Jɔn 4 - JAM DE NHIALIC 2011

Yecu ku Tiiŋ ë Thamaria

¹ Na wën, acï Bɛ̈nydït e ŋic nɔn cï Parithai ë piŋ nɔn ë Yecu kɔc juëc tɔ ye kɔcpiööcë ku ye keek baptith awär Jɔn.

² (Ku Yecu guöp aacïï kɔc ë baptith, ee kɔckɛn ë piööcë kek aye kɔc baptith.)

³ Ke jël ë Juda, be lɔ Galili,

⁴ dhil Thamaria reetic.

⁵ Ago bɛ̈n të nu paan töŋ de Thamaria, ee pänydïït cɔl Thukara, athiääk kekë dom cïï Jakop gäm wëndɛn Jothep.

⁶ Ku yinh ë Jakop aa nu ëtɛ̈ɛ̈n. Go Yecu nyuc ë yith nɔm aya, ke cï dak ke cäth. Ee të cït nɔn ë thaar kadhetem.

⁷ Na wën, ke tiiŋ ë Thamaria bɔ̈, bï bɛ̈n gem ë pïïu: go Yecu yɔ̈ɔ̈k an, “Miɔc ɛn ë ka dɛk.”

⁸ (Kɔckɛn ë piööcë acïk guɔ jäl lek pänydït lek ɣööc ë këcam.)

⁹ Go tiiŋ ë Thamaria puk nɔm an, “Ee käŋö ke lip yïn ɛn ë pïïu, ku ye Judai, ku ya tiiŋ ë Thamaria?” (Judai kekë kɔc ke Thamaria acïkï raan.)

¹⁰ Go Yecu bɛ̈ɛ̈r, lueel an, “Tëë yï ŋic miɔ̈c de Nhialic, ku ŋic raan wën thɛɛr yöök yïn an, “Miɔc ɛn ë ka dɛk, adï cï lip tëde yen, ku adï cï yï gäm pïïu pïïr.”

¹¹ Go tik lueel an, “Bɛ̈ny, yïn cïn kën ee yïn gem, ku yith amec thar, bä pïïu pïïrë yök tënou?

¹² Dït awär kuɛɛrdan Jakop, raan ë gëm wook yith, ku ye dek ë ye, yen, ku mïthke, ku ɣɔ̈kke?”

¹³ Go Yecu bɛ̈ɛ̈r, lueel an, “Raan ëbɛ̈n raan ë dek ë pïïukë abï bɛ aa yal:

¹⁴ ku raan ëbɛ̈n raan ë dek ë pïïu bä gäm en acïï bï bɛ aa yal anande, pïïu bä gäm en abïk aa nyin de pïïu ë yeyäc, awaŋ bï aa cool ë tul ɣet pïïr athɛɛr.”

¹⁵ Go tik lueel an, “Bɛ̈ny, miɔc ɛn ë pïïuke, ke ya cïï bï bɛ aa yal, ku cä bï bɛ aa bɛ̈n ee tënë bä bɛ̈n gem.”

¹⁶ Go Yecu lueel an, “Lɔ, cɔl monydu, ku bäkï eenë.”

¹⁷ Go tik bɛ̈ɛ̈r lueel an, “Yɛn cïn nɔm moc.” Go Yecu lueel an, “Yïn ë yic lueel an, yɛn cïn nɔm moc.

¹⁸ Röörku acïk aa dhïc, ku mony rɛ̈ɛ̈r wek ëtök ënɔɔnë acie monydu. Këduön cïï lueelë ee yic.”

¹⁹ Go tik lueel an, “Bɛ̈ny, yïn ŋiɛc yïn ee tiët.

²⁰ Kuarkuɔ aake ye lam ë kuurë nɔm, ku yak lueel an, ee Jeruthalem en ee të bï kɔc dhil aa lam thïn.”

²¹ Go Yecu lueel an, “Tiiŋë, gam këdï an, ade kööl bï bɛ̈n kööl bä wek Wääda lam thïn, ku acie kuurë nɔm, ku acie Jeruthalem aya.

²² Wek ee kë kuöckï lam: ee kë ŋicku yen ayok lam: kunydewëi abɔ̈ tëde Judai.

²³ Ku ade kööl bɔ̈, ku anu ënɔɔnë, kööl bïï kɔc wääda lam thïn në wëi ku në yic, kek kɔc ee läm yic kɔɔr: ku Wääda ee kɔc cït keek kɔɔr bïk aa kɔc ë ye lam.

²⁴ Nhialic ee Wëi, ku kɔc lam en abïk e dhil lam në wëi ku në yic.”

²⁵ Go tik lueel an, “Aŋiɛc nɔn bï Mathia bɛ̈n (yen acɔl Kërtho): ku të cï en bɛ̈n, ka bï wo guëër käŋ kedhie.”

²⁶ Go Yecu lueel an, “Yɛn aye yen, yɛn ë raan jam wo yïn.”

²⁷ Na wën, ke kɔckɛn ë piööcë ë ke bɔ̈, gokï gäi ë kë jiɛɛm en kekë tik, ku acïn raan cï e thiëëc an, “Eeŋö kɔɔr?” Ku an, “Eeŋö jiɛɛm yïn wekë yen?”

²⁸ Go tik tönydɛn ë pïïu nyääŋ piny, ku jël le pänydït, le lɛ̈k kɔc an,

²⁹ “Bäkï tiëŋkï raan cï a lɛ̈k käŋ kedhie ka cä looi ëcaŋɣɔn: cïï dhil aa Kërtho ee kënë?”

³⁰ Gokï lɔ biic pänydït, bïk tëde yen.

³¹ Na wën, aŋootkï wei, ke lɛ̈ŋ kɔcpiööcë an, “Bɛ̈ny, cämë!”

³² Go lueel an, “Yɛn de mïïth cam mïïth kuöckï.”

³³ Go kɔcpiööcë röt thiëëc kapäc an, “De këcam cï yiɛ̈n en?”

³⁴ Go Yecu ke yɔ̈ɔ̈k an, “Luɔi luɔi ɛn këde piɔ̈n ë raan ë toc ɛn, ayï thöl bän luɔide thöl, yen aye këcamdï.

³⁵ Cäkï ee lueel an, “Ŋoot pɛ̈i wei kaŋuan, pɛ̈i ke tëm ë rap? Wɔikï, wek yɔ̈ɔ̈k an, ‘Jatkï wenyïïn nhial, ku wɔikï duum, acïk guɔ ɣɛɛr, acï aa të tem ëke!

³⁶ Ku raan ë tem ee ariöp yök, ku ye rap kut nïïm ë këde pïïr athɛɛr, ago raan ee com ayï raan ee tem agokï piɔ̈ɔ̈th miɛt ëtök.

³⁷ Ago jam wäänë go aa yic an, ‘Ŋɛk ee com, ku tëm ŋɛk.’

³⁸ Wek ë tuɔɔc bäk dom lɔ tem dom kɛ̈n wek kɔn luui thïn: kɔc kɔ̈k acïk luui, ku wek ë lɔ̈ɔ̈k löök ë luɔidenic.”

³⁹ Go kɔc juëc kɔc ke Thamaria kɔc ke pänydïïtë agokï këde gam në baŋ de jam de tik, wën cï en ë lueel an, “Acï a lɛ̈k käŋ kedhie ka cä looi ëcaŋɣɔn.”

⁴⁰ Na wën, aacï kɔc ke Thamaria bɛ̈n tëde yen, ke jɔkï lɔ̈ŋ an, bï rëër ke keek: go rëër ëtɛ̈ɛ̈n ë akööl kaarou.

⁴¹ Go kɔc juëc gam awärkï kɔc wään aläl, në biäk de jamde guöp,

⁴² agokï lɛ̈k tik an, “Wok ë gam ënɔɔnë, ku acie biäk de jamdu: acuk piŋ ë wok gup, agoku ŋic nɔn ee yen Kërtho në yic, konydewëi de jäŋ ëbɛ̈n.”

Yecu atɔ Wën ë Bɛ̈ny Dem

⁴³ Na wën, ë nïn kaarou, ke jɔ jäl ëtɛ̈ɛ̈n le Galili.

⁴⁴ Yecu guöp ee jamë gam an, “Ee yic an, Tiët acïn riëëu ee yök paanden guöp.”

⁴⁵ Na wën, aacï guɔ bɛ̈n Galili, ke loor kɔc ke Galili, luɔi cï kek käŋ tïŋ kedhie ka cï looi ë Jeruthalem ë akööl ke Dhuëëŋ: aake cï lɔ tëde Dhuëëŋ ayadäŋ.

⁴⁶ Na wën, ke be bɛ̈n Kana de Galili, të wään puk en pïïu aye mɔ̈u. Ku ade bɛ̈ny ëtɛ̈ɛ̈n, bɛ̈ny töökë wënde ë Kapernaum.

⁴⁷ Të cï en e piŋ nɔn cï Yecu bɛ̈n bei ë Juda bïï Galili, ke jɔ lɔ tëde yen, go lɔ̈ŋ an, bï lɔ, le wënde tɔ dem, meth akɔɔr thuɔɔu.

⁴⁸ Go Yecu lueel an, “Të kɛ̈n wek göök tïŋ ayï kake gäi, ka cäkï bï gam anandun.”

⁴⁹ Go bɛ̈ny lueel an, “Bɛ̈ny, lokku tei të ŋootë mɛnhdiën thiinë ke kën thou.”

⁵⁰ Go Yecu yɔ̈ɔ̈k an, “Lɔ wëndu apïïr!” Go raan jam gam, jam cï Yecu lɛ̈k en, ku jɔ jäl.

⁵¹ Ku të ŋoot en kueer, ke räm ke lïïmke gokï lɛ̈k yen an, “Mɛnhdu apïïr!”

⁵² Go ke luɔp an, “Ëpɛ̈lë juäi piny ë thaar kadï?” Gokï lueel an, “Wäänaköl, ë thaar kadhorou, yen aa pɛ̈lë juäi en.”

⁵³ Go wun meth ŋic nɔn ee yen thaar man wään lëkë Yecu ë yen an, “Wëndu apïïr.” Go gam, yen kekë dhiënde ëbɛ̈n.

⁵⁴ Gök ee kek rou kï, gök cïï Yecu looi, të cï en bɛ̈n bei ë Judaya bïï Galili.