Jɔn 21 - JAM DE NHIALIC 2011

Yecu acï Tuöl tëde Kɔcpiööcë Kadhorou

¹ Na wën, aacï kakë wan, ke Yecu be rɔt nyuöth kɔckɛn ë piööcë ë wɛ̈ɛ̈r yɔu, wɛ̈ɛ̈r cɔl Tiberia. Go rɔt nyuɔɔth alë.

² Thimon Petero, ku Thoma cɔl Didima, ku Nathanyel ë Kana nu Galili, ku wɛ̈ɛ̈t ke Dhebedayo, ku kɔc kɔ̈k kaarou ë kɔckɛn ë piööcë yiic, aake nu ëtök.

³ Na wën, ke ke yöök e Thimon Petero an, “Yɛn lɔ dep.” Gokï lueel an, “Ayï wook, wo lɔ ë yïn ëtök.” Gokï jäl lekkï abëlic ënɔnthiinë, ku ɣɔn awakɔ̈uwë acïn kë cïk yök.

⁴ Na wën, aacï piny guɔ ruu, ke Yecu kääc e wɛ̈ɛ̈r yɔu: ku akuc kɔcpiööcë nɔn ee yen Yecu.

⁵ Go Yecu ke thiëëc an, “Wäthii, de këcam cath ke week?” Gokï bɛ̈ɛ̈r an, “Ei, acïn këdäŋ.”

⁶ Go ke yɔ̈ɔ̈k an, “Dɛɛnykï bɔi ë abël baŋ cuëc, ke we bï yök.” Agokï dɛɛny, na wën, ke dhal keek ë mïït bei në juëc de rec.

⁷ Go raanpiööcë raan nhiɛɛr Yecu go Petero yɔ̈ɔ̈k an, “Bɛ̈nydït ka!” Na wën, a piŋ Thimon Petero yen nɔn ee yen Bɛ̈nydït, ke jɔ alulutde tääu ë yekɔ̈u (wënthɛɛr aa cïn kɔ̈u lupɔ), go rɔt cuat wïïr.

⁸ Go kɔc kɔ̈k ë piööcë gokï bɛ̈n ë abël thiinë yic (acïkï mec në biic, acït bot kaarou ke akeem tei), ke ke thel bɔi deyic rec.

⁹ Na wën, aa cïk bɛ̈n, ke ke tïŋ many ë cool ëtɛ̈ɛ̈n, ku nu rɛ̈c ë mac nɔm, ku kuïn cï pam.

¹⁰ Go Yecu ke yɔ̈ɔ̈k an, “Bɛ̈ɛ̈ikï rec kɔ̈k wën cäk dɔm.”

¹¹ Go Thimon Petero lɔ wïïr, le ku mïït bɔi bei, ë thiäŋ ke rec dït, bɔt tök ku thiërdhïc ku diäk, ku acakaa wën juëc kek aläl, ke bɔi akën bɛ̈n tuɛny.

¹² Go Yecu ke cɔɔl an, “Bäk cämkï.” Ku acïn raan töŋ ë kɔcpiööcë duëër e thiëëc an, “Ee yïn ŋa?” Aŋickï nɔn ee yen Bɛ̈nydït.

¹³ Go Yecu bɛ̈n, bï ku nööm kuïn cï pam, gɛ̈m keek, ayï rec aya.

¹⁴ Nyuöth cïï Yecu rɔt nyuöth kɔckɛn ë piööcë acï aa diäk ee kënë, të wään jɔt en rɔt ë kɔc cï thou yiic.

Yecu ku Petero

¹⁵ Na wën, aa cïk thök ë cäm, ke Yecu thiëc Thimon Petero an, “Thimon, wën e Jona, nhiaar ɛn awär kɔckë?” Go gam an, “Ɣɛɛ, Bɛ̈nydït, aŋic nɔn nhiaar ɛn yïn.” Go yɔ̈ɔ̈k an, “Nyuääthë amithöökkiën amɛ̈l.”

¹⁶ Go bɛ thiëëc raanrou, an, “Thimon, wën ë Jona, nhiaar ɛn?” Go bɛ̈ɛ̈r an, “Ɣɛɛ, Bɛ̈nydït, aŋic nɔn nhiaar ɛn yïn.” Go yɔ̈ɔ̈k an, “Tit amɛ̈lkï.”

¹⁷ Go bɛ thiëëc raandiäk an, “Thimon, wën ë Jona, nhiaar ɛn?” Petero piɔ̈u diu luɔi cï en e thiëëc raandiäk an, “Nhiaar ɛn?” Go lueel an, “Bɛ̈nydït, yïn ŋic këriëëc ëbɛ̈n, aŋic nɔn nhiaar ɛn yïn.” Go Yecu yɔ̈ɔ̈k an, “Nyuääthë amɛ̈lkï.”

¹⁸ Yïn yɔ̈ɔ̈k ë yic an, “Wään koor yïn, yïn ee yïthar duut, ago aa cath lɔɔr tëduön ë yïnpiɔ̈u: rial, të cï yïn dhiɔp, ka yïn bï yïcin riny, ago raan däŋ yï duut, ku leer yï të liu ë yïpiɔ̈u.”

¹⁹ (Aa luel kënë nyooth en thon bï en thou, ago Nhialic tɔ lec.) Na wën, aacï kënë lueel, ke yöök an, “Kuany a cök!”

Yecu kekë Kɔcpiööcë Kɔ̈k

²⁰ Go Petero rɔt puk, ku tïŋ raanpiööcë raan nhiɛɛr Yecu, ke kuany kecök, yen aye raan wään kɛn rɔt ë yeyɔu tëde cäm thëën, raan wään thiëc an, “Bɛ̈nydït, eeŋa ee raan bï yï nyiɛɛn?”

²¹ Të cï Petero ye tïŋ, ke jɔ Yecu thiëëc an, “Bɛ̈nydït, ku raanë bï yiɛ̈ndï?”

²² Go Yecu lueel an, “Të dɛ yɛn piɔ̈u luɔi bï en tɔ̈u aɣet të bä yɛn lɔ bɛ̈n, ke eeŋödu thïn? Yïn, kuany a cök!”

²³ Go jamë tɛɛi ë wäthii yiic an, cï raanëpiööcëyë bï thou. Ku akënë Yecu e lueel, nɔn cïï en bï thou, aa lueel an, “Të dɛ yɛn piɔ̈u luɔi bï en tɔ̈u aɣet të bä yɛn lɔ bɛ̈n, ke eeŋödu thïn?”

²⁴ Yen raanëpiööcëyë ee yen ee cäätɔ de ee kakë, ku yen aa gäär kakë, ku wo ŋic jamde nɔn ee yen yic.

Thök

²⁵ Ku ade kajuëc kɔ̈k aya, ka cïï Yecu looi, ku tëë ke cï gɔ̈ɔ̈r kedhie, në tök tök, acakaa piny nɔm ëbɛ̈n acïï kacïgɔ̈ɔ̈r duëër muk kacïgɔ̈ɔ̈r bïï keek gɔ̈ɔ̈r. Amiin.