Jɔn 20 - JAM DE NHIALIC 2011

Raŋ Cïnic Raan

¹ Na wën, ë kööl tueŋ ë akööl kadhorou yiic, ke Meri Magdalene rial ɣɔn amiäk, të ŋootë piny ke col, le të nu raŋ, le ku tïŋ kuur acï nyaai ë raŋ thok.

² Ago kat, le tëde Thimon Petero, ku raan däŋ ë piööcë, raan nhiɛɛr Yecu, le ku lëk keek an, “Acïk Bɛ̈nydït jɔt ë raŋic, ku akucku të cï kek e tääu thïn?”

³ Go Petero rɔt jɔt, kekë raan däŋ ë piööcë, lek të nu raŋ.

⁴ Aake riŋ kaarou ëtök, go raan däŋ ë piööcë go Petero wöör ë riŋ, go kɔn ɣet të nu raŋ.

⁵ Na wën, ke guŋ, luiit raŋic, ku tïŋ lupɔɔ linɔn ke ke dhɔt piny, ku akën lɔ thïn.

⁶ Na wën, ke Thimon Petero löök bɛ̈n ë yecök, bï ku le ë raŋic, go lupɔɔ linɔn tïŋ ke ke dhɔt piny,

⁷ ku tïŋ lupɔ wään nu ë yenɔm, ke cïï tɔ̈u kekë lupɔɔ linɔn ëtök, acï matic, ku tɔ̈u tëde etök.

⁸ Go raan däŋ ë piööcë jɔ lɔ thïn aya, raan wën cï kɔn bɛ̈n të nu raŋ, go tïŋ, ku gɛm.

⁹ (Aŋootkï ke ke kuc këcïgɔ̈ɔ̈r an, bï rɔt dhil jɔt ë kɔc cï thou yiic.)

¹⁰ Go kɔcpiööcë kenïïm bɛ dhuöny paanden.

Yecu ë Tuöl tëde Meri Magdalene

¹¹ Ku kääc Meri ë raŋ thok biic ke dhiau. Ku të dhiɛɛu en, ke jɔ guŋ luiit raŋic,

¹² go tuucnhial tïŋ kaarou, aceŋkï kaɣer, ke ke rɛ̈ɛ̈r, tök ë yenɔm, ku tök ë yecök, të wään cï guöp de Yecu tɔ̈ɔ̈u thïn.

¹³ Gokï thiëëc an, “Tiiŋë, eeŋö dhiëëuwë?” Go lueel an, “Ee luɔi cï kek Bɛ̈nydït jɔt, ku akuöc të cï kek e tääu thïn!”

¹⁴ Na wën, aacï kakë lueel, ke jɔ yekɔ̈u puk, ku tïŋ Yecu ke kääc, ku kuc nɔn ee yen Yecu.

¹⁵ Go Yecu thiëëc an, “Tiiŋë eeŋö dhiëëuwë? Eeŋa kɔɔr?” Go lueel ë yepiɔ̈u nɔn ee yen raan ë dom tiit, go lueel an, “Bɛ̈ny, të cï yïn e jɔt, ke yï lëk ɛn të cï yïn e tääu thïn, ke bä jɔt.”

¹⁶ Go Yecu lueel an, “Meri!” Go rɔt puk, ku lueel an, “Raboni!” (Yen aye “Bɛ̈nydiën ee wëët.”)

¹⁷ Go Yecu yɔ̈ɔ̈k an, “Du ya jak guöp, yɛn ŋoot ke yɛn kën lɔ nhial tëde wäär. Jɔ lɔ tëde wɛ̈ɛ̈tamäthkuɔ, lɛ̈kë keek, an, Yɛn lɔ nhial tëde Wäär, ku ye Wuöördun, ku la tëde Nhialicdï, ku ye Nhialicdun.”

¹⁸ Go Meri Magdalene bɛ̈n ku lëk kɔcpiööcë an, yɛn ë Bɛ̈nydït tïŋ, ayï luɔi cï en e lɛ̈k ee kakë.

Yecu Atul tëde Kɔckɛn ë Piööcë

¹⁹ Na ɣɔn thëën, ë köölmanë guöp, yen aye kööl tueŋ ë akööl kadhorou yiic, të cï ɣöt gäär, ɣön cï kɔcpiööcë guëër thïn, në riɔ̈ɔ̈c riɔ̈ɔ̈c kek ë Judai, ke Yecu bɔ̈ ku kɛ̈ɛ̈c ë ciɛɛlic, yöök keek, an, “Ë mät tɔ̈u ke week.”

²⁰ Na wën, aacï kënë lueel, ke ke jɔ nyuöth yecin ku yelɔ̈ɔ̈m. Go kɔcpiööcë piɔ̈ɔ̈th miɛt, wën cï kek Bɛ̈nydït tïŋ.

²¹ Go Yecu ke bɛ yɔ̈ɔ̈k an, “Ë mät tɔ̈u ke week, cït man cï Wäär a tooc, yen atuɔɔc ɛn week aya.”

²² Na wën, aacï kënë lueel, ke jɔ wëi ë kegup, ku yöök keek an, “Nämkï Wëidït ɣer.

²³ Kɔc kedhie kɔc bäk keek päl karɛcken, ka bï ke päl keek, ku kɔc cäkï keek bï päl karɛcken, ka cïï keek bïï päl karɛcken.”

Yecu ku Thoma

²⁴ Ku Thoma, raan töŋ ë kɔc thiëër ku rou, raan cɔl Didima, aa liu ë keyiic wään bï Yecu.

²⁵ Ago kɔc kɔ̈k ë piööcë yɔ̈ɔ̈k an, “Wok ë Bɛ̈nydït tïŋ!” Go keek yɔ̈ɔ̈k an, “Të ŋuɔɔt ɛn ke ya kën tëde wiɛth tïŋ ë yecin, aguɔ yaciin tääu tëde wiɛth, ku të ŋuɔɔt ɛn ke ya kën a ciin luöt ë yelɔ̈ɔ̈m, ka cä bï gam.”

²⁶ Na wën, aacï nïn aa bɛ̈t, ke kɔckɛn ë piööcë ke ke be guëër ɣöt, ku nu Thoma kekë keek. Na wën, ke Yecu bɔ̈, ku ɣöt acï gäär, bïï ku kɛ̈ɛ̈c ë ciɛɛlic, lueel an, “Ë mät tɔ̈u ke week.”

²⁷ Go Thoma yɔ̈ɔ̈k an, “Bɛ̈ɛ̈iyë yïciin eenë, ciin thiinë ku woi a cin, ku bɛ̈ɛ̈iyë yïciin, luötë ë yalɔ̈ɔ̈m: ku du gäm reec, gämë!”

²⁸ Go Thoma bɛ̈ɛ̈r, lueel an, “Bɛ̈nydiëndït, ku Nhialicdï.”

²⁹ Go Yecu yɔ̈ɔ̈k an, “Tïŋ cï yïn a tïŋ, Thoma, yen aa gɛ̈m yïn? Thieithieei ë kɔc cï gam, acakaa kek ë ke kën a tïŋ!”

Nɔm de Këcigɔ̈ɔ̈rë

³⁰ Göök juëc kɔ̈k aya acï Yecu ke looi ë kɔckɛn ë piööcë nïïm, ka kënë gɔ̈ɔ̈r në këcïgɔ̈ɔ̈rë yic.

³¹ Ku kakë acï ke gɔ̈ɔ̈r në luɔi bä wek Yecu gam, nɔn ee yen Kërtho, Wën ë Nhialic, ku gäm gäm wek, yen abä wek dɛ pïïr në rinke.