Jɔn 2 - JAM DE NHIALIC 2011

Thiëŋ de Kana

¹ Na wën, ëkööl ee kek diäk ade thiëŋ cï lueel ë Kana de Galili, ku nu man Yecu ëtɛ̈ɛ̈n:

² ayï Yecu ayï kɔckɛn ë piööcë acï ke cɔɔl ë thiëëkic ayadäŋ.

³ Na wën, aacï mɔ̈u dak, mɔ̈ndɛn ë cïk looi, ke Yecu ë yöök ë man en an, “Acïnkï nïïm mɔ̈u.”

⁴ Go Yecu puk nɔm an, “Tiiŋë eeŋöda në yïn? Thaardï aŋoot ke kën bɛ̈n.”

⁵ Go man kɔc yïn kɔc mïïth yɔ̈ɔ̈k an, “Të de yen kë lëk week, ke luɔikï.”

⁶ Ade töny dït cï cäp ëtɛ̈ɛ̈n kadhetem, töny ke pïïu, töny ë cuëc ë kuur, kak ee kɔc ke piny, cït man ë ciɛɛŋ de Judai, töny tök aduëër yic dɛk jeluun kathiërrou ayï thiërdiäk.

⁷ Go Yecu ke yɔ̈ɔ̈k an, “Thiäŋkï töny ë pïïu.” Gokï ke thiɔ̈ɔ̈ŋ acïn kethook të dak.

⁸ Ago lɛ̈k keek an, “Gɛ̈mkï ke bei ënɔɔnë, lɛɛrkï ke tëde raan nu ë thiëëk nɔm.” Gokï ke lɛɛr.

⁹ Na wën, acï raan nu ë thiëëk nɔm pïïu thiëëp, pïïu wën cï röt tɔ ye mɔ̈u, ku kuc të bï en thïn (ku ŋic kɔc yïn kɔc mïïth kɔc wën gem pïïu), ke raan nu ë thiëëk nɔm jɔ monythiëk cɔɔl.

¹⁰ Ku lëk en an, “Raan ëbɛ̈n ee mɔ̈n piɛth kɔn tääu, na ëlë, të cï kɔc yiic a niäk, ke jɔ mɔ̈n piɛth ëmääth bɛ̈ɛ̈i: ku yïn ë mɔ̈n piɛth pëën aɣet cï ënɔɔnë.”

¹¹ Göl ë gɔlë göök bï kɔc ke gäi kï, kë cïï Yecu looi ë Kana de Galili, abïï dhuëëŋde nyuɔɔth, go kɔckɛn ë piööcë gokï këde gam.

¹² Na wën, aacï kënë wan, ke jël le Kapernaum, yen ku man, ku mïthëkɔcken, ku kɔckɛn ë piööcë: agokï ceŋ ëtɛ̈ɛ̈n akööl cïï juëc.

Yecu alɔ ë Luaŋdït Yic

¹³ Dhuëëŋ ë Judai ë guɔ thiɔ̈k, Dhuëëŋ cɔl Winythok, go Yecu lɔ Jeruthalem.

¹⁴ Ago kɔc yök ë Luaŋdïtic, kɔc ee miöör ɣaac ayï thök ayï ajiël ke guuk, ku yök kɔc ee wëu waar yiic ke ke rɛ̈ɛ̈r.

¹⁵ Go tiäär yiëër ë këër, ku cieec ke biic kedhie në Luaŋdïtic, ayï thök, ayï miöör, ku luuŋ wëu piny wëu ke kɔc ee wëu waar yiic, ago pɛɛmken pɔ̈k yiic piny,

¹⁶ ku lëk kɔc ë ajiël ke guuk ɣaac an, “Nyaaikï kakë ee tënë, duökï ɣön ë wäär ë tɔ ye ɣön ë ɣööc.

¹⁷ Ago kɔckɛn ë piööcë agokï kenïïm cät nɔn cï ë gɔ̈ɔ̈r an, “Dït aa yɛn piɔ̈u dït ë këde ɣöndu ë ya cuet piɔ̈u.”

¹⁸ Go Judai bɛ̈ɛ̈r, thiëckï an, “Ee gök ŋö nyuöthë wook, kë loi yïn ee kakë?”

¹⁹ Go Yecu bɛ̈ɛ̈r, lɛ̈k keek an, “Riäkkï luaŋ ë Nhialicë, ku abä bɛ tɔ kääc ë nïn kadiäk.”

²⁰ Go Judai lueel an, “Luaŋ de Nhialicë aa leer run kathiërŋuan ku dhetem ke yïk, ku bä bɛ tɔ kääc ë nïn kadiäk!”

²¹ Ku aa jam në këde guöpde, acï tɔ ye luaŋ de Nhialic.

²² Na ɣɔn acï rɔt guɔ jɔt ë kɔc cï thou yiic, go kɔckɛn ë piööcë agokï tak nɔn cï en kënë lɛ̈k keek, gokï këcïgɔ̈ɔ̈r gam, ayï jam wään cïï Yecu lueel.

Yecu Aŋic Täu de Kɔc

²³ Ɣɔn nu yen ë Jeruthalem ë akööl ke Winythok, go kɔc juëc rinke gam, të cï kek göök tïŋ göök wën cï looi.

²⁴ Ku Yecu akën rɔt päl keek, luɔi ŋic en kɔc kedhie,

²⁵ ku acïn cäätɔ duëër dhil kɔɔr cäätɔ bï këde raan lueel, yen guöp ee kë nu ë raan piɔ̈u ŋic.