Jɔn 3 - JAM DE NHIALIC 2011

Yecu ku Nikodemo

¹ Raan anu raan ë Parithai, cɔl Nikodemo, ee bɛ̈ny ë Judai.

² Ë bɛ̈n tëde Yecu wakɔ̈u, bï ku lueel an, “Rabi, yïn ŋicku nɔn ee yïn raan ee wëët raan ë bɔ̈ tëde Nhialic: acïn raan duëër göök loiyë looi, të cïï Nhialic cath ke yen.”

³ Go Yecu puk nɔm an, “Yïn yɔ̈ɔ̈k ëyic an, të kënë raan bɛ dhiëëth, ka cïï ciɛɛŋ de Nhialic duëër tïŋ.”

⁴ Go Nikodemo thiëëc an, “Duëërë raan bɛ dhiëëth adï, të cï en dït? Duëër bɛ lɔ ë man yäc, ku beyë dhiëëth!”

⁵ Go Yecu puk nɔm an, “Yïn yɔ̈ɔ̈k ëyic an, të kënë raan dhiëëth në pïïu kekë wëi, ka cïï duëër lɔ ë ciɛɛŋ de Nhialicic.

⁶ Kë cï dhiëëth në guöp ee guöp, ku ke cï dhiëëth ë Wëi ee wëi.

⁷ Du gäi nɔn cän e lɛ̈k yïn an, we bï dhil bɛ dhiëëth.

⁸ Yom ee pɔ̈t tëde piɔ̈nde, ku yïn ee awööude piŋ, ku kuc të bï yen thïn, ayï të le yen thïn: raan ëbɛ̈n raan cï dhiëëth ë Wëi yen acït en.”

⁹ Go Nikodemo bɛ̈ɛ̈r, thiëëc an, “Duëër kakë bɛ̈n adï?”

¹⁰ Go Yecu puk nɔm, lueel an, “Ye raan ë Yithriɛl wɛ̈ɛ̈t, ku kuc kakë?”

¹¹ Yïn yɔ̈ɔ̈k ëyic an, “Wok ee kë ŋicku lueel ku yok cäätɔɔ në ka cuk tïŋ, ku wek cïï këda ee gam.

¹² Të cän week lɛ̈k ka ke piny nɔm, ku cäkï gam, ku na lɛ̈k week ka ke paannhial, bäk gam wäkdï?

¹³ Acïn raan cï lɔ paannhial, ee raan cï bɛ̈n piny paannhial etök, yen aye Wën ë Raan Wën nu paannhial.

¹⁴ Acït man cï Mothe kërac jat nhial ë jɔ̈ɔ̈ric, yen acït jön bï Wën ë Raan dhil jat nhial aya:

¹⁵ ke raan gam ɛn cïï bï määr, raan ëbɛ̈n, ku bï dɛ pïïr athɛɛr.

¹⁶ Nhialic ë piny nɔm nhiaar aläl, arëk abï miɔɔc ë Wëndɛn cï dhiëëth etök, ke raan gam en cïï bï määr, raan ëbɛ̈n, ku bï dɛ pïïr athɛɛr.

¹⁷ Nhialic aacïï Wënde tuuc ë piny nɔm, bï kɔc ke piny nɔm yiëk yiëth gääk, ee luɔi bï kɔc ke piny nɔm kony wëi, en ë tuuc en en.

¹⁸ Raan gam en acïn gääk nu ë yeyeth: ku raan reec gäm, ë guɔ yiëk yeth gääk ënɔɔnë, luɔi reec en gäm në rin ke Wën ë Nhialic, wën cï dhiëëth etök.

¹⁹ Gääk cï tääu ë kɔc yiëth kï, ɣɛɛrëpiny ëbɛ̈n ë piny nɔm, go kɔc cuɔlëpiny nhiaar awär ɣɛɛrëpiny, ë luɔi rɛɛcë luɔiden.

²⁰ Raan ëbɛ̈n raan ë kërac looi, ee ɣɛɛrëpiny maan, ku ye rɛɛc bɛ̈n tëɣer, ke luɔide cïï bï aa jɔ̈ɔ̈ny.

²¹ Ku raan ee yic looi ee bɛ̈n tëɣer, ke luɔide bï aa tïc, nɔn cï e looi në Nhialic.

Yecu ku Jɔn

²² Na wën, acï kakë wan, ke Yecu bɔ̈ piny de Juda kekë kɔckɛn ë piööcë, go rëër ke keek ëtɛ̈ɛ̈n, ku ye kɔc baptith.

²³ Ku Jɔn ayadäŋ aaye kɔc baptith ë Ayinon thiääk ke Thalim, luɔi nu pïïu juëc ëtɛ̈ɛ̈n: ago kɔc bɛ̈n, bï ke bɛ̈n baptith.

²⁴ Jɔn aa ŋoot ke kënë guɔ cuat ë aloocic.

²⁵ Na wën, ke kɔcpiööcë Jɔn ke ke teer në Judai në këde waak.

²⁶ Agokï bɛ̈n tëde Jɔn, bïk ku luelkï an, “Rabi, raan ë rɛ̈ɛ̈r wek ëtök ë Jordan nɔm lɔŋtui, raan cï yïn këde lueel, tïŋ, ee kɔc baptith, go kɔc aa lɔ tëde yen kedhie!”

²⁷ Go Jɔn bɛ̈ɛ̈r, lueel an, “Acïn kë duëërë raan yök, të kënë ye gäm en nhial.

²⁸ Week gup wek e cäätɔɔ në kë cä lueel, an, ‘Yɛn cie Kërtho, ku yɛn aa kɔnë tuööc ë yenɔm tueŋ.’

²⁹ Raan thiak nyan lueelë thiëëkë, yen aye monythiëk: ku mɛ̈thë monythiëk, raan kääc ëtɛ̈ɛ̈n ku piŋ jamde, ee piɔ̈u miɛt aläl ë röl ë monythiëk: miɛt miɛt ɛn piɔ̈u kï, acï guɔ aa yic.

³⁰ Yen abï rɔt dhil aa ŋuak, ku yɛn bï dhil aa lɔ ciëën.”

Raan ë Bɔ̈ Paannhial

³¹ Raan bɔ̈ paannhial yen anu ë kɔc nïïm kedhie. Raan bɔ̈ ë piny nɔm, yen aye këde piny, ku ye ka ke piny lueel: raan bɔ̈ paannhial anu ë kɔc nïïm kedhie.

³² Go ya cäätɔ në ka cï tïŋ ku në ka cï piŋ, go këde aa lueel, ku acïn raan ë këde gam.

³³ Raan ë këde gam, acï gɔ̈ɔ̈r ë katimde an, Nhialic yen aye yic.

³⁴ Raan ë tuuc ë Nhialic ee wël ke Nhialic lueel: ku acïï ë Nhialic miɔɔc ë Wëi në thëm them en keek.

³⁵ Wääda anhiaar wënde, ago käŋ tääu ë yecin kedhie.

³⁶ Raan gam Wënde ee cath ke pïïr athɛɛr, ku raan reec Wënde gam, acïï pïïr bï tïŋ, agönh ë Nhialic ee rëër ë yeyeth.