋ wëlkï, ku gɛm raan ë toc ɛn, ka cath ke pïïr athɛɛr, ku acïn gääk bï tääu ë yeyeth, acï bɛ̈n bei ë thuɔɔuwic, le të nu pïïr.

²⁵ Wek yɔ̈ɔ̈k ëyic an, kööl abɔ̈, ku anu ënɔɔnë, kööl bï kɔc cï thou röl ë Wën ë Nhialic piŋ, ku kɔc ë pïŋ abïk pïïr.

²⁶ Acït man ciɛthë Wääda ke pïïr ë yenhde etök.

²⁷ Ago Wëde gäm bɛ̈ɛ̈ny bï en löŋ de kɔc aa guiir, luɔi ee yen Wën ë Raan.

²⁸ Duökï gäi në kënë: kööl abɔ̈, kööl bï kɔc nu ë rɛ̈ŋ yiic rölde piŋ kɔc kedhie,

²⁹ agokï bɛ̈n biic, kɔc ee këpiɛth looi, abïk röt jɔt në jönërɔt de pïïr, ku jɔt kɔc ee kërac looi röt, në jönërɔt ë gääk nu ë keyiëth.

Cäätɔ de Yecu

³⁰ Yɛn cïn kën aa lëu yatök: kën aa piŋ, yen aya yɛn löŋ guiir: ku piɛth guiëërdï, në kë cän këde piɔ̈ndï ee kɔɔr, ee këde piɔ̈n ë Wäär, raan ë toc ɛn, yen aya kɔɔr.

³¹ Të ta yɛn rɔt ee cäätɔ ë rɔt, ke këdï acie yic.

³² Ee raan däŋ yen aye cäätɔdï, ku këdɛn lueel ee këdï aŋiɛc nɔn ee yen yic.

³³ Wek ë kɔc tuöc Jɔn, ku acï aa cäätɔ de yic.

³⁴ Ku yɛn cïï këde raan ee gam: kakë alɛ̈k ke week tei, ke we bï kony wëi.

³⁵ Yen aaye many ë dɛ̈p ku ye piny riaau: ku wek ë piɔ̈ɔ̈th dɛ luɔi bä wek piɔ̈ɔ̈th miɛt në maanyde tëthiinakäŋ.

³⁶ Ku yɛn cath wo cäätɔ wär Jɔn: luɔi cï Wääda yiɛ̈n ɛn, bä ke bɛ̈n thöl, luɔi luɔɔiyë, kek aye cäätɔɔkï, lueel en, an, ee yen Wääda yen ë toc ɛn.

³⁷ Ku Wääda guöp, raan ë toc ɛn, yen aye cäätɔdï. Rölde akɛ̈nkï piŋ anandun, ayï täu tɔ̈u en akɛ̈nkï tïŋ,

³⁸ ku jamde acie tɔ̈u ë weyiic: luɔi cä wek raan ee gam, raan ë tooc.

³⁹ We ye kacïgɔ̈ɔ̈r cök ë kuɛɛn wek keyiic, luɔi aa wek e lueel an, yak pïïr athɛɛr yök në keyiic, ku kakë ayek cäätɔɔkï,

⁴⁰ ku wek ee rɛɛc bɛ̈n tëde yɛn, bäk pïïr bɛ̈n yök.

⁴¹ “Yɛn cïï lɛc ee gam tëde kɔc.

⁴² Ku wek ŋiɛc, nɔn liiuwë nhiëër ë Nhialic ë weyiic.

⁴³ Yɛn ë bɔ̈ në rin ke Wäär, ku we kën a gam: të bï raan däŋ në rin ke yenguöp, yen abäk gam.

⁴⁴ Duɛ̈ɛ̈rkï gäm lëu wäkdï, wek kɔc ë lɛc gam lɛc aa wek röt leec wapäc, ku cäkï lɛc ee kɔɔr lɛc bɔ̈ tëde Nhialic etök?

⁴⁵ Duökï ee lueel nɔn bän we lɔ gaany ë Wäär nɔm: raan gɔɔny week anu, yen Mothe raan ŋäthkï.

⁴⁶ Tëë we cï Mothe gam, adï cäk ɛn gam aya: acï këdï gɔ̈ɔ̈r.

⁴⁷ Ku të rɛɛc wek kakɛn cï gɔ̈ɔ̈r gam, ke we bï wëlkï gam wäkdï?”